Бүген парламентта Дәүләт Советы депутаты этикасы кагыйдәләрен үтәү буенча комиссия утырышы узды, анда депутат Марат Галиев тарафыннан чит илдән кайтканнан соң COVID-19га тест нәтиҗәләре турында белешмәләр бирү кагыйдәләрен бозу мәсьәләсе каралды.

Утырышны Татарстан Республикасы Дәүләт Советы Рәисе Фәрит Мөхәммәтшин аңа Роспотребнадзорның Татарстан Республикасы буенча идарәсе җитәкчесе Марина Патяшина мөрәҗәгать иткәннән соң уздырырга кушкан иде. Марат Галиев, чит илдән кайткач, Бердәм дәүләт һәм муниципаль хезмәтләр порталында Россия Федерациясенә килүчеләр өчен  анкеталарны тутыру таләпләрен үтәмәгән һәм яңа коронавирус инфекциясенә тест нәтиҗәләре турында белешмәләр бирмәгән, шуңа бәйле рәвештә аңа карата административ йогынты чаралары кулланылачак.

Комиссия утырышында Марат Галиев бу хәлгә үкенүен белдерде,  ачыктан-ачык гафу үтенде һәм ТР Роспотребнадзорына тиешле хат җибәрүен, гамәлдәге законнар нигезендә җәза алырга әзер булуын билгеләп үтте. "Үз гаебемне тулысынча таныйм һәм Дәүләт Советы депутаты буларак аның өчен җаваплылык дәрәҗәсен аңлыйм", - диде ул.

Комиссия әгъзалары киләчәктә мондый хаталар ясамаска кирәклеген әйттеләр.