Бүген Яшел Үзән шәһәрендә узган Торак сәясәте һәм инфраструктура үсеше комитеты һәм комитет каршындагы Эксперт советының уртак утырышында иҗтимагый киңлекләрне төзекләндерү, шулай ук «Безнең ишегалды» республика программасын гамәлгә ашыру хакында фикер алыштылар. Парламентарийлар күчмә утырыш кысаларында шулай ук «Безнең ишегалды» программасы буенча төзекләндерелгән ишегалларын карадылар, шәһәр халкы белән аралаштылар.

Депутатлар Яшел Үзәнгә эш сәфәре кысаларында беренче булып төзекләндерелгән «Каенлык» паркында булды. Аның территориясендә балалар мәйданчыгы, пикник өчен зоналар, спорт һәм күзәтү мәйданчыклары, шулай ук Сабантуй уздыру өчен махсус мәйдан булдырылган. Территорияне төзекләндерү эшләре берничә этапта барган, гомуми финанслау 129 млн сумнан артык тәшкил иткән.   Паркның гомуми мәйданы 17 га, шушында ук  «Яшел Үзән» торак комплексы төзелә башлаган.

Бүген парламентарийлар Комаров урамындагы «Безнең ишегалды» программасы буенча төзекләндерелгән ишегалды территорияләрен карадылар. Бу йортларда яшәүчеләр иң күп мөрәҗәгатьләр калдырган булган.  Яшел Үзән районында 2026 елга «Безнең ишегалды» программасына 64 ишегалды кергән. «Безнең ишегалды» республика программасын гамәлгә ашыра башлаганнан бирле район территориясендә 2 млрд сумга диярлек 431 ишегалды ремонтланган инде, – дип сөйләде Яшел Үзән районы башкарма комитеты җитәкчесе урынбасары Динар Нигъмәтуллин. – Быел 60 тан артык ишегалды территориясендә эшләр башкарылачак. Шуларның 80-90% – юлларга, парковка зоналарына һәм тротуарларга асфальт салу эшләре.  Алга таба да халык нәрсә эшләргә кирәклеген үзләре сайлый – өстәмә яктырту, балалар мәйданчыклары, кече архитектура формалары».

«Порт» Яшьләр үзәгендә узган утырышны ачып, Торак сәясәте һәм инфраструктура үсеше комитеты рәисе Андрей Егоров, күчмә утырыш кысаларында комитет тарафыннан карала торган мәсьәләләр, шул исәптән ТР Рәисенең Дәүләт Советына Юлламасын үтәү белән бәйле, дип билгеләп үтте. Моннан тыш, әлеге программаларны гамәлгә ашыру турында фикер алышу 4 июньдә Дәүләт Советы Президиумы утырышында дәвам итәчәк. «Яшел Үзән –җәмәгать киңлекләрен төзекләндерү программасын нәтиҗәле гамәлгә ашыруның иң ачык мисалларының берсе, – дип билгеләп үтте Андрей Егоров. – Без район җитәкчелеге, архитекторлар һәм яшелүзәнлеләрнең күпме көч куюларын күрәбез. Шундый бердәм эш нәтиҗәсендә Яшел Үзән берничә мәртәбә уңайлы шәһәр мохитен булдыруның иң яхшы проектлары белән Бөтенроссия конкурсында җиңүче булды. Бүген күргән барлык объектлар да лаеклы дәрәҗәдә башкарылган. Халык өчен уңайлы яшәү шартлары тудыру республика өчен дә, муниципалитетлар өчен дә өстенлекле бурыч булып тора. Теләсә нинди иҗтимагый киңлек – ул инфраструктура гына түгел, ә барыннан да элек кешеләрнең үзара хезмәттәшлеге өчен мохит. Шуңа күрә әлеге мәсьәләләр югары социаль әһәмияткә ия».

Иҗтимагый киңлекләрне төзекләндерү программаларын гамәлгә ашыруның барышы турында «Татарстан Республикасы шәһәрләрен үстерү институты» фонды проектларын гамәлгә ашыру буенча директор урынбасары Айназ Ярмиев сөйләде.  Республикада программа 2015 елда эшли башлаган иде, ул вакытта паркларны һәм скверларны киң колачлы яңарту башланды. 2015 елдан 2025 елга кадәр Татарстанда 450 җәмәгать урыны төзекләндерелгән.

«Безнең ишегалды» республика программасын гамәлгә ашыру турында ТР Төзелеш, архитектура һәм торак-коммуналь хуҗалык министрының беренче урынбасары Дамир Шәйдуллин сөйләде. «Безнең ишегалды» программасы Татарстанда 2020 елдан республика Рәисе Рөстәм Миңнеханов инициативасы белән гамәлгә ашырыла. 2025 ел ахырына  54 млрд сум (республика бюджетыннан) төшереп 5851 ишегалды территориясе төзекләндерелгән. 2026 елда 560 ишегалды территориясен төзекләндерү планлаштырыла, 2027 елда – 234 ишегалды. «Программа кысаларында билгеле бер эшләр исемлеге башкарыла – юлларны һәм тротуарларны ремонтлау яисә төзү, яктырту баганаларын урнаштыру яисә яңарту, балалар һәм спорт өчен куркынычсыз җиһазлар, эскәмияләр һәм чүп савытлары урнаштыру, каты коммуналь калдыклар өчен мәйданчыклар әзерләү һәм хуҗалык-көнкүреш җиһазлары урнаштыру. Ишегалдын программага кертү өчен төп критерий булып түшәлгән асфальтның канәгатьләнерлек булмавы тора», – дип сөйләде Дамир Шәйдуллин.

Министр урынбасары билгеләп үткәнчә, 5 ел эчендә республиканың 32 муниципаль районында ишегалды территорияләрен төзекләндерү тулысынча төгәлләнгән. Быел юл һәм төзелеш эшләре Чаллы шәһәрендә, шулай ук сигез муниципаль районда алып барыла. 2027 елда Казан шәһәрендә һәм Түбән Кама, Яшел Үзән һәм Лениногорск районнарында төзекләндерү эшләрен төгәлләү планлаштырыла. «Ишегалды территорияләре идарәче компанияләр тарафыннан каралганлыктан, аларны төзекләндерүгә гражданнарның үзләрен актив җәлеп итмичә мөмкин түгел. Алты ел эчендә проектка 1 млн 650 меңнән артык кеше җәлеп ителгән, – диде Дамир Шәйдуллин. – Ачыктан-ачык фикер алышулар һәм проектларны халык белән килештерү барышында милекчеләрнең гомуми җыелышларының 10814 беркетмәсе төзелгән. Төзекләндерү планлаштырылган һәр ишегалдында халык белән очрашулар булды, анда киләчәктә ишегалды территорияләрен яхшырту схемалары төзелде һәм расланды».