Бүген Дәүләт Советы Рәисе урынбасары Юрий Камалтынов Минзәлә районында эш сәфәрендә булды, анда ул район Советының хисап сессиясендә катнашты. Муниципаль депутатлар узган елгы эшкә йомгак ясадылар, шулай ук киләсе елга планнар турында фикер алыштылар.

Дәүләт Советы Рәисе урынбасарының эш сәфәре герой шагыйрь Муса Җәлил һәйкәленә чәчәкләр салу тантанасыннан башланды. Быел исеме Минзәлә районы тарихы белән тыгыз бәйләнгән герой-шагыйрьнең тууына 120 ел тулу билгеләп үтелә. Муса Җәлил Минзәләдә хәрби-сәяси курсларда укый. Әлеге курслар оештырылган Минзәлә педагогика көллияте хәзер аның исемен йөртә. Педагогика көллиятендә шагыйрьнең мемориаль музее урнашкан.  Шулай ук Муса Җәлил исеме Минзәләдәге урам һәм парк исемнәрендә мәңгеләштерелгән. Ә Җиңүнең 80 еллыгына күпфатирлы йортларның берсендә Муса Җәлил портреты төшерелгән мурал пәйда булган.

Хисап сессиясе район мәдәният йортында узды. Минзәлә районы башлыгы Айдар Сәлахов үз докладында дәүләт программалары һәм илкүләм  проектлар кысаларында башкарыла торган эшләр турында сөйләде, хисап чорында районның социаль-икътисади үсеше нәтиҗәләре белән таныштырды. Айдар Сәлахов махсус операциядә катнашучыларга һәм аларның гаилә әгъзаларына ярдәм итүгә аерым игътибар бирде.

 Югары Тәкермән авыл җирлеге башлыгы Алия Шәрипова авылларда муниципалитетларның илкүләм проектларда, федераль һәм республика программаларында катнашуы нәтиҗәсендә барлыкка килгән уңай үзгәрешләр турында сөйләде. Җирлектә шулай ук районның төп инвесторларының берсе – «Камский Бекон» ҖЧҖ белән дә нәтиҗәле хезмәттәшлек итәләр.

Эре инвестор-агрохолдинглар белән беррәттән, район үсешенә җирле хуҗалыклар да үз өлешен кертә. «Заиковский» ҖЧҖ директоры Салават Фәттахов икътисадый күрсәткечләр, киләчәккә планнар турында сөйләде һәм Әтрәкле җирлегенең социаль тормышында хуҗалыкның ролен билгеләде.

Утырышка Дәүләт Советы Рәисе урынбасары Юрий Камалтынов йомгак ясады. Гомумән алганда, ул район җитәкчелегенең эшен уңай бәяләде. «Иң мөһиме, район башлыгы докладында агымдагы вәзгыять теркәлеп кенә калмыйча, төгәл бурычлар куелды, аларны хәл итү юллары билгеләнде. Бу киләсе елда район шулай ук сыйфатлы рәвештә алга барачагына ышаныч тудыра», – дип билгеләп үтте Юрий Камалтынов.

Юрий Камалтынов ассызыклаганча, авыл хуҗалыгы һәм икътисад индикаторлары буенча Минзәлә районы алда бара, ягъни беренче унлыкка керә. Ә кече һәм урта предприятиеләрнең тулай территориаль продуктка керткән өлеше 37% тәшкил итә, бу республиканыкыннан 1,5 мәртәбә күбрәк.

 Юрий Камалтынов шәхси ярдәмче хуҗалыкларга һәм шәхси хуҗалыкларга ярдәм итү мәсьәләләренә аерым тукталды. Парламент җитәкчесе урынбасары билгеләп үткәнчә, нәкъ менә аягында нык торган һәм үсеш планнары төгәл булган шәхси, гаилә хуҗалыклары яшьләрне авылда калдырырга сәләтле.

Юрий Камалтынов район халкына махсус операциядә катнашучыларга һәм аларның гаилә әгъзаларына ярдәм итүгә керткән өлешләре өчен аерым рәхмәт белдерде, әлеге эшнең республикада өстенлекле булуын билгеләп үтте.

Шул ук вакытта Юрий Камалтынов район өчен эшләрнең сыйфатын күтәрү һәм үстерү өчен резервлар булган юнәлешләрне билгеләде. Аерым алганда, үзебездә җитештерелгән товарлар күләмен арттырырга кирәк. Шулай ук интернет аша район халкыннан социаль өлкә, торак-коммуналь хуҗалык, юллар мәсьәләләре буенча күпсанлы мөрәҗәгатьләр килә. Бер яктан, бу халыкның активлыгы турында сөйли, ә икенче яктан, бу мөрәҗәгатьләргә тизрәк җавап бирергә кирәк.

Утырыш эшендә шулай ук Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев, «КАМАЗ» ГАҖ генераль директорының куркынычсызлык буенча урынбасары Сирень Галиәкбәров, район предприятие һәм оешмалары җитәкчеләре катнашты.

Утырыш бүләкләр тапшыру белән тәмамланды.