Шәһәр төзелеше эшчәнлеге турында республика законына үзгәрешләр кертү хакындагы закон проекты бүген Дәүләт Советы утырышында беренче укылышта һәм тулаем кабул ителде. Республика законнарын РФ Шәһәр төзелеше кодексына кертелгән үзгәрешләргә туры китерү максатларында әзерләнгән.  Документ территорияләрне комплекслы үстерү турындагы нигезләмәләргә үзгәрешләр кертүне күздә тота.

Закон проектын тәкъдим итеп, Татарстан Республикасы төзелеш, архитектура һәм торак-коммуналь хуҗалык министры Марат Айзатуллин төзәтмәләр Министрлар Кабинетының вәкаләтләрен киңәйтә, аерым алганда, Татарстан хөкүмәте генераль планнар проектларын, җирдән файдалану һәм төзелеш, планлаштыру һәм территорияләрне манлау кагыйдәләрен әзерләгәндә иҗтимагый фикер алышулар яисә гавами тыңлаулар үткәрү кирәк булмаган очракларны билгели алачак, дип билгеләп үтте. Шул ук проектларга үзгәрешләр кертүгә дә кагыла. Элек мондый вәкаләтләр вакытлы характерда иде, хәзер – даими.

Моннан тыш, закон проекты территорияләрне комплекслы үстерү турындагы нигезләмәләргә үзгәрешләр кертүне күздә тота. ТР Министрлар Кабинеты территорияне планлаштыру буенча документлар булмаганда җир кишәрлегенең шәһәр төзелеше планын бирүне рөхсәт итәчәк очракларны билгели алачак.

Шулай ук блоклы йортларда һәм индивидуаль торак төзелеше объектларында югары дәрәҗәдә тузганлыкны, техник торышның тиешенчә булмавын яки инженер-техник тәэмин итү системаларының булмавын характерлый торган критерийлар билгеләнәчәк.

"Процедураларны гадиләштерү рөхсәт документларын әзерләү вакытын кыскартачак, әһәмиятле объектларны гамәлгә ашыруны тизләтәчәк. Әлбәттә, әйләнә- тирә мохиткә тискәре йогынты ясый торган һәм халык сәламәтлегенә куркыныч тудыра торган объектларны урнаштырганда без гражданнарның фикерен исәпкә алачакбыз»,  – дип белдерде министр.