Бүген Татарстан Дәүләт Советында Удмуртия Республикасы Дәүләт Советы депутатлары, Бюджет, салымнар һәм финанс буенча даими комиссия әгъзалары булды. Парламентарийлар Татарстандагы хезмәттәшләре белән бюджет сәясәте мәсьәләләре буенча закон чыгару эше, региональ салым ташламалары бирү, гражданнардан сайлау кампаниясе барышында алынган наказларын үтәүне финанслау буенча тәҗрибә уртаклаштылар.   

Очрашуда Удмуртия Дәүләт Советының Бюджет, салымнар һәм финанс буенча даими комиссиясе рәисе Владимир Паршин, Татарстан Дәүләт Советының Бюджет, салымнар һәм финанс комитеты рәисе Леонид Якунин, Удмуртия финанслар министры Вера Сухих, ТР финанслар министры урынбасары Алексей Шишкин, ике регионның парламент депутатлары катнашты.

ТР Дәүләт Советының Торак сәясәте һәм инфраструктура үсеше комитеты рәисе урынбасары Камил Садриев билгеләп үткәнчә, хәзерге вакытта Татарстанлылардан алдагы сайлау кампанияләре нәтиҗәләре буенча алынган һәм республика «юл картасына» кертелгән өч меңгә якын наказларны гамәлгә ашыру төгәлләнеп килә. Быел "Юл картасы" сигезенче чакырылыш Дәүләт Думасы депутатларын сайлау кампаниясе барышында килгән наказлар белән тулыландырылачак. «6 меңнән артык наказ анализы бу елның мартына тәмамланачак, - диде Камил Садриев, - һәм без аларны үтәүгә керешәчәкбез». Сүз бердәмроссиялеләр белән генә түгел, башка партияләр вәкилләре тарафыннан да җыелган наказлар турында бара.

Республикада әлеге зур һәм системалы эш Татарстан Президенты, республика Хөкүмәте, муниципаль хакимият органнары белән тыгыз элемтәдә алып барылачак. Халыкның тәкъдимнәре төбәк һәм муниципаль программаларга трансформацияләнә. Удмуртия Дәүләт Советы депутатлары билгеләп үткәнчә, мондый "программалы якын килү" зур кызыксыну уята.

Татарстан һәм Удмуртия закон чыгару җыеннарының профиль комитетлары аерым әгъзалары төбәк бюджетларын формалаштыру мәсьәләләренә тукталдылар. Леонид Якунин билгеләп үткәнчә, 2021 елда республика бюджеты керемнәр буенча 359,4 млрд. сумга, чыгымнар буенча 350,9 млрд. сумга башкарылган. Барлыкка килгән 8,5 млрд. сум күләмендә профицит бу елның республика бюджеты кытлыгын каплауга юнәлдереләчәк.

Бюджетның программалы юнәлешле булуы (чыгымнар барлык юнәлешләр һәм объектлар буенча республика программалары аша язылган), шулай ук удмурт депутатларында кызыксыну уятты.

Татарстанда бюджет процессының мөһим үзенчәлеге дип Удмуртия парламентарийлары республика бюджетының кытлыкны "үз өстенә" алу фактын да саный. Муниципаль бюджетлар алдагы өч еллык чорга дефицитсыз итеп салына.

Республикада бюджет планлаштыруы үтә күренмәле һәм ачык, дип билгеләп үтте Леонид Якунин. Ел саен Дәүләт Советында парламент тыңлаулары игълан ителә, муниципалитетлар белән киңәшмә уза. Республиканың төп финанс законы проектын профильле юнәлешләр буенча барлык парламент комитетларында да карыйлар. Бюджет турында фикер алышканда профильле комитетка кергән сораулар Татарстан Хөкүмәтенә алдан эшләү өчен җибәрелә.

Удмуртия Дәүләт Советының профильле комитеты депутатлары шулай ук Татарстан Дәүләт Советының барлык комитетларында оештырылган эксперт советлары эше белән дә кызыксынды. Экспертлар җәмәгатьчелеген закон проектлары буенча фикер алышуга һәм хокук куллану практикасын анализлауга җәлеп итү, дип билгеләп үтте Владимир Паршин, "яхшы практика" булып тора. "Бәлки, без әлеге тәҗрибәне үз парламентыбыз диварларында да гамәлгә ашырачакбыз, - диде ул, - моннан тыш, сезнең бюджет планлаштыруның программа ысулы кызыклы, ул акчаларны нәтиҗәле файдаланырга һәм контрольне югалтмаска мөмкинлек бирә".

Удмуртия Республикасы Дәүләт Советының бюджет, салымнар һәм финанс буенча даими комиссиясе әгъзалары Казанда бер көнлек эш сәфәрендә. Бүген кунаклар Татарстан Республикасы Инвестицион үсеш агентлыгына барырга һәм республиканың инвестицион потенциалы белән танышырга ниятли.

Очрашу тәмамлангач, Удмуртия Республикасы парламентарийлары Дәүләт Советында парламент үзәгендә һәм парламентаризм музеенда булдылар.