Бүген Дәүләт Советы Рәисе Фәрит Мөхәммәтшин шәһәр һәм район мәгариф бүлекләре, тарих һәм җәмгыять белеме укытучыларының методик берләшмәләре җитәкчеләре, 2026 елгы Парламент дәресен оештыруда һәм үткәрүдә катнашучы республика педагоглары белән очрашты. Очрашу республика проекты башланыр алдыннан узды. Быел парламент дәресләре республиканың барлык мәктәпләрендә 16-28 февраль көннәрендә узачак һәм Татарстанда игълан ителгән Хәрби батырлык һәм хезмәт фидакарьлеге елына багышланачак. Дәреснең темасы  «Фидакарь хезмәт һәм хәрби батырлык белән Ватанны данлыйбыз!» дип атала.

Фәрит Мөхәммәтшин Парламент дәресе башланыр алдыннан Дәүләт Советында республиканың педагогик җәмәгатьчелеге белән ел саен уздырыла торган очрашуның күркәм традициягә әйләнүенә игътибар юнәлтте. «Парламент дәресе инде унсигезенче тапкыр республиканың барлык мәктәпләрендә узачак, ә быелдан башлап – һөнәри уку йортларында да уздырыла башлый. Бу Дәүләт Советы, Мәгариф һәм фән министрлыгы һәм Мәгарифне үстерү институтының уртак проекты», – дип искәртте Фәрит Мөхәммәтшин.

Парламент җитәкчесе ел саен составына республика парламенты депутатлары һәм Мәгариф һәм фән министрлыгы вәкилләре кергән эш төркеме тарафыннан билгеләнә торган Парламент дәресе темасын сайлауга аерым тукталды. Фәрит Мөхәммәтшин әйтүенчә, «Фидакарь хезмәт һәм хәрби батырлык белән Ватанны данлыйбыз!» темасы Республика Рәисе Рөстәм Миңнеханов игълан иткән Хәрби батырлык һәм хезмәт фидакарьлеге елының төп аспектларын чагылдыра.

«Махсус хәрби операция уздырылган катлаулы шартларында ил мәнфәгатьләрен яклаучы хәрбиләргә һәрьяклап ярдәм итүгә аерым игътибар бирәбез, – дип басым ясады Фәрит Мөхәммәтшин. – Бу җәһәттән республикада барлык дәрәҗәләрдә, шул исәптән закон чыгару ягыннан да, сәяси партияләр, иҗтимагый оешмалар һәм волонтерлар тарафыннан да күп эш башкарыла. Сүз уңаеннан, бүген шефлыкка алынган Лисичанск һәм Рубежное шәһәрләренә «Бердәм Россия» партиясе эгидасы астында җыелган, гомуми авырлыгы йөз тоннага якын булган чираттагы гуманитар йөк җибәрәбез».

Фәрит Мөхәммәтшин билгеләп үткәнчә, бүген Татарстанда ике шәһәр – Казан һәм Яшел Үзән «Хезмәт батырлыгы шәһәре» исемен йөртә. Әлеге мактаулы исемне тагын дүрт шәһәргә – Кукмара, Чистай, Алабуга һәм Бөгелмәгә бирү буенча эш алып барыла. Республиканың «Хезмәт батырлыгы предприятиесе» исеменә Татарстанның 27 предприятиесе лаек булды.

 «Хәрби батырлык һәм хезмәт фидакарьлеге – ул безнең күпмилләтле халкыбызны, 175 милләт вәкиле тату һәм дус яшәгән республиканы һәрвакыт берләштергән һәм берләштерә торган  әйбер. Ил Президенты Владимир Путин тарафыннан 2036 елга кадәр Дәүләт милли сәясәтенең яңа стратегиясе расланды, анда Россиянең күпмилләтле бердәмлеге һәм этномәдәни күптөрлелеге мөһимлеге ассызыклана, – дип билгеләп үтте Фәрит Мөхәммәтшин. – Сез, хөрмәтле укытучылар, махсус миссия башкарасыз. Көндәлек хезмәтегез белән үз белемегезне үсеп килүче буынга тапшырып, сез Татарстанның киләчәгенә нигез саласыз. Нәкъ менә гаиләдә һәм мәктәптә чын патриотизм нигезләре салына».

Фәрит Мөхәммәтшин әйтүенчә, бүген төп бурыч – яшьләргә чын гражданнар, үз иленең патриотлары булып үсү өчен шартлар тудыру. Биредә Дәүләт Советы Рәисе мәгариф учреждениеләренең махсус хәрби операциядә катнашучылар һәм волонтерлар белән бергәләп эшләвенә игътибар итәргә тәкъдим итте.

Фәрит Мөхәммәтшин сүзләренә караганда, укучыларның һәм яшьләрнең ялын оештыру аерым игътибар таләп итә. «Патриотик, хезмәт тәрбиясе, парламент дәресләре, укудан тыш эшчәнлек, яшьләр оешмалары, «Беренчеләр хәрәкәте» белән хезмәттәшлек аша яшь буынга иҗади төсмер бирергә кирәк, – дип басым ясады Фәрит Мөхәммәтшин. – Һәм бу бурыч – лаеклы, законнарны үтәүче гражданинны үстерү – профильле министрлыкка гына карамый, бәлки  ата-аналар, педагогик бергәлек, хакимият органнары, сезнең белән безнең алда да тора».

Чыгышы ахырында парламент җитәкчесе семинарда һәм проектта катнашучыларга – депутатларга, ТР Мәгариф һәм фән министрлыгына, Мәгарифне үстерү институтына, педагогларга һәм мәктәп укучыларына кызыклы, эчтәлекле һәм илһамландыргыч эшләр теләде. «Буыннар диалогы, иң актуаль һәм мөһим нәрсәләр турында сөйләшү нәтиҗәле һәм эчтәлекле булсын»,  – дип йомгаклады сүзен Фәрит Мөхәммәтшин.

Бүген көннең беренче яртысында Дәүләт Советында тарих һәм җәмгыять белеме укытучыларының методик берләшмәләре җитәкчеләре өчен семинар узды, анда 2026 елның Парламент дәресенә старт бирелде.

Парламент дәресе – ТР Дәүләт Советының, ТР Мәгариф һәм фән министрлыгының, Мәгарифне үстерү институтының сәяси-хокукый культураны һәм укучыларның актив гражданлык позициясен формалаштыруга ярдәм итүче уртак проекты 2009 елдан бирле уңышлы гамәлгә ашырыла, быел инде унсигезенче мәртәбә уздырылачак.

Быел парламент дәресләре республиканың барлык мәктәпләрендә һәм урта һөнәри учреждениеләрендә 16-28 февраль көннәрендә узачак һәм Татарстанда игълан ителгән Хәрби батырлык һәм хезмәт фидакарьлеге елына багышлана.  Дәреснең темасы – «Фидакарь хезмәт һәм хәрби батырлык белән Ватанны данлыйбыз!».

Парламент дәресе кысаларында 2026 елның 2 февраленнән 31 мартына кадәр укучыларның иҗади эшләре (балалар рәсемнәре, иншалар, эсселар, видеороликлар, мәктәп проектлары һәм тикшеренү эшләре) һәм педагогларның методик эшләнмәләре конкурслары уза. Һәр конкурсны уздыру турындагы нигезләмәләр Татарстан Республикасы Мәгариф һәм фән министрлыгы боерыгы белән расланган. Конкурсларга йомгак, гадәттәгечә апрельдә, Россия парламентаризмы көне алдыннан ясала,  бүләкләү тантанасы парламентта  уза.