Дәүләт Советы депутатларының округларда эшләве дәвам итә. Бу атнада парламентарийлар гражданнарны кабул итте, гражданнар җыеннарында катнашты, республика муниципалитетларында сайлаучылар белән очрашты. 

23 гыйнварда Торак сәясәте һәм инфраструктура үсеше комитеты рәисе урынбасары Ринат Гайзатуллин эш сәфәре белән Буа районына барды. Депутат Исәк авыл җирлегендә узган гражданнар җыенында катнашты. Авыл халкы 2025 елгы эшкә йомгак ясады һәм килүче елга бурычлар билгеләде.    

22 гыйнварда Дәүләт Советы Рәисе урынбасары Юрий Камалтынов Россия Федерациясе Приденты Владимир Путинның кабул итү бүлмәсендә гражданнарны кабул итте. Депутатка җир кишәрлекләрен милеккә рәсмиләштерүгә кагылышлы сораулар белән мөрәҗәгать иттеләр.

Бу атнада Юрий Камалтынов шулай ук Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең Татарстан Республикасы буенча идарәсе, Татарстан Республикасы Төзелеш, архитектура һәм ТКХ министрлыгы, Мәдәни мирас объектларын саклау комитетының йомгаклау коллегияләре эшендә катнашты.  

22 гыйнварда Дәүләт Советы Рәисе урынбасары Марат Әхмәтов Татарстан Республикасы Рәисе каршындагы Татар телен һәм Татарстан Республикасында яшәүче халыкларның туган телләрен саклау һәм үстерү мәсьәләләре буенча комиссия киңәшмәсен үткәрде. Комиссия әгъзалары бу өлкәдә эшчәнлекнең нәтиҗәлелеген күтәрү өчен эшнең яңа методлары һәм юнәлешләре турында фикер алыштылар, шулай ук туган телләрне саклау буенча яңа инициативалар һәм аларны тормышка ашыру юллары турында фикер алыштылар. Киңәшмәдә шулай ук Дәүләт Советы депутатлары Камил Ногаев һәм Айрат Зарипов катнашты. 

22 гыйнварда Торак сәясәте һәм инфраструктура үсеше комитеты рәисе урынбасары Ринат Гайзатуллин эш сәфәре белән Тәтеш һәм Чүпрәле районнарында булды. Депутат Тәтеш районында Киртәле авыл җирлегендә узган гражданнар җыенында катнашты. Авыл халкы муниципалитет башлыгының 2025 елда башкарылган эшләр турындагы хисабын тыңлады. Очрашуда шулай ук шәхси ярдәмче хуҗалыкларны һәм шәхси хуҗалыкларны үстерүгә ярдәм чараларына кагылышлы мәсьәләләр буенча фикер алыштылар.   

22 гыйнварда Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев эш сәфәре белән Минзәлә районына барды, анда Минзәлә медицина училищесының педагогик коллективы һәм студентлары белән очрашты. Моннан тыш, депутат Иске Матвеевка һәм Наратлы-Кичү авыл җирлекләрендә гражданнар җыеннарында катнашты. 

Иске Матвеевка авыл җирлеге башлыгы Дамир Латыйпов билгеләп үткәнчә, узган ел халык саны 380 кеше булган җирлектә физик затлар керемнәренә салым 149% ка, җир салымы 133% ка җыелган. Күп кенә проектлар гражданнарның үзара салым акчасына гамәлгә ашырылган. Халык махсус хәрби операциядә катнашучыларга ярдәм итүдә, гуманитар ярдәм җыюда да актив катнаша.

22 гыйнварда Дәүләт Советы депутаты Ренат Мистахов Яшел Үзән  районында яшәүче икенче группа инвалид Светлана Овсянниковага тормыш өчен мөһим дарулар сатып алуда финанс ярдәме күрсәтте. Пенсионер Татарстанга 2014 елда Луганск Халык Республикасыннан күчеп килгән. Депутат шулай ук аңа азык-төлек җыелмасын тапшырды. 

22 гыйнварда Яр Чаллы шәһәренең «Олимпия» олимпия резервы спорт мәктәбендә бокс буенча Татарстан Республикасы беренчелеге һәм чемпионаты ачылды. Ярышларда катнашучыларны Дәүләт Советы депутаты Андрей Ляпунов сәламләде. «Спортчыларга спорт карьераларында югары нәтиҗәләргә ирешүләрен телим. Мондый ярышлар шәһәрдә, республикада һәм илдә бокс үсешенә этәргеч бирә», – дип белдерде депутат.

21 гыйнварда Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов эш сәфәре белән Азнакай районында булды.  Чәкән авылында депутат махсус хәрби операция ветераны Рөстәм Мотыйгуллинның шәхси ярдәмче хуҗалыгы эше белән танышты.  Рөстәм үз теләге белән махсус хәрби операциягә китә һәм, авыр яраланып кайткач, гаилә фермасы төзергә була, бу ферма аның тормышында яңа терәк була. Бүгенге көндә аның хуҗалыгында 13 сыер бар. Нәҗип Хаҗипов билгеләп үткәнчә, шәхси ярдәмче хуҗалыкларны үстерү – махсус хәрби операция ветераннарының тыныч тормышка җайлашуында уңышлы үрнәк булып тора. Депутат яшь фермерга эре мөгезле терлек һәм атлар үрчетү турында китаплар бүләк итте, ферма төзү буенча үз киңәшләрен бирде.

Моннан тыш, Нәҗип Хаҗипов Чәкән авылы музеенда булды, анда авыл тарихына багышланган археологик материаллар тупланган.

