Алтынчы чакырылыш Дәүләт Советының тугызынчы утырышы 23 апрельдә видеоэлемтә рәвешендәге үткәреләчәк.  Бу хакта карар бүген парламент Президиумы утырышында кабул ителде.

«Безнең очрашу традицион булмаган форматта уза, - дип билгеләп үтте Дәүләт Советы Рәисе Фәрит Мөхәммәтшин, Президиум утырышын ачып, - начар эпидемиологик вәзгыятькә һәм коронавирус инфекциясе таралуга каршы чаралар күрүгә бәйле рәвештә, республикада югары әзерлек режимы кертелде, махсус чикләүләр куелды".

 Дәүләт Советы Рәисе Фәрит Мөхәммәтшин билгеләп үткәнчә, эпидемиологик хәлнең кискен булуына карамастан, Дәүләт Советы, яңа эш тәртибенә күчеп, эшчәнлеген дәвам итә.  Массакүләм чаралар кичектерелә, депутатлар һәм Аппарат хезмәткәрләренең бер өлеше өйдән торып эшли. Гражданнарны кабул итү дә интернет аша гына алып барыла. “Парламент тарихында тәүге шундый эш тәҗрибәсе бу, – дип басым ясап әйтте Фәрит Мөхәммәтшин. – Илнең кайбер төбәкләрендәге законнар чыгару җыеннары да, үз Регламентларына үзгәрешләр кертеп, шулайрак эшли”.

Заманча коммуникацияләрнең мөмкинлекләре парламентка закон чыгару эшен дәвам итәргә мөмкинлек бирә, дип саный Дәүләт Советы Рәисе. Яңа формат комитетлар утырышларын үткәргәндә сыналды һәм үзенең нәтиҗәлелеген һәм куркынычсызлыгын күрсәтте.

Фәрит Мөхәммәтшин билгеләп үткәнчә, республика хакимиятенең барлык дәрәҗәләрендә инфекция таралуга каршы системалы эш алып барыла. Оператив штаб эшли. Татарстан Президенты Рөстәм Миңнеханов вәзгыятьне шәхси контрольдә тота. Сәяси партияләр һәм иҗтимагый оешмаларның актив катнашында волонтерлык хәрәкәте, мөмкинлекләре чикләнгән өлкәннәргә һәм кешеләргә адреслы ярдәм күрсәтү оештырылды. "Кешеләр моңа уңай карый, бу игелекле эшкә республика парламенты депутатлары, шулай ук урыннардагы хакимият актив кушылды", – диде республика парламенты җитәкчесе һәм барлык битараф булмаган татарстанлыларга рәхмәт белдерде.

Дәүләт Советы Секретаре Лилия Маврина билгеләп үткәнчә, Дәүләт Советының тугызынчы утырышы, видеоэлемтә режимында, махсус җиһазланылган алты залдан торып үткәреләчәк (Дәүләт Советы һәм Министрлар Кабинеты утырышлары заллары, Мәдәният министрлыгы конференц-залы, Казан шәһәре мэриясенең Зур залы, Чаллы шәһәре һәм Әлмәт районы башкарма комитетларының видеоконференцэлемтә заллары). Һәр залга күп дигәндә 20 депутат җыелачак.

Кайбер заллар электрон тавыш бирү системасы белән тәэмин ителмәгәнлектән, Дәүләт Советы Президиумы электрон системадан файдаланмыйча гына, ачык тавыш бирүне оештырырга тәкъдим итте. Шуңа күрә һәр залда хисап комиссиясе эшләячәк. Әлеге комиссия әгъзалары, һәркайсы үз мәйданчыгындагы тавышларны исәпләп, бу мәгълүматны хисап комиссиясе җитәкчесенә тапшырачак.

Тугызынчы утырышның көн тәртибенә комитетлар тәкъдиме белән 27 мәсьәлә кертелә. Депутатлар  Татарстан Республикасы башкарма хакимияте органнарының узган елдагы эшчәнлеге турында хисапны (Премьер-министр Алексей Песошин чыгышы) һәм мәдәният, сәламәтлек саклау, мәгариф, социаль хезмәт күрсәтү өлкәләрендәге оешмаларның эш сыйфатын бәйсез бәяләү нәтиҗәләре турында хисапны (Премьер-министры урынбасары Ләйлә Фазлыева чыгышы) тыңлаячак. Моннан тыш утырышның көн тәртибенә Хисап палатасының узган елдагы эшчәнлеге турында хисап кертелгән.

Дәүләт Советы утырышында республиканың сигез законы проекты каралачак. Шуның алтысы – беренче укылышта. Алар арасыннан – 2020 елга һәм планда каралган 2021, 2022 еллар чорына Татарстан Республикасы Мәҗбүри медицина иминиятләштерүе территориаль фонды бюджеты турында республика законының 7 статьясына үзгәреш кертү хакында (Фонд запасын медицина оешмаларына гадәттән тыш хәлләрдә яки чир таралу куркынычы килеп чыгу сәбәпле алынмый калган керемнәрен компенсацияләүгә җибәрү мөмкинлеген күздә тота), халыкны һәм территорияләрне гадәттән тыш хәлләрдән яклау турында» Татарстан Республикасы Законының 3 статьясына үзгәрешләр кертү хакында закон проектлары бар.

Икенче укылышка сәнәгать сәясәте турында республиканың 6 һәм 11 статьяларына һәм җир асты байлыклары турында республика законына үзгәрешләр кертү хакында закон проектлары әзерләнгән.

Утырышта Дәүләт Советы Регламентына үзгәрешләр каралачак. Регламент «Дәүләт Советының югары әзерлек режимы, гадәттән тыш хәл режимы, чикләү чаралары (карантин), гадәттән тыш яки хәрби хәл чорында эш үзенчәлекләре» бүлеге белән тулыландырыла.

Лилия Маврина әйтүенчә, республикада халыкның санитария-эпидемиологик иминлеген тәэмин итүгә юнәлдерелгән чикләү чаралары кертелү сәбәпле, утырышка чакырылучылар саны 25 кешедән артмаячак – аларга видеоэлемтәгә кушылу мөмкинлеге биреләчәк.  Традиция буенча Дәүләт Советы сайтында һәм радио аша турыдан-туры трансляция алып барылачак ".

Президиум утырышында башка мәсьәләләр дә каралды.