Татарстан Республикасы Җир кодексының 8 статьясына үзгәрешләр кертү турында закон проекты бүген Дәүләт Советы утырышында беренче укылышта һәм тулаем кабул ителде. Закон авыл хуҗалыгы җирләрен башка категориягә күчерүнең яңа тәртибен билгели.

Закон проектын тәкъдим итеп, ТР җир һәм мөлкәт мөнәсәбәтләре министры Фәнил Әһлиуллин билгеләп үткәнчә, федераль законга кертелгән үзгәрешләр буенча авыл хуҗалыгы җирләрен башка категориягә күчерүнең яңа тәртибе 2026 елның 1 мартыннан кертелә.

Министр сүзләренә караганда, авыл хуҗалыгы билгеләнешендәге җирләрне күчерү тәртибе алты адымны үз эченә ала. Башкарма орган күчерү турындагы үтенечне карый. Әгәр каршылыклар булмаса, тәкъдим субъектның иң югары вазыйфаи затына җибәрелә.  Югары вазыйфаи зат инициативаны закон чыгару органына тапшыра. Федераль хезмәт Авыл хуҗалыгы җирләрен күчерүне 20 көн эчендә килештерә.  Парламент җирләрне күчерү турында канун кабул итә.  Төбәкнең вәкаләтле органы күчерү турында акт чыгара.

Закон проекты белән Татарстан Республикасы Җир кодексының 8 статьясына төзәтмәләр кертелә, анда республика милкендәге җирләрне, яисә андый җирләр составындагы җир кишәрлекләрен, авыл хуҗалыгы җирләреннән тыш, бер категориядән икенче категориягә күчерү Татарстан Республикасы Министрлар Кабинеты тарафыннан гамәлгә ашырыла дип билгеләнә. Авыл хуҗалыгы җирләрен күчерү турында актны кабул итү вәкаләте вәкаләтле органга - Татарстан Республикасы Җир һәм мөлкәт мөнәсәбәтләре министрлыгына тапшырыла.

Документ нигезендә, авыл хуҗалыгы җирләрен күчерү турында республика законы проекты Татарстан Республикасы Рәисенә авыл хуҗалыгы җирләрен саклау һәм алардан файдалану белән шөгыльләнүче федераль ведомство белән килештерү өчен Дәүләт Советына кертү белән бер үк вакытта җибәрелә. 

Әлеге мәсьәлә буенча фикер алышу вакытында ТР Дәүләт Советында КПРФ фракциясе җитәкчесе Хафиз Миргалимов министрдан республикада авыл хуҗалыгы билгеләнешендәге эшсез җир кишәрлекләренең күпме булуы белән кызыксынды. Фәнил Әһлиуллин билгеләп үткәнчә, бу исәпкә Россельхознадзор һәм җирле үзидарә органнары керә. Ул искәрткәнчә, бу ведомстволар җир контроле үткәрә ала. Аларның нәтиҗәләре буенча ваемсыз җир биләүчеләрне җәзага тартырга мөмкиннәр, иң соңгы очракта кишәрлекләрне тартып алырга мөмкин.

"Җирнең эшләве кирәк, – диде Хафиз Миргалимов. - Бездә Россельхознадзорның Татарстан Республикасы буенча идарәсе бар, ул Җир һәм муниципаль контроль үткәрергә тиеш"»

Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев билгеләп үткәнчә, республикада 35 000 гектар эшсез җир кишәрлекләре исәпләнә.

“Хуҗасыз җирләр булырга тиеш түгел", – дип басым ясады Фәрит Мөхәммәтшин фикер алышуга йомгак ясап.