Бүген Татарстан Сайлау кодексына, шулай ук «Татарстан Республикасы Референдумы турында» һәм «Җирле референдум турында» законнарга үзгәрешләр кертелә торган закон проекты беренче укылышта һәм тулаем кабул ителде. Документ аларны федераль законнарга туры китерү максатыннан эшләнгән.

Дәүләт корылышы һәм җирле үзидарә комитеты рәисе Альберт Хәбибуллин әйтүенчә, закон белән үзгәрешләр кертелгән, алар нигезендә муниципаль районның, шәһәр округының җирле администрациясе башлыгының сайлаучылар, референдумда катнашучылар турында белешмәләрне булдыру һәм төгәлләштерү буенча бурычы төшереп калдырыла. Әлеге белешмәләр сайлаучыларны, референдумда катнашучыларны теркәүнең дәүләт системасыннан – сайлаучылар, референдумда катнашучылар турында белешмәләр булган үзәкләштерелгән мәгълүмат ресурсыннан (Сайлаучылар, референдумда катнашучылар регистры) файдаланып төзеләчәк, ул реаль вакыт режимында төгәлләштерелә.

Закон шулай ук тавыш бирү йомгаклары турында беркетмәләрне һәм җыелма таблицаларны электрон рәвештә төзү мөмкинлеген дә беркетә. Шул ук вакытта тавыш бирү йомгаклары турындагы беркетмәләрне һәм җыелма таблицаларны кәгазь чыганакларда рәсмиләштерү процедурасы саклана.