Бүген Дәүләт корылышы һәм җирле үзидарә комитеты һәм Комитет каршындагы Эксперт советының уртак утырышында парламентарийлар Татарстан Республикасы Рәисе тарафыннан парламентка кертелгән 2024 елда Татарстан Республикасы Министрлар Кабинеты эшчәнлеге нәтиҗәләре турындагы Хисап карады.

Бу мәсьәлә буенча төп доклад белән Татарстан Республикасы Икътисад министрының беренче урынбасары Олег Пелевин чыгыш ясады. Ул, чикләүләргә һәм санкцияләр саклануга карамастан, 2024 елда республика икътисадында уңай тенденцияләр саклануы, төп макроикътисадый күрсәткечләр үсешенә ирешелүен билгеләп үтте. "Предприятиеләрнең һәм икътисад тармакларының өзлексез эшләве, федераль һәм республика ярдәм чаралары нәтиҗәсендә республикада Икътисадый үсеше саклана", - диде Олег Пелевин.

2025 елда республика икътисадының тотрыклы нәтиҗәле үсешен тәэмин итү турында сөйләгәндә Олег Пелевин оешмалар эшчәнлегенең нәтиҗәлелеген, инвестиция активлыгын саклап калуны,  инновацияләр үсешен  арттыруны һәм яңа технологияләрне гамәлгә кертүне, кече һәм урта эшмәкәрлекне сыйфатлы үстерүне, муниципаль берәмлекләрне баланслы үстерүне, шулай ук илкүләм проектларны һәм дәүләт программаларын гамәлгә ашыруны атады. Моның өчен эре, урта һәм кече предприятиеләр эшчәнлегенең нәтиҗәлелеген арттыру бурычы куела.

Сәнәгать паркларын үстерү турында сөйләгәндә, Татарстан Республикасы Икътисад министрының беренче урынбасары билгеләп үткәнчә, республиканың муниципаль берәмлекләрендә 1725 резидент эшли, 70885 эш урыны булдырылган, уртак керем 560 млдр сум тәшкил иткән. Бу 2023 ел белән чагыштырганда 12,8% ка күбрәк. Шулай ук Олег Пелевин сәнәгать парклары булмаган районнарны атады, бу кече эшмәкәрлек үсешендә чагыла. Болар Әгерҗе, Әлки, Апас, Югары Ослан, Кама Тамагы, Нурлат һәм Чирмешән районнары.

Хөкүмәт хисабына 2024 елда гражданнарның үзара салым программасын гамәлгә ашыру һәм 2025 елга фаразлар турында мәгълүмат кергән. Үзара салым программасы агымдагы елда һәм 2026-2027 елларның план чорында дәвам итәчәк. Татарстан Республикасы бюджетында бу максатларга ел саен 1 352 млн сум каралган. Үзара салым акчалары юллар, күперләр төзүгә һәм төзекләндерүгә, авыл торак пунктларын су белән тәэмин итүгә һәм яктыртуга тотыла. Бу акчалар шулай ук ял итү зоналарын, спорт һәм балалар мәйданчыкларын, Чишмәләрне, сулыкларны төзекләндерүгә, һәйкәлләр һәм обелисклар урнаштыруга һәм реконструкцияләүгә тотыла.

2014 елдан башлап ун ел эчендә татарстанлылар үзара салым җыеп, үз территорияләрен үстерүгә 2 710,4 млн сум керткән. Шул ук чорда Татарстан Республикасы бюджетыннан финанслауның гомуми суммасы 10 409,9 млн сум тәшкил иткән. Хөкүмәт хисабы буенча фикер алышуда Дәүләт корылышы һәм җирле үзидарә комитеты рәисе Альберт Хәбибуллин, комитет рәисе урынбасары, КПРФ фракциясе җитәкчесе Хафиз Миргалимов, депутатлар Михаил Сыроваций, Ренат Вәлиуллин, Камил Гыйльманов, Евгений Солтанов катнаштылар. Алар яшь буынны предприятиеләрдә эшләргә җәлеп итү мәсьәләләре, шулай ук тормыш эшчәнлегенең төрле өлкәләрендә хезмәт хакы дәрәҗәсе төрлечә булу сәбәпләре, төп ставканың артуы шартларында эшмәкәрлеккә федераль һәм республика бюджетлары ягыннан ярдәм күрсәтү мәсьәләләре белән кызыксындылар.

Комитет тәкъдим ителгән документны игътибарга алды һәм Дәүләт Советы Президиумына аны парламентның чираттагы утырышы көн тәртибенә кертергә тәкъдим итте.