Бүген Дәүләт Советында парламентның уналтынчы утырышы кысаларында традицион «Подписка бүләк ит» хәйрия акциясе оештырылды. Утырыш тәнәфесендә депутатлар 2026 елның беренче яртыеллыгына республиканың социаль учреждениеләре өчен газета-журналларга язылдылар.

Республика газеталарына һәм журналларына язылу Дәүләт Советында даими рәвештә оештырыла. Депутатлар ярдәме белән ветераннар, балалар йортларында тәрбияләнүчеләр, шулай ук өлкәннәр һәм инвалидлар өчен интернат-йортларда яшәүче кешеләр республика һәм район матбугат басмаларын күзәтеп баралар.

Язылу кампаниясе барышында парламентарийлар «Татмедиа» Республика матбугат һәм массакүләм коммуникацияләр агентлыгы тәкъдим иткән «Шәһри Казан», «Казанские ведомости» газеталарына, «Сөембикә», «Идел», «Ялкын», «Салават күпере», «Татарстан», «Казан» журналларына язылдылар. Басмалар арасында шулай ук Татарстан Республикасы Дәүләт Советы һәм Татарстан Республикасы Министрлар Кабинеты гамәлгә куйган «Республика Татарстан» һәм «Ватаным Татарстан» газеталары да бар иде.

Дәүләт Советы Рәисе Фәрит Мөхәммәтшин Баулы районының Кырым-Сарай авылында урнашкан интернат-йортта яшәүчеләр өчен «Республика Татарстан», «Ватаным Татарстан» газеталарына һәм «Сөембикә» журналына язылды.

«Без массакүләм мәгълүмат чараларыннан башка эшли алмыйбыз, шуңа күрә үзебез язылабыз һәм газета - журналларны укый алсыннар өчен языла алмаучыларга ярдәм итәбез,», - дип ассызыклады Фәрит Мөхәммәтшин республика газета-журналлары мөхәррирләре, журналистлары белән аралашканда.