Бүген Казанда Казан вертолет заводына нигез салынуга 85 ел тулуга багышланган тантаналы чара узды. Тарихы 1940 елдан башланган  предприятиенең хезмәт коллективын һәм җитәкчелеген республика Рәисе, Татарстан парламенты һәм Хөкүмәте исеменнән Дәүләт Советы Рәисе Фәрит Мөхәммәтшин котлады.

 «Без бүген республикабызның гына түгел, илебезнең дә иң эре предприятиеләренең берсе булган Казан вертолет заводын хөрмәтлибез, ул 85 ел эшли һәм бик мөһим, югары квалификацияле, кирәкле авиация техникасы җитештерә, – диде Фәрит Мөхәммәтшин, кунакларны сәламләп. – Бүген предприятиедә биш меңнән артык кеше эшли һәм барысы да, бер гаилә кебек, зур һәм катлаулы бурычларны хәл итә. Төрле елларда Казан вертолет заводы Ми-1 җитештерә – бу СССРда винтлы канатлы  техниканың беренче серияле җитештерүе була.  Ми-8 / 17 машиналары дөньяда вертолетларның иң массакүләм һәм популяры, алар бүген дә төрле модификацияләрдә җитештерелә. Бу үз илебез авиациясе үсешенә, белем һәм күнекмәләрен керткән кешеләрдән башка – җитештерү ветераннарыннан башка булмас иде».

Фәрит Мөхәммәтшин заводның  тарихы сәхифәләренә, шул исәптән предприятиенең сугыш елларындагы эшенә аерым тукталды. Казан вертолет заводының авиация тарихы 1940 елның 4 сентябрендә башлана. Бөек Ватан сугышы вакытында предприятие фронт өчен төнге җиңел по-2 бомбардировщиклары җитештерә. Биредә Бөек Ватан сугышы елларында СССРның  авиация сәнәгате чыгарган һәр унынчы хәрби самолет җыелган. 1945 елда Казанның 387нче заводы Хезмәт Кызыл Байрагы ордены белән бүләкләнә.

"Завод үз эшенә ерак 1940 елда керешкән, һәм Бөек Ватан сугышы вакытында предприятие техникасына ихтыяҗ зур булган, завод бер генә минутка да туктамаган, кешеләр көнне төнгә ялгап эшләгәннәр. Ачлыкка һәм тормыш авырлыкларына карамастан, предприятие коллективы ил өчен мөһим бурычларны үтәгән", – диде Фәрит Мөхәммәтшин.

Бүген, Фәрит Мөхәммәтшин әйтүенчә, Казан вертолетлар заводы –  вертолетлар төзүнең тулы циклы булган бердәнбер предприятие. 85 ел эчендә КВЗда 12 меңгә якын вертолет  җыелган, 100 гә якын илгә экспортка 4000нән артык вертолет техникасы чыгарылган. Казанда җитештерелгән вертолетлар, гомумән алганда, бөтен дөнья буйлап 50 млн нан сәгатьтән артык очыш ясаган.

Предприятиенең юбилее белән авиация тармагы коллективын һәм ветераннарын Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Олег Коробченко котлады. "Татарстан сәнәгате бөтен ил икътисадына зур өлеш кертә. Безнең предприятиеләр продукциясенә республикада да, аннан читтә дә ихтыяҗ зур, – дип басым ясады  Олег Коробченко. – Безнең завод алга таба да үссен, ә безнең вертолетлар дөньяда иң яхшыларның берсе булып калсын иде».

Бүген Казан вертолет заводының иң яхшы хезмәткәрләренә Татарстан Дәүләт бүләкләре тапшырылды.