Бүген Дәүләт Советында Дәүләт корылышы һәм җирле үзидарә комитеты утырышы булды, анда парламентарийлар җирле үзидарә турында республика законына һәм Татарстан Республикасының аерым закон актларына, шулай ук муниципаль хезмәт турында республика кодексына үзгәрешләр кертү турында закон проектлары турында фикер алыштылар. Моннан тыш, комитет утырышында Россия Федерациясеннән чыгу һәм илгә керү тәртибе турындагы Федераль законны гамәлгә ашыру турындагы карар проекты каралды.

«Татарстан Республикасында җирле үзидарә турында» ТР Законының 15 һәм 17 статьяларына үзгәрешләр кертү турында» закон проектын тәкъдим иткәндә, Дәүләт корылышы һәм җирле үзидарә комитеты рәисе Альберт Хәбибуллин документның республика законнарын федераль законнарга туры китерү максатыннан эшләнгәнлеген билгеләп үтте. Әлеге Федераль закон белән хуҗалык кенәгәләрендә шәхси ярдәмче хуҗалыкларны исәпкә алу мәсьәләсе җирлекләрнең һәм шәһәр округларының җирле әһәмияттәге мәсьәләләренә кертелгән.. Шундый ук үзгәрешләр республика кануннарына да кертелә.

Җирле үзидарә турында республика законына һәм муниципаль граждан хезмәте турында кодекска үзгәрешләр кертү хакындагы закон проекты республика законнарында җирле үзидарә турында федераль законнарга кертелгән үзгәрешләрне гамәлгә ашыруга юнәлдерелгән. Федераль закон нигезендә муниципаль берәмлек уставында Россия Федерациясе субъекты законы нигезендә муниципаль берәмлек вәкиллекле органының җирле администрация формалаштыруда катнашу, шул исәптән җирле администрация башлыгы урынбасарлары, тармак һәм территориаль органнар җитәкчеләрен вазыйфага билгеләүне раслауда яисә килештерүдә катнашу хокукы каралган.

Закон проектларын Дәүләт Советының чираттагы утырышында карау планлаштырыла.

Комитет утырышында шулай ук «Россия Федерациясеннән чыгу һәм Россия Федерациясенә керү тәртибе турында» Федераль законны Татарстан Республикасы Дәүләт Советында гамәлгә ашыру турында» карар проекты каралды. Альберт Хәбибуллин билгеләп үткәнчә, әлеге карар белән аеруча әһәмиятле мәгълүматлар яисә бөтенләй яшерен мәгълүматлар турында хәбәрдар булган Татарстан Республикасы Дәүләт Советы депутатының Россия Федерациясеннән китү хокукы вакытлыча чикләнергә мөмкин. «Илдән чыгу хокукын чикләү турындагы карар Дәүләт Советы Рәисе тарафыннан әлеге документ белән билгеләнгән тәртиптә кабул ителә», – дип белдерде Альберт Хәбибуллин.

Утырышта башка мәсьәләләр дә каралды.