Бүгенге утырышта «Татарстан Республикасы территориясендә салым салуның патент системасын кертү турында» Татарстан Республикасы Законына үзгәрешләр кертү хакында» Татарстан Республикасы закон проекты беренче укылышта һәм тулаем кабул ителде. Документ салым салуның ташламалы системасын кулланганда эшчәнлекнең төрләре исемлеген киңәйтә.

Закон проекты белән салым салуның патент системасы кулланыла ала торган эшкуарлык эшчәнлеге төрләре исемлегенә өстәмәләр кертү тәкъдим ителә, моңа бәйле рәвештә эшкуарлык эшчәнлеге төрләре саны, индивидуаль эшкуар тарафыннан еллык керем алуга потенциаль мөмкин булган күләмнәр билгеләнү белән, 63 тән 82 гә кадәр арта. Шулай ук эшчәнлекнең аерым төрләре буенча шәхси эшкуарның керем алу мөмкинлеге булган еллык керем күләменә төзәтмәләр кертелгән. Сәүдә һәм җәмәгать туклануы объектлары мәйданының иң чик күләме 50 квадрат метрдан 150 квадрат метрга кадәр арта. Автотранспорт чаралары саны буенча чикләүләр кертелгән - 20 берәмлектән артык булмаска тиеш.

Салым салуның патент системасын куллануга бәйле рәвештә алына торган салым 2018 ел өчен 72,4 млн. сум,  2019 ел өчен – 89,0 млн.сум күләмендә кергән.

Республиканың Икътисад министры Мидхәт Шаһиәхмәтов билгеләп үткәнчә, 2021 елның 1 гыйнварыннан керемгә бердәм салым рәвешендәге салым режимы үз эшчәнлеген туктатачак. Юридик затлар гомуми салым режимына, салым салуның гадиләштерелгән системасына һәм бердәм авыл хуҗалыгы салымына күчәргә хокуклы. Шәхси эшкуарлар, күрсәтелгән салым режимнарыннан тыш, һөнәри керемгә салымга да (үз-үзләрен эшләүчеләр өчен салым), шулай ук патентка да күчәргә хокуклы. Шәхси эшкуарларга патентка күчү өчен, куллану датасына кадәр 10 көннән дә соңга калмыйча, күчү турында салым инспекциясенә гариза бирергә кирәк. Эшмәкәрләр календарь ел чикләрендә бер айдан унике айга кадәрге чорга патентка күчәргә хокуклы.

Бүген 50 мең юридик зат һәм 3 мең эшкуар бердәм салым режимы буенча эшли. Мидхәт Шаһиәхмәтов сүзләренә караганда, эшкуарларга бердәм салым режимы бетерелүгә һәм патентка күчүгә бәйле рәвештә салым йөкләнеше артырга тиеш түгел. Ахыр чиктә салымнар суммасы тәңгәл булачак. Бу сәүдә, җәмәгать туклануы, транспорт йөртү өлкәләренә кагыла.

Мидхәт Шаһиәхмәтов сүзләренә караганда, Татарстан Президенты федераль үзәккә бердәм салым режимыннан күчеш процессын кичектерүне сорап мөрәҗәгать иткән, әмма бу мөрәҗәгать хуплау тапмаган.

Депутатларның күпсанлы сорауларына җавап биреп, икътисад министры кече һәм урта бизнес вәкилләренең үзләре өчен аеруча уңайлы һәм отышлы салым режимын мөстәкыйль сайларга хокуклы, дип билгеләп үтте.

Закон проектына Татарстан Республикасы Президентының, Прокуратураның, Дәүләт Советы Аппаратының Хокук идарәсе, Хисап һәм Иҗтимагый палаталарның уңай нәтиҗәләре булуын әйтеп, Бюджет, салымнар һәм финанс комитеты рәисе Леонид Якунин закон проектын берьюлы өч укуда кабул итәргә тәкъдим итте. Кабул ителгән закон проекты якын арада республика Президентына кул куюга җибәреләчәк.

«Бу сорау буенча күп тапкыр фикер алышынды. ЕНВД да булган кешеләргә аерым ташламалар бар. Салымның гадиләштерелгән системасында булган бизнес вәкилләренә ЕНВД күпкә отышлы. Тик кайчан да булса моны эшләргә кирәк иде. Бизнес бит тигез шартларда булырга тиеш», — дип белдерде Рөстәм Миңнеханов.

Ул Федераль Хөкүмәт бу эшне берничә тапкыр кичектереп килгәнен әйтте. «Федераль Хөкүмәткә җиткерүнең җитди омтылышлары булды, ләкин алга таба да дәвам итә алмый. Без кабул итәчәк карарларны күзәтеп барачакбыз. Бизнесларны сакларга тиешбез. Авырлыклар барлыкка килсә, парламентның резервлары күп, бу сорауларны карарбыз. Бизнес бүген безнең ярдәмгә мохтаҗ», — диде Рөстәм Миңнеханов.

ТР Дәүләт Советы Рәисе Фәрит Мөхәммәтшин фикеренчә, хәзерге вакытта хокук куллану практикасы мөһим, аның анализы нәтиҗәләре буенча бүген кабул ителгән закон проектына әйләнеп кайтырга һәм кирәк очракта үзгәрешләр кертергә мөмкин. Республика парламенты башлыгы мондый карар кабул итү мөмкинлеген кире какмады.