Коронавирус инфекциясе (COVID-19) таралу нәтиҗәләрен булдырмауга һәм бетерүгә юнәлдерелгән таләпләрне үтәмәгән өчен граждан өчен беренче беркетмәне рәсмиләштергәндә штраф бердән алып дүрт мең сумга кадәр тәшкил итәчәк,  әлеге кагыйдәне  кабат бозган очракта – биш мең сум. Вазыйфаи һәм юридик затлар өчен штраф күләме берничә тапкыр югарырак. Бүген Законлылык һәм хокук тәртибе комитеты утырышында Административ хокук бозулар турында кодекска тиешле үзгәрешләр каралды.

Закон проекты тарафыннан Татарстан Республикасында яңа коронавирус инфекциясен (COVID-19) кисәтүгә һәм аның таралыш нәтиҗәләрен бетерүгә  юнәлдерелгән норматив хокукый актлар таләпләрен үтәмәгән өчен административ җаваплылык кертү карала.

Мондый таләпләрне үтәмәү, яңа коронавирус инфекциясенең киң таралышына китерергә һәм күп сандагы гражданнарның сәламәтлекләренә зыян салуга, шулай ук аларның үлеменә китерергә мөмкин булганлыктан,  җәмәгатьчелеккә зур куркыныч тудыра. Моңа бәйле рәвештә штрафларны түбәндәге күләмнәрдә билгеләү тәкъдим ителә – гражданнарга бер мең сумнан дүрт мең сумга кадәр; вазыйфаи затларга – унбиш мең сумнан кырык мең сумга кадәр; юридик затларга – ике йөз мең сумнан  өч йөз мең сумга кадәр.

Шундый ук гамәлләр кабат кылынганда: гражданнарга – биш мең сум; вазыйфаи затларга – кырык мең сумнан илле мең сумга кадәр; юридик затларга – өч йөз мең сумнан  биш йөз мең сумга кадәр административ штраф каралган.

Административ хокук бозулар турында беркетмәләр төзүне җирле үзидарә органнарына йөкләү күздә тотыла. "Татарстан Республикасында төп бурычлары иҗтимагый тәртипне һәм иҗтимагый иминлекне саклауны тәэмин итүгә булышу булган тәртип саклау иҗтимагый пунктлары системасы нәтиҗәле эшли, дип басым ясады  республиканың юстиция министры Рөстәм Заһидуллин, закон проектын тәкъдим итеп, – Тәртип саклау иҗтимагый пунктларында катнашучылар составына җирле үзидарә органнарының закон тәртибендә билгеләнгән нигездә административ хокук бозулар турында беркетмәләр төзү вәкаләтенә ия булган вазыйфаи затлары да кертелгән".

Административ хокук бозулар турында РФ кодексының 20.61 статьясы нигезендә җаваплылык бары тик гадәттән тыш хәлләрдә яки аның килеп чыгу куркынычы булганда үз-үзеңне тоту кагыйдәләренә караган норматив хокукый актларны үтәмәгән өчен генә күздә тотыла. 

Законны кабул итү Татарстан Республикасының бөтен территориясендә коронавирус инфекциясенең таралышына ярдәм итүче хокук бозуларны кисәтү буенча федераль органнарны, региональ органнарны, шулай ук җирле үзидарә органнарын үз эченә алган тулы бер система төзергә мөмкинлек бирәчәк һәм коронавирус инфекциясенә каршы көрәш буенча чараларның нәтиҗәлелеген күтәрүгә, аның Татарстан Республикасы территориясендә киң таралышына юл куймауга, халыкның тормышы һәм сәламәтлеге өчен куркыныч белән бәйле рискларны киметүгә китерәчәк.

Комитет рәисе Шакир Яһудин хезмәттәшләренә закон проектына уңай нәтиҗәләр алынуы турында хәбәр итте.

Профильле комитет әлеге мәсьәләләрне Дәүләт Советы утырышының көн тәртибенә кертергә һәм закон проектын берьюлы өч укуда карарга киңәш итте. Закон проекты рәсми басылып чыккан көненнән үз көченә керә.

Бүген комитет утырышында «Татарстан Республикасы җәмәгать судьялары турында» Татарстан Республикасы Законының 9 статьясына үзгәреш кертү хакында» Татарстан Республикасы закон турында да фикер алыштылар.

Документ җәмәгать судьясы аппаратының кадрлар составын формалаштыру дәүләт граждан хезмәте турындагы законнарда каралган тәртиптә конкурс нигезендә дә, шулайук конкурс уздырып тормыйча да керүне күздә тота.  Хәзерге вакытта, республиканың юстиция министры Рөстәм Заһидуллин билгеләп үткәнчә, бары тик конкурс процедурасы гына каралган, хәтта хезмәткәр вакытлыча, мәсәлән, декрет ялына киткән хезмәткәрне алыштыру чорына гына килсә дә конкурс процедурасын узу кирәк.

«Россия Федерациясендә дәүләт граждан хезмәте турында» Федераль законның 25 статьясы сроклы эш контрактларын төзү очракларын билгели. Аерым алганда, сроклы эш контракты аның артында граждан хезмәте вазыйфасы саклана торган граждан хезмәткәре булмаган чакта аны алыштырып торганда төзелә (мисалга, авырлы булу һәм бала табу алдыннан яки бала тапканнан соң алынган отпуск).

Моннан тыш, «Россия Федерациясендә дәүләт граждан хезмәте турында» Федераль законның 22 статьясының 4 өлеше эш бирүчегә граждан хезмәте вазыйфаларының кече төркеменә караган граждан хезмәте вазыйфасына билгеләгәндә конкурс уздырмау хокукын бирә.

Моңа бәйле рәвештә «Татарстан Республикасы җәмәгать судьялары турында» Татарстан Республикасы Законының 9 статьяның 41 пунктында «конкурс нигезендә» сүзләрен төшереп калдыру тәкъдим ителә.

Закон проекты Дәүләт Советының якындагы утырышында беренче укылышта каралачак.