Бүген Законлылык һәм хокук тәртибе комитеты утырышында депутатлар җәмәгать судьяларын сайлау һәм җәмәгать судьясы вазыйфаларын йөкләү турындагы мәсьәләләрне карадылар. Комитет утырышында ТР Дәүләт Советы Рәисе урынбасары Юрий Камалтынов катнашты.

Татарстан Республикасы җәмәгать судьялары итеп сайлануга кандидатураларны Татарстан Республикасы Югары суды Рәисе урынбасары Эдуард Каминский тәкъдим итте.

Комитет Татарстан Республикасы Дәүләт Советына биш елга Татарстан Республикасы җәмәгать судьялары итеп сайларга тәкъдим итте: Артур Карамельский (Аксубай суд районы буенча 1 нче суд участогы), Лилия Нәҗметдинова (Балтач суд районы буенча 1 нче суд участогы), Гөлнара Сүлтиева (Чаллы шәһәре суд районы буенча 3 нче суд участогы), Хәйдәр Кадыйров (Чаллы шәһәре суд районы буенча 23 нче суд участогы).  Айрат Габделхаков (Мамадыш суд районы буенча 2 нче суд участогы) һәм Алисә Садретдинова (Казан шәһәренең Идел буе районы буенча 2 нче суд участогы) ун елга җәмәгать судьялары итеп сайларга тәкъдим ителә.

Комитет Татарстан Республикасы Дәүләт Советына Зеленодольск суд районы буенча 2 нче суд участогы җәмәгать судьясы вазыйфаларын башкаруны бер елга отставкадагы судья Илдар Хаевка йөкләргә тәкъдим итә.

Аннары Законлылык һәм хокук тәртибе комитеты рәисе урынбасары Александр Чубаров "Татарстан Республикасы җәмәгать судьялары турында" Татарстан Республикасы Законының 6 һәм 7 статьяларына үзгәрешләр кертү хакында" закон проектын тәкъдим итте. Парламентарий хәбәр иткәнчә, закон проекты "ТР җәмәгать судьялары турында" ТР Кануны нигезләмәләрен федераль законнарга үзгәрешләр белән туры китерүгә юнәлдерелгән.

«Россия Федерациясендә җәмәгать судьялары турында» Федераль законга җәмәгать судьясының вәкаләтләр срогына кагылышлы өлешендә үзгәрешләр кертелде, аның нигезендә җәмәгать судьясы беренче тапкыр өч елга билгеләнә (сайлана). Вазыйфага кабат билгеләп куелганда (сайланганда) җәмәгать судьясы вәкаләтләре срогын чикләмичә тиешле вазыйфага билгеләнә (сайлана) ала.

Гамәлдәге статусы булган җәмәгать судьялары үзләре билгеләнгән (сайланган) вакыт узганчы үз вәкаләтләрен саклый.

Комитет Дәүләт Советына закон проектын беренче һәм өченче укылышта кабул итәргә тәкъдим итә.