Бүген Кукмара район Советының хисап сессиясендә муниципаль районының 2024 елгы социаль-икътисади үсешенә йомгак ясалды. Моннан тыш, муниципаль депутатлар 2025 елга бурычлар билгеләделәр. Утырыш эшендә Дәүләт Советы Рәисе урынбасары Марат Әхмәтов катнашты.

Район Советы утырышы башланганчы Марат Әхмәтов, район башлыгы Сергей Дмитриев белән бергә, күптән түгел капиталь ремонт ясалган Югары Чура урта мәктәбендә һәм балалар бакчасында булды. Район Советының утыз алтынчы сессиясе Югары Чура авыл мәдәният йортында узды, анда җирле предприятиеләр, шәхси эшмәкәрләр, үзмәшгульләр җитештергән товарлар күргәзмәсе оештырылган иде.

Утырышта Кукмара муниципаль районы башлыгы Сергей Димитриев районның 2024 елдагы социаль-икътисади үсеш йомгаклары һәм агымдагы елга бурычлары турында сөйләде.

"2024 ел социаль-икътисади үсеш, патриотизм һәм гаилә кыйммәтләре эгидасы астында узды, – дип басым ясады Сергей Димитриев, – йөзләгән район халкы махсус хәрби операция зонасында Ватан иминлеге өчен көрәшә, хәрби бурычларын намус белән үти. Безнең сугышчылар батырлык, ныклык һәм каһарманлык күрсәтәләр. Барлык геройларга да чын күңелдән рәхмәт сүзләре һәм тирән ихтирам хисләрен җиткерәм. Махсус хәрби операциянең беренче көннәреннән үк район халкы алгы сызыктагы сугышчыларыбызга актив ярдәм күрсәтә. СВО зонасына 162 гуманитар конвой, 550 тоннадан артык гуманитар ярдәм җибәрелде".

Икътисадый күрсәткечләргә килгәндә, район башлыгы билгеләп үткәнчә, күп өлкәләрдә үсеш күзәтелә. 2024 ел нәтиҗәләре буенча тулай территориаль продукт күләме 23 млрд сум тәшкил иткән, ягъни 2023 ел дәрәҗәсенә карата 110%. Район предприятиеләре тарафыннан үзләре җитештергән 7,7 млрд. сумлык продукция озатылган, бу 2024 ел белән чагыштырганда 5% ка күбрәк.

Авыл хуҗалыгында 10 млрд. 453 млн. сумлык продукция җитештерелгән, җитештерелгән продукциянең 80% ы терлекчелеккә, 20% ы игенчелеккә туры килә. 2024 елда 110 мең тонна ашлык җыелган. Район буенча уңдырышлылык-39,2 ц / га. 1 гыйнварга эре мөгезле терлекләр саны 44 469 (+1478) баш тәшкил итә.

Татарстан Дәүләт Советы Рәисе урынбасары Марат Әхмәтов Кукмара районын республиканың социаль-икътисадый үсешенә саллы өлеш кертүен билгеләп узды. “Аграр тармак үсешендә мисалга китерсәк, сез республикада  үрнәк булып торасыз. Сездә республиканың 10 процент сөте җитештерелә. Бу әле чик булмас, киләчәктә 700 тонна сөткә дә чыгарсыз дип ышанам”, –  диде ул. 

Марат Әхмәтов сәнәгать, сәламәтлек саклау, белем бирү тармагы, демографик күрсәткечләргә тукталды, хезмәт базарында кеше кадерен дә ассызыклады. “Кукмара районы бер гаилә кебек тупланган. Сез республика һәм ил язмышы белән яшисез. Ирешкән матур хезмәт нәтиҗәләре өчен Республика Рәисе Рөстәм Миңнеханов исеменнән рәхмәт сүзләре җиткерәм. Алга таба да куйган максатларыгызга ирешеп, илне-көнне сөендереп яшәгез”, – диде ул.