Бүген Казанда, иҗтимагый ярдәм штабы базасында, ике сәгать дәвамында (16:00 дән 18:00 гә кадәр) «Хатын-кыз игътибары» «Буллингка каршы бергә» кайнар линиясе эшләде, аны уздыру инициативасы белән Татарстан Республикасында Бала хокуклары буенча вәкаләтле вәкил һәм  Дәүләт Советының «Мәрхәмәт – Милосердие» хатын-кыз депутатлар берләшмәсе әгъзалары чыккан иде. Республика халкының мөрәҗәгатьләренә Дәүләт Советы Секретаре Лилия Маврина, «Мәрхәмәт-Милосердие» берләшмәсе җитәкчесе Алсу Нәбиева, парламент депутатлары Ольга Воронова, Алсу Надршина, Елена Кузьмичева, Рузилә Тимергалиева, Ләлә Кудермәтова, ТРда Бала хокуклары буенча вәкил Светлана Захарова җавап бирде.

«Бүген без Татарстан Республикасында Бала хокуклары буенча вәкаләтле вәкил белән берлектә кайнар линия оештырабыз, чөнки буллинг проблемасы иң кискен проблемаларның берсе булып тора һәм балаларны балалар бакчаларына урнаштыру мәсьәләләреннән соң икенче урында тора, – дип билгеләп үтте Алсу Нәбиева. – Без балаларыбызны һәм аларның гаиләләрен эзәрлекләүнең никадәр җитди куркыныч булуын аңлыйбыз».

Алсу Нәбиева белгечләрнең виртуаль мохиттә балаларны көчләүнең үзенчәлекле формасы булган цифрлы буллинг очракларына кагылышлы мөрәҗәгатьләрне каравы хакында сөйләде.

«Безнең максат – гражданнардан максималь күләмдә мөрәҗәгатьләр җыю, Бала хокуклары буенча вәкаләтле вәкил белән берлектә вәзгыятьне анализлау һәм һәр мөрәҗәгать буенча конкрет чаралар күрү, шул исәптән мәгариф учреждениеләрендә күчмә тикшерүләрне дә кертеп», — дип аңлатты Алсу Нәбиева.

Татарстан Республикасында Бала хокуклары буенча вәкаләтле вәкил Светлана Захарова әйтүенчә, ведомство аппараты көн саен балалардан да, укучыларны җәберләү очраклары һәм укучыларның шәхесара низаглары аркасында борчылган ата-аналардан да күп санлы мөрәҗәгатьләр ала.

«Татарстан Республикасының һәм бөтен Россия Федерациясенең мәгариф системасында барган соңгы вакыйгалар безне профилактика чаралары турында уйланырга мәҗбүр итте. Нәкъ менә шуңа күрә беренче чиратта эзәрлекләү һәм мәктәп конфликтлары ситуацияләрен булдырмауга юнәлдерелгән бу «Кайнар линия» оештырылды. Эшкә психологлар һәм Бала хокуклары буенча вәкаләтле вәкилләр җәлеп ителә, алар хәтта турыдан-туры мәктәптә дә оператив җавап бирергә сәләтле», – дип шәрехләде Светлана Захарова.

Ул ачыклык керткәнчә, Бала хокуклары буенча вәкаләтле вәкилгә килгән һәр мөрәҗәгать ТР Мәгариф министрлыгы вәкилләре белән берлектә карала. Кирәк булган саен белгечләр мәктәпләргә бара, конфликт шартларын җентекләп өйрәнә һәм килеп туган проблемаларны хәл итүне тәэмин итә торган киләчәк гамәлләр планын төзи.

Светлана Захарова мисал да китерде.  «Безгә авыр рухи кризис хәлендә булган кыздан, хәтта үз-үзенә кул салу теләге дә булган, хәбәр килде. Мөрәҗәгать Мәскәү өлкәсенең ышаныч телефоны хезмәте аша килгән. Без кичекмәстән чаралар күрдек, бала белән элемтәгә кердек, һәм бүген кыз кирәкле психологик ярдәм уза».

Кайнар линиягә кергән барлык мөрәҗәгатьләрне Бала хокуклары буенча вәкаләтле вәкил аппараты хезмәткәрләре һәм Дәүләт Советы депутатлары эшкә алды.