Бүген Казанда балалар өчен «Могҗизалар башлана – искиткеч Раштуа бәйрәме!» дип аталган бәйрәм оештырылды.  Дәүләт Советы депутатлары һәм «Бердәм Россия»нең җирле бүлеге активистлары Казанда яшәүче ярдәмгә мохтаҗ балалар өчен ел саен шундый чаралар уздыра.

Бу юлы партиянең Бауман башлангыч бүлеге әгъзалары оештырган бәйрәм Константин Васильев исемендәге музейда узды. Чарада аз керемле һәм күп балалы гаиләләрдән 25 бала, шулай ук сәламәтлек мөмкинлекләре чикләнгән балалар катнашты.

Чарада Дәүләт Советы депутаты, КФУның юридик факультетының Конституцион һәм административ хокук кафедрасы мөдире Евгений Солтанов катнашты.

«Сезне бу искиткеч бәйрәм белән котлыйсым килә! Сезнең барлык хыялларыгыз тормышка ашсын һәм һәрвакыт бәхетле көлүегез яңгырап торсын», – дип мөрәҗәгать итте Евгений Солтанов балаларга.

Бәйрәм кысаларында балалар өчен бай күңел ачу программасы әзерләнгән иде. Концерт Казанның рус фольклоры үзәге һәм шәһәрнең иҗат коллективлары катнашында узды. Төп кунаклар Кыш бабай белән Кар кызы иде, балалар өчен күңелле уеннар оештырылды,  чыршы тирәли әйлән-бәйлән уйнадылар, табышмакларга җаваплар эзләп көч сынаштылар.

Бәйрәм ахырында балаларга күчтәнәчләр бирделәр.