Сәфәр кысаларында Нәҗип Хаҗипов шулай ук Россия халыклары бердәмлеге елын ачуга, шулай ук Татарстан Республикасында игълан ителгән Хәрби батырлык һәм хезмәт  фидакарьлеге елына багышланган тантаналы чарада катнашты. 

Эш сәфәре кысаларында Нәҗип Хаҗипов Әгерҗе авылындагы халык җыенында катнашты.  

22 гыйнварда Дәүләт Советы депутаты Камил Гыйльманов Ютазы һәм Чистай районнарында булды. Депутат гражданнар җыеннарында һәм Чистай районының Гаделша авылы юбилеен бәйрәм итүдә катнашты.

21 гыйнварда Бюджет, салымнар һәм финанс комитеты рәисе Леонид Якунин эш сәфәре белән Кама Тамагы районында булды, анда ул «Украина неонацист режимы терроры хроникасы» фотокүргәзмәсен тәкъдир итүдә катнашты. Район халкы махсус операциядә катнашучыларга һәм аларның гаилә әгъзаларына ярдәм итү мәсьәләләре буенча фикер алышты.

Шул ук көнне Леонид Якунин муниципаль районның Осинники һәм Тәмте авыл җирлекләрендә гражданнар җыеннарында катнашты. Очрашуларда республиканың 2025 елда социаль-икътисадый үсеш нәтиҗәләре һәм 2026 елга планнар турында фикер алыштылар. Осинники авыл җирлегендә яшәүчеләр авыл мәдәният йорты төзү турында үтенеч белән мөрәҗәгать иттеләр. Депутат барлык сорауларны шәхси контрольгә алды.

21 гыйнварда Социаль сәясәт комитеты рәисе урынбасары Ольга Воронова 82нче мәктәп һәм 5нче лицей укучылары өчен «SCHOOL 21» цифрлы технологияләр мәктәбенә һөнәри юнәлеш бирү экскурсиясе оештырды. Экскурсия вакытында балалар кирәкле ИТ-юнәлешләр,  шулай ук карьера үсеше һәм ИТ-компанияләрдә стажировкаларда катнашу мөмкинлеге белән таныштылар. Укучылар уку кластерларында, сөйләшү бүлмәләрендә, китапханәдә, эчке ишегалдында һәм кампус кафесында булдылар. Ачык белем бирү мохите һәм мәктәптә тәүлек буе эшләү мөмкинлеге аеруча кызыксыну уятты.

20 гыйнварда Казан федераль университетында Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева гражданнарны кабул итте. Депутатка югары уку йортын тәмамлаучылар мөрәҗәгать иткән, аларның берсе университетны максатчан программа буенча тәмамлаган, һәм аның эшкә урнашу буенча сораулары туган. Депутат кирәкле аңлатмалар һәм консультацияләр бирде. Депутат шулай ук филология факультетын тәмамлаган Дмитрий Гарденко белән очрашты, ул яшьләр белән тәрбия эше проектын тәкъдим итте.

20 гыйнварда Дәүләт Советы депутаты Камил Гыйльманов төбәк иҗтимагый кабул итү бүлмәсендә гражданнарны кабул итте. Депутатка татарстанлылар шифаханәдә ташламалы дәвалануга кагылышлы сораулар белән мөрәҗәгать иттеләр.  

16, 19 һәм 20 гыйнварда Мәгариф, мәдәният, фән һәм милли мәсьәләләр комитеты рәисе Айрат Зарипов эш сәфәре белән Кайбыч районында булды. Депутат Ульянково, Чүти һәм Иске Тәрбит авыл җирлекләрендә халык җыеннарында катнашты.  Айрат Зарипов билгеләп үткәнчә, быел Россия Федерациясендә Халыклар бердәмлеге елы, ә Татарстанда Хәрби батырлык һәм хезмәт фидакарьлеге елы дип игълан ителде. Республика җитәкчелеге исеменнән ул район халкына хәрбиләргә һәм аларның гаилә әгъзаларына ярдәмнәре өчен рәхмәт белдерде. «2025 ел ахырына Татарстаннан хәрби бүлекчәләргә һәм без шефлыкка алган Лисичанск һәм Рубежное шәһәрләренә 5 мең тоннадан артык гуманитар ярдәм җибәрелде», – дип белдерде депутат.

19 гыйнварда Дәүләт Советы депутаты Руслан Нигъмәтулин Яр Чаллыда яшәүче тыл хезмәтчәне Саҗидә Фәрдиеваны 100 яшьлек юбилее белән котлады. Ул аңа бүләкләр, шулай ук Россия Президенты Владимир Путинның, республика Рәисе Рөстәм Миңнехановның, шәһәр мэры Наил Мәһдиевнең котлау хатларын тапшырды.

Шул ук көнне Руслан Нигъмәтуллин Яр Чаллыда шәһәрнең 40 нчы һәм 41 нче микрорайоннары халкы белән 82 нче кадет мәктәбендә узган традицион очрашуда катнашты. Депутат Дәүләт Советының 2025 елдагы эшчәнлеге турында сөйләде, шулай ук Электротехника округындагы эшенә йомгак ясады. Руслан Нигъмәтулин халыкка һәм ТИҮләргә инициативалары, хакимият органнарына һәм идарәче компанияләргә актив хезмәттәшлек өчен рәхмәт белдерде.

Моннан тыш, бу атнада Руслан Нигъмәтулин Яр Чаллыда православие бәйрәмен оештыруда катнашты. Депутат шәһәр эшмәкәрләре белән бергә Серафим Саровский храмы янында Мәләкәс елгасында коену өчен мәйданчык һәм бәке әзерләүне үз өстенә алган. Боз тиешле калынлыкка ныгытылган, киенү-чишенү бүлмәләре, чәй эчү урыннары булдырылган.