Бүген Дәүләт Советы утырышында 2025 елда Территориаль мәҗбүри медицина иминияте фонды бюджеты үтәлеше турында закон проекты беренче укылышта һәм тулаем кабул ителде. Документны учреждение директоры Алсу Мифтахова тәкъдим итте.

Фонд җитәкчесе сүзләренә караганда, Татарстан Республикасы Территориаль мәҗбүри медицина иминияте фонды бюджеты 2025 елда керемнәр буенча 93,2 млрд сум, чыгымнар буенча 92,6 млрд сум тәшкил иткән. Федераль мәҗбүри медицина иминияте фонды бюджетыннан бюджетара трансфертлар 80,9 млрд сум тәшкил иткән, шул исәптән Территориаль мәҗбүри медицина иминияте программасын гамәлгә ашыруга субвенция – 80,9 млрд сум. Табиблар һәм урта медицина персоналы хезмәтенә түләү чыгымнарын финанслаштыруга бюджетара трансфертлар 203,6 млн сум тәшкил иткән.

Россия Федерациясенең Территориаль мәҗбүри медицина иминияте фондларыннан республиканың медицина оешмалары тарафыннан башка субъектларда яшәүчеләргә күрсәтелгән медицина ярдәме өчен Фонд бюджетына 1,1 млрд сум кергән, салым һәм салым булмаган керемнәр 170,3 млн сум тәшкил иткән.

Фонд чыгымнары турында сөйләгәндә, Алсу Мифтахова билгеләп үткәнчә, фонд бюджеты чыгымнары 92,6 млрд сум тәшкил иткән. «Чыгымнар «Гаилә», «Озын һәм актив тормыш», «Сәламәтлекне саклауның яңа технологияләре» илкүләм проектлары максатларына туры китерелде. Гомумән алганда, гражданнарга түләүсез медицина ярдәме күрсәтүнең дәүләт гарантияләре программасын гамәлгә ашыруга Татарстан Республикасы территориясендә 89,7 млрд сум юнәлдерелгән. Ел дәвамында республиканың медицина оешмаларына мәҗбүри медицина иминияте программасы буенча 3 миллионнан артык кеше мөрәҗәгать иткән, шуларның 88 меңе – Россия Федерациясенең башка субъектларында яшәүчеләр».

Бюджет, салымнар һәм финанс комитеты рәисе урынбасары Камил Ногаев профильле комитет карарын тәкъдим итте. «Комитет билгеләп үткәнчә, закон проекты һәм аңа материаллар тулы күләмдә Татарстан Республикасы Бюджет кодексы нигезендә тапшырылган. Фонд бюджеты планлаштырылган параметрларда 2024 ел ахырында кабул ителгән һәм 2025 ел дәвамында төгәлләштерелгән Территориаль мәҗбүри медицина иминияте фонды бюджеты турындагы закон нигезендә гамәлгә ашырылган, – дип билгеләп үтте Камил Нугаев. – 2025 елда ММИ Фонды бюджетының керемнәре һәм чыгымнары алдагы ел белән чагыштырганда (2024 ел) 12,3 млрд сумга һәм 12,4 млрд сумга арткан».