Мәскәүдә «Бердәм Россия» оештырган «Киләчәкне булдыручы хатын-кызлар» дип аталган өченче Бөтенроссия форумы узды. Чарада илнең 89 төбәгеннән 700дән артык  кеше – активистлар, сәясәтчеләр, депутатлар, экспертлар һәм иҗтимагый оешмалар вәкилләре катнашты. Татарстан Республикасыннан форумда Дәүләт Советының «Мәрхәмәт-Милосердие» хатын-кыз депутатлар берләшмәсе җитәкчесе Алсу Нәбиева һәм Социаль сәясәт комитеты рәисе урынбасары Ольга Воронова катнашты.

Форум ил үсешенең милли максатларын тормышка ашыруда,  сәяси, социаль һәм иҗтимагый бурычларны хәл итүдә хатын-кызларның роле турында фикер алышу өчен мәйданчык булды.

«Бердәм Россия» партиясе рәисе Дмитрий Медведев ассызыклаганча,  актив хатын-кызларның идеяләре һәм проектлары партиянең яңа халык программасын эшләгәндә исәпкә алыначак. Ул шулай ук «Хатын-кызлар политмәктәбе»н – хатын-кызларны иҗтимагый һәм дәүләт эшчәнлегендә катнашуга әзерләү өчен белем бирү мәйданчыгын киңәйтү турындагы тәкъдимне хуплады.

Форум нәтиҗәләре буенча партиянең Генсовет секретаре Владимир Якушев Алсу Нәбиевага проектны уңышлы гамәлгә ашырганы һәм Татарстанда хатын-кызлар лидерлыгын үстерүгә керткән өлеше өчен Рәхмәт хаты тапшырды.

«Бердәм Россиянең хатын-кызлар хәрәкәте» өченче Бөтенроссия форумы тәҗрибә уртаклашу, яңа идеяләр формалаштыру һәм илнең социаль һәм икътисадый үсешенә өлеш кертүче хатын-кызларның көчләрен берләштерү өчен мөһим мәйданчык булды»,  дип белдерде Алсу Нәбиева.

Форум кысаларында катнашучылар «Остазлык», «Хатын-кызлар политмәктәбе», «Җиңүдән соң тормыш», «Гаилә сәламәтлеге» һәм «Хатын-кызлар клублары» проектларын да кертеп, 2026 елда инициативаларны гамәлгә ашыру буенча тәкъдимнәр керттеләр. Махсус хәрби операциядә катнашучыларның хатыннарына һәм аналарына ярдәм итүгә, сугышчыларны реабилитацияләү программаларын үстерүгә һәм хатын-кызлар эшмәкәрлеген үстерүгә аерым игътибар бирелде.