Бүген Казан ратушасында «Ел юристы - 2020» республика премиясен һәм Габриэль Феликсович Шершеневич исемендәге Бөтенроссия юридик премиясен тапшыруга багышланган тантаналы чара узды. Юридик бергәлекне һөнәри бәйрәмнәре белән Дәүләт Советы Рәисе Фәрит Мөхәммәтшин котлады.

Бәйрәм кунакларын республика җитәкчелеге исеменнән сәламләп, Фәрит Мөхәммәтшин юрист һөнәре теоретик һәм практик белемнәр генә түгел, бәлки характерның үзенчәлекле сыйфатларын да таләп итүен әйтте.

"Хезмәт бурычларын үтәп, юристлар һәрвакыт гадел һәм объектив булып калырга тиеш, әмма шул ук вакытта кешеләргә карата битараф булмаска тиешләр", - дип басым ясады ул.

Парламент башлыгы билгеләп үткәнчә, юридик бергәлек бүген үз алдында торган бурычларны нәтиҗәле хәл итәргә омтыла: гражданнарның законлы мәнфәгатьләрен, аларның конституцион хокукларын һәм ирекләрен яклау, Россия дәүләтчелеген ныгыту.

Фәрит Мөхәммәтшин Россия юристлар ассоциациясенең Татарстан бүлегенә региональ офисның актив эше, шул исәптән, катлаулы санитар-эпидемиологик вәзгыять чорында да, өчен рәхмәт белдерде. Шулай итеп, төбәк бүлеге әгъзалары тарафыннан авыр хәлдә калган гражданнарга, бизнес вәкилләренә хокукый консультация бирү түләүсез үткәрелде.

РФ Конституциясенә үзгәрешләр буенча Гомумроссия тавыш бирү барышында Ситуацион үзәкне хокукый яктан тәэмин итү гамәлгә ашырылды, ул бөтен республика буенча күзәтүчеләрне координацияләде. Шундый ук эш 2020 елның 11-13 сентябрендә Бердәм тавыш бирү көнендә оештырыла.

ТР Дәүләт Советы Рәисе Татарстанда ике дәүләт телендә - рус һәм татар телләрендә түләүсез юридик ярдәм күрсәтүнең мөһимлеге турында әйтте. Бу, аның әйтүенчә, киң даирә кешеләренә кирәкле мәгълүмат алырга мөмкинлек бирә.

Фәрит Мөхәммәтшин шулай ук игътибарны Россия Федерациясе субъектларының конституция һәм устав судлары алып барган миссиянең мөһимлегенә юнәлтте.

"Мәктәп эскәмиясеннән "Закон хезмәт итү ул - халыкка хезмәт итү" дигән сүзләрне хәтерләп калдым. Сезнең бу миссияне намус һәм чиста ниятләр белән башкаруыгызны телим", - диде Дәүләт Советы Рәисе, юридик бергәлеккә мөрәҗәгать итеп.

Аннары Татарстан парламенты башлыгы “Татарстан Республикасының атказанган юристы” дигән мактаулы исемгә лаек булучыларны котлады, шулай ук ТР Президентының Рәхмәт хатын тапшырды.

Татарстан Республикасы Премьер-министры урынбасары Ләйлә Фазлыева үз чыгышында “Россия дәүләтчелегенең, шулай ук Татарстан Республикасы укучыларының, студентларының хокукый культурасын торгызуга юристларның керткән өлешен бәяләп бетереп булмый”, дип билгеләп үтте. Ул юриспруденция өлкәсендә Г.Р. Державин исемендәге республика премиясе иясе исемен игълан итте. Бүләккә юридик фәннәр докторы, Россия дәүләт хокук университеты Казан филиалының җинаять-хокук дисциплиналары кафедрасы профессоры Марина Ефремова лаек булды.

Габриэль Феликсович Шершеневич исемендәге Бөтенроссия юридик премиясе иясе исемен РФ Юристлар ассоциациясенең Татарстан бүлеге рәисе Илдар Халиков игълан итте. Бүләккә О.Е.Кутафин исемендәге Мәскәү дәүләт юридик университетының финанс хокукы кафедрасы мөдире Елена Грачева лаек булды.

Чарада шулай ук төрле номинацияләрдә «Ел юристы - 2020» республика премиясе җиңүчеләре дә игълан ителде.