Бүген Законлылык һәм хокук тәртибе комитеты утырышы булды, анда республиканың мәктәпкәчә һәм гомуми белем бирү оешмаларында куркынычсызлыкны тәэмин итү турындагы контроль мәсьәлә каралды. Депутатлар шулай ук җәмәгать судьяларына кандидатларны да хуплады.

ТР Югары суды Рәисе урынбасары Эдуард Каминский өч суд участогы буенча Татарстан Республикасы җәмәгать судьялары итеп сайлауга кандидатуралар тәкъдим итте.

Комитет кандидатураларны хуплады һәм Дәүләт Советына Татарстан Республикасы җәмәгать судьялары итеп түбәндәгеләрне сайларга тәкъдим итте: Резеда Гыйлемханова (Яшел Үзән суд районының 2нче суд участогына вәкаләтләр вакытын чикләмичә), Елена Акимова (Чаллы шәһәре суд районы буенча 10нчы суд участогына - өч елга) һәм Инна Касаткинаны (Чистай суд районы буенча 1нче суд участогына - өч елга).

"ТР мәктәпкәчә һәм гомуми белем бирү учреждениеләрендә куркынычсызлыкны тәэмин итү турында" контроль сорау буенча мәгълүматны ТР мәгариф һәм фән министры урынбасары Рамил Хәйруллин тәкъдим итте.

Аның сүзләренә караганда, мәгариф объектларында террорчылыктан яклауны тәэмин итү РФ Хөкүмәтенең «РФ Мәгариф министрлыгы объектларының (территорияләренең) һәм РФ Мәгариф министрлыгы эшчәнлеге өлкәсенә караган объектларның (территорияләрнең) террорчылыктан яклануына таләпләрне һәм әлеге объектларның (территорияләрнең) иминлеге паспорты формасын раслау турында» 1006 номерлы карары белән регламентлана. Белем бирү оешмалары хәвеф-хәтәр буенча 4 категориягә бүленә. "Мәгариф объектларының техник яктан тәэмин ителеше буенча террорчылыктан саклау системалары тарафыннан күп җитешсезлекләр бар, - дип билгеләