Татарстанда яшьләр белән системалы эш җайга салынган – үз-үзеңне табу, уку, карьера баскычында уңышлы күтәрелү, ныклы гаилә кору һәм балалар тәрбияләү өчен мөмкинлекләр бар. Республика яшьләр инфраструктурасын үстерү темплары буенча алдынгы урыннарда тора. 6 ел эчендә сәламәтләндерү лагерьларын һәм яшьләр үзәкләрен төзүгә һәм модернизацияләүгә 11 млрд сумнан артык акча тотылган. Татарстан волонтерлык хәрәкәте буенча да лидерлыкны тота. Бу хакта бүген Идел буе дәүләт физик культура, спорт һәм туризм университетында узган ТР Яшьләр эшләре министрлыгы коллегиясе утырышында ТР Дәүләт Советы Рәисе Фәрит Мөхәммәтшин белдерде. Коллегиядә ведомствоның 2025 елдагы эшенә йомгак ясалды һәм 2026 елга бурычлар турында фикер алыштылар.

Ведомствоның төп нәтиҗәләре турында ТР яшьләр эшләре министры Азат Кадыйров сөйләде. Ул билгеләп үткәнчә, бүген Татарстанда 1 миллионнан артык яшь кеше яши, ә бу республика халкының 25,4%. тәшкил итә. «Аларның һәрберсе – үз холкы, дөньяга карашы, таланты, ышанычы, планнары һәм өметләре булган шәхес. Безнең бурыч – аларның һәр кайсына барып җитү, бер телдә ишетә, сөйләшә һәм уйлый белү, төрле мөмкинлекләр тудырып ярдәм күрсәтү»,  –  дип  басым ясады Азат Кадыйров.     

Азат Кадыров әйтүенчә, Россия Президенты тарафыннан расланган илкүләм проектлар пакеты составына тарихта беренче тапкыр «Яшьләр һәм балалар» проекты кергән. Тугыз федераль проектның өчесендә Татарстан катнаша – «Россия – мөмкинлекләр иле», «Без бергә», «Россия дөньяда».

Яшьләр арасында инфраструктураны үстерү турында сөйләгәндә, 2025 елның төп күрсәткечләре арасында ТР Яшьләр эшләре министры Химиклар мәдәният йорты базасында Яшьләр үзәгенең беренче этабы федераль проект кысаларында ремонтлануын билгеләп үтте. Аның сүзләренә караганда, эшләрне тәмамлауга республика бюджетыннан өстәмә рәвештә 500 млн сумнан артык акча бүлеп бирелгән. «Быелгы бурыч – яшьләр өчен объект ачу, – дип билгеләп үтте министр.   Моннан тыш, Яшьләр эшләре буенча министрлыкның якындагы сезонга планнарында — 15 балалар лагерен эшләтеп җибәрү, бу исәпкә Яр Чаллыда 560 урынга исәпләнгән  «Следопыт» лагере да керә. Ел саен Татарстанның яшьләр сәясәте учреждениеләрен яңартуга 2 млрд сумнан артык акча юнәлтелә, бу исә заманча җәлеп итү киңлекләрен формалаштырырга, талантлар тәрбияләп үстерергә мөмкинлек бирә.

«Цифрлы мохиткә аерым игътибар бирергә кирәк, – дип өндәде коллегаларын Азат Кадыйров. Аның әйтүенчә, традицион кыйммәтләрне боза торган һәм мәктәпләрдә үз-үзеңне тоту иреге һәм нормалары, эзәрлекләү һәм балаларны һәм яшүсмерләрне җинаять эшчәнлегенә җәлеп итү турында бозып күзаллаулар формалаштыра торган контентның популярлыгы аерым борчу уята.  Бу, министр билгеләп үткәнчә, яшьләр арасында мәгълүмати тотрыксызлык куркынычын арттыра. Шуңа бәйле рәвештә, Азат Кадыйров ассызыклаганча, 2026 елга бурыч булып гамәлдәге мәгълүмат бирү системасын реформалаштыру тора.    

2026 елга планнар турында сөйләгәндә, Азат Кадыйров билгеләп үткәнчә, «Яшьләр һәм балалар» илкүләм проектын гамәлгә ашыру кысаларында 2030 елга төп максатчан юнәлешләр билгеләнгән: яшьләрнең 45% ын иреклеләр эшчәнлегенә, 75% ын һөнәри яктан үз-үзен табуга һәм патриотик тәрбия проектларына җәлеп ителә. Аның әйтүенчә, 2026 елда эш цифрлаштыру, форматларны яңарту, яшьләр өчен торак һәм грант ярдәме кебек юнәлешләргә юнәлдереләчәк. Игътибар үзәгендә шулай ук яшьләргә патриотик тәрбия бирү һәм ведомствоара багланышлар тора.

Азат Кадыров утырышта катнашучыларны тотрыклы «мөмкинлекләр системасын» булдыру өчен команда булып эшләргә чакырды, анда Татарстан яшьләре үз потенциалын тулысынча тормышка ашыра алачак, ә аның казанышлары белән киләчәк буыннар горурланачак.

Коллегиягә йомгак ясап, Фәрит Мөхәммәтшин республика җитәкчелегенең максатчан сәясәте, Татарстанда федераль үзәкнең ярдәме нәтиҗәсендә яшьләр белән эш югары дәрәҗәдә оештырылган булуына басым ясады. «Горурланып әйтә алам, республикабызда яшьләр үсешенә һәрвакыт зур игътибар бирелде», – дип билгеләп үтте Фәрит Мөхәммәтшин.

Яшьләр сәясәтенең төп мәсьәләләре турында сөйләгәндә, Фәрит Мөхәммәтшин демография, эшкә урнашу, шәһәр һәм районнарда инфраструктураның шактый аерылып торуы, аз кеше яшәгән авыл җирлекләрендә яшьләрнең активлыгы түбән булу мәсьәләләренә тукталды. «Авыл яшьләренә аерым игътибар бирергә кирәк»,  – дип ассызыклады республика башлыгы.

 Дәүләт Советы Рәисе яшьләр сәясәтенең төп юнәлешләрен билгеләде. «Яшь гаилә Татарстанның терәге булырга тиеш, – диде Фәрит Мөхәммәтшин. – Яшь гаиләләргә һәм ата-аналарга торак, социаль, карьера һәм белем бирү чараларын комплекслы ведомствоара хезмәттәшлеккә интеграцияләү зарур. Шушы көннәрдә генә Владимир Путин яслеләр һәм балалар бакчалары эшен 20:00 гә кадәр озайту турында әйтте. Әлбәттә, идеяләр сездә дә бар – аларны алга алып барасыз, шул исәптән яшьләр парламентында үз вәкилләрегез аша».

Тагын бер мөһим юнәлеш – махсус хәрби операциядә катнашучыларга һәм аларның гаиләләренә ярдәм итү. Шулай ук Татарстанда игълан ителгән Хәрби батырлык һәм хезмәт фидакарьлеге елы кысаларында Фәрит Мөхәммәтшин патриотик тәрбия һәм тарихи хәтерне саклау мәсьәләләренә күбрәк игътибар бирергә киңәш итте.

Фәрит Мөхәммәтшин әйтүенчә, федераль дәрәҗәдә Россия халыклары бердәмлеге елы дип игълан ителгән 2026 елда милләтара бердәмлекне ныгытуга һәм халыкара хезмәттәшлекне үстерүгә аерым игътибар бирү мөһим. «2036 елга кадәр дәүләт милли сәясәте стратегиясе күптөрлелектә бердәмлекне ил үсешенең ышанычлы нигезе дип игълан итә.  Татарстан өчен бу принциплар нигез булып тора», – дип басым ясады Фәрит Мөхәммәтшин.       

Парламент җитәкчесе яшьләр арасында ялган мәгълүматка каршы тору һәм деструктив күренешләрне профилактикалау буенча эш дәвам ителергә тиешлеген билгеләп үтте.

Яшьләр эшләре буенча федераль агентлык җитәкчесе урынбасары Егор Литвиненко республика җитәкчелегенең яшьләр сәясәте өлкәсендәге эшен югары бәяләде. 2026 елга төп максатлар арасында ул цифрлаштыруны атады. «Санап үтелгән барлык юнәлешләр дә мөһим. Шундый юнәлешләрнең берсе –цифрлаштыру, ягъни трансформация һәм цифрлы платформаларга күчү. Цифрлаштыру заманча яшьләр сәясәте өчен төп әһәмияткә ия, чөнки яшьләр белән турыдан-туры хезмәттәшлек итәргә мөмкинлек бирә», – дип белдерде  Егор Литвиненко. 

«Яшьләр белән эшләү Татарстан Фәннәр Академиясенең төп өстенлекләренең берсе булып кала, чөнки республиканың һәм илнең киләчәге нәкъ менә яшьләр кулында, – дип билгеләп үтте ТР Фәннәр академиясе президенты Рифкать Миңнеханов. – ТР Яшьләр министрлыгы белән берлектә без яшьләрнең фән һәм технологияләрне үстерүдә катнашуын киңәйтүгә, галимнәрнең абруен ныгытуга юнәлдерелгән берничә инициативаны гамәлгә ашырабыз». 

Утырыш Дәүләт һәм ведомство бүләкләрен тапшыру белән тәмамланды.