Бүген Дәүләт Советында тантаналы шартларда республиканың төрле районнарындагы суд участокларына билгеләнгән җәмәгать судьяларына таныклыклар тапшырылды. Дәүләт Советы Рәисе Фәрит Мөхәммәтшин кулыннан хезмәт таныклыкларын 22 җәмәгать судьясы алды.  

Парламент җитәкчесе җыелучыларны җаваплы вазыйфага сайланулары белән котлады һәм республика җәмәгать судьялыгының законлылыкны тәэмин итү буенча гаять зур эш башкаруын ассызыклады. "Үсеш елларында җәмәгать юстициясе гадел хөкем итүнең ышанычлы коралына әверелде, - дип билгеләп үтте Фәрит Мөхәммәтшин. - Җәмәгать судлары гомуми юрисдикция судларында каралган барлык бәхәсләрнең 80 %ка якынын карый. 2024 елның беренче яртысында гына да республиканың җәмәгать судьялары тарафыннан 420 меңнән артык эш һәм материал каралды».

Дәүләт Советы Рәисе фикеренчә, заманча таләпләргә җавап бирә торган матди-техник тәэмин итү гадел хөкем итүне гамәлгә ашыруның мөһим шартларының берсе булып тора. «Татарстан Республикасында юстицияне үстерү» республика программасын гамәлгә ашыруга ел саен республика бюджетыннан 800 млн сумнан артык акча бүленә. 2022-2024 елларда Казан, Алабуга, Чистай, Азнакай, Мамадыш шәһәрләрендә җәмәгать судьялары биналарына капиталь ремонт эшләре төгәлләнгән, 8 объектта агымдагы ремонт ясалган.

Парламент Рәисе гаилә никахларын өзүгә бәйле эшләрне карауның аерым игътибар таләп итүен билгеләп үтте. Мондый эшләрнең 80% ка якыны җәмәгать судьялары карарлары белән рәсмиләштерелә. "Татарстанда аерылышулар саны 7% ка кимесә дә, бу мәсьәлә борчу тудыра, - диде Фәрит Мөхәммәтшин. - Аерылышулар санын киметү максатыннан федераль кануннарга никахны өзгән өчен дәүләт пошлинасын һәр ир яисә хатыннан 5 мең сумга кадәр арттыруга кагылышлы үзгәрешләр кертелде. Әмма бу гына җитми, гаиләләр белән мөмкин кадәр активрак эшләргә, бигрәк тә балигъ булмаган балалары булган парларга ир белән хатынны татулаштыру чараларына, гаилә белгечләре консультацияләренә мөрәҗәгать итәргә кирәк. Якларның читтән торып катнашуын мөмкин булганча киметергә, ир белән хатынның шәхси катнашуына өстенлек бирергә. Һәм мондый эшләрдә бик күп нәрсә суд хокукыннан файдалану практикасына, сезнең яктан осталыкка һәм җаваплылыкка бәйле".

Республика Югары Суды рәисе Азат Гыйльметдинов һәм ТР юстиция министры Рөстәм Заһидуллин җәмәгать судьяларына һөнәри эшчәнлекләрендә уңышлар теләделәр.

"Сез катлаулы сайлап алуны уздыгыз һәм югары осталыгыгызны исбатладыгыз, - дип билгеләп үтте Азат Гыйльметдинов, җәмәгать судьяларына мөрәҗәгать итеп. - Барыгызга да дөрес, законлы һәм, иң мөһиме, гадел карарлар телим. Һәрвакыт истә тотыгыз, һәр эш, материал, карар артында кешеләрнең язмышы тора».

"Татарстанда дәүләт хакимиятенең югары закон чыгару органында җәмәгать судьяларына таныклыклар тапшыру тантанасы күркәм традициягә әверелде, - дип ассызыклады Рөстәм Заһидуллин. - Юстиция министрлыгы суд җәмәгатьчелеге белән тыгыз хезмәттәшлек итә, җәмәгать судьялары эшчәнлеген тәэмин итә. Сезнең белән бергәләп без төп бурычыбызны − үз мәнфәгатьләрен һәм хокукларын яклап җәмәгать судьяларына мөрәҗәгать итүче республика халкы өчен уңайлы шартлар тудыруны хәл итәбез. Сезгә карар кабул итүдә ныклык һәм принципиальлек телим".  

Казан шәһәренең Яңа Савин суд районы буенча 4нче суд участогы җәмәгать судьясы Марат Ибраһимов хезмәттәшләре исеменнән ышаныч белдергәннәре өчен Дәүләт Советына рәхмәт белдерде һәм җәмәгать судьялары хөкем эшен вакытында һәм гадел алып барачакларына ышандырды.