Бүген Казан медицина көллиятендә Бөек Ватан сугышында Җиңүнең 81 еллыгын бәйрәм итүгә багышланган тантаналы чара узды. Сәламәтлек саклау тармагы ветераннарын хөрмәтләү тантанасында Дәүләт Советының Социаль сәясәт комитеты рәисе Алексей Созинов һәм республиканың сәламәтлек саклау министры Альмир Абашев катнашты.

Алексей Созинов республика Рәисе Рөстәм Миңнеханов исеменнән котлау сүзләрен ирештерде, шулай ук Җиңү көне алдыннан мондый очрашуларның инде күркәм традициягә әверелүен билгеләп үтте. «Әгәр бу җиңү булмаса, сезнең белән безнең бүгенгебез һәм киләчәгебез булмас иде. Кызганычка каршы, безнең фронтта булганнарның  кулын кысу мөмкинлегебез юк. Бөтен республикага алар нибары 92 кеше калган,  – дип билгеләп үтте Алексей Созинов.  – Бүген тыл ветераннарына, сугыш чоры балаларына, шулай ук 1945 елдан соң булган сугыш хәрәкәтләрендә катнашучыларга аерым рәхмәт. Махсус хәрби операциядә катнашучыларга рәхмәт, без аларга хәзер халкыбызның Җиңү көне булачагына һәм тагын бер Җиңү көне булачагына өмет һәм ышаныч белән карыйбыз».

Ветераннарны котлап, Альмир Абашев сугыш елларында йөзләрчә мең татарстанлының фронтка китүен, меңнәрчә табиб һәм дистәләгән мең медицина хезмәткәренең фронтларда һәм хәрби госпитальләрдә хезмәт итүен билгеләп үтте. «ТАССР территориясендә 400 меңнән артык хәрби хезмәткәр медицина оешмалары тарафыннан дәваланган һәм аларның күбесе сафка кайткан. Бу совет халкының зур хезмәте һәм батырлыгы»,  – дип басым ясады министр.

Сәламәтлек саклау тармагы ветераннары өчен медицина көллияте студентлары бәйрәм концерты оештырды. Шулай ук мактаулы юбилярларны Татарстан Республикасы Сәламәтлек саклау министрлыгының Рәхмәт хатлары белән бүләкләү тантанасы булды.