Бүген Дәүләт Советында «Хезмәткә һәм оборонага әзер» Бөтенроссия физкультура-спорт комплексы проектларының Бөек Ватан сугышында Җиңүнең 80 еллыгына багышланган «Хәтер юллары буйлап» республика конкурсында җиңүчеләрне бүләкләү тантанасы булды. Конкурс лауреатларын Социаль сәясәт комитеты рәисе Светлана Захарова, «Сила России»  Бөтенроссия спорт марафонының төбәк координаторы Ольга Павлова һәм Татарстанда «ГТО» төбәк иҗтимагый оешмасы рәисе Эдуард Иванов сәламләде.

«Бүген бөтен ил буйлап күп санда спорт объектлары ачыла, һәм Татарстан Республикасы физик культура һәм массакүләм спортны үстерүдә ышанычлы рәвештә алдынгы урында тора, – дип басым ясады Светлана Захарова. – Казан, республиканың спорт белән шөгыльләнү өчен уникаль мөмкинлекләрен ассызыклап, илнең спорт башкаласы исемен лаеклы йөртә. Без Татарстанның һәр районында актив тормыш рәвеше алып бару өчен менә дигән шартлар тудырылуы белән горурланабыз. Безнең ишегалларында һәр теләгән кешегә спорт белән шөгыльләнү мөмкинлеген тәэмин итә торган заманча спорт мәйданчыклары һәм тренажерлар урнаштырылган, һәм болар барысы да –Татарстан Республикасы Рәисе Рөстәм Миңнехановның актив ярдәме, хакимиятнең барлык дәрәҗәләренең, шул исәптән Дәүләт Советының һәм республиканың муниципаль берәмлекләренең нәтиҗәле эше нәтиҗәсе».

Җиңүчеләрне сәламләп, Ольга Павлова билгеләп үткәнчә, ГТО комплексы үсүен дәвам итә һәм якын киләчәктә яңа юнәлеш – пилотсыз аппаратлар белән идарә итү барлыкка киләчәк. Ул шулай ук педагогларга, укучыларга һәм ата-аналарга конкурста актив катнашулары һәм ярдәмнәре өчен рәхмәт белдерде. «Сезнең бу конкурста катнашуыгыз  яңа казанышларга ирешергә көч бирә. Уңышлар телим һәм үзегезне теләсә нинди сынауларда сынап карарга курыкмагыз!», – дип мөрәҗәгать итте лауреатларга Ольга Павлова.

«ГТО – ул физик культура белән шөгыльләнү генә түгел, бәлки тәнне һәм рухны ныгытуга юнәлдерелгән җитди эш. Даими күнегүләр аша без ихтыяр көчен, максатчанлыкны һәм җаваплылык хисен үстерәбез», – дип билгеләп үтте Татарстанда «ГТО» төбәк иҗтимагый оешмасы рәисе Эдуард Иванов, мәктәп укучыларына мөрәҗәгать итеп.

Конкурс «Бердәм Россия» партиясе инициативасы белән оештырылган «Россия көче» («Сила России»)  Бөтенроссия спорт марафоны кысаларында уза. Анда республика гомуми белем мәктәпләренең 5-7 сыйныф укучылары катнашты. Балалар сугышчан дан урыннары турында сөйләгән эшләрен күрсәттеләр. Конкурсның республика этабына республиканың төрле шәһәр һәм районнарыннан иң яхшы 25 эш сайлап алынды.

Быел «Бердәм Россия» партиясе оештырган «Россия көче» («Сила России»)   спорт марафоны инде дүртенче тапкыр уздырыла. Марафон, яңа регионнарны да кертеп, Россия Федерациясе территориясендә төрле яшьтәге йөзләрчә мең кешене берләштерде. Ул 20 февральдә, Ватанны саклаучылар көне алдыннан старт алды һәм 3 сентябрьдә – Икенче бөтендөнья сугышы тәмамланган көнне тәмамланачак.

Конкурсны оештыручылар мәгълүматларына караганда, проектны гамәлгә ашыру елларында бөтен ил буйлап 800000 кешене берләштергән унҗиде меңнән артык тренировка уздырылган.  Быел марафон Ватанны саклаучылар елына багышланган, һәм катнашучылар танылган атлетларның тәҗрибәләрен өйрәнеп кенә калмыйча, илебезне яклаучы спортчылар, аларның сугышчан һәм спорт җиңүләре турында да күбрәк белә алдылар.  Хәрби хәрәкәтләр ветераннары һәм инвалидлары, шул исәптән махсус хәрби операциядә катнашучылар өчен, аерым тренировкалар оештырылды.

Татарстанда быел Данис Зарипов, апалы-сеңелле Диана Аверина һәм Арина Аверина, Николай Валуев, Гөлнара Галкина-Сәмитова һәм башкалар күнегүләр уздырдылар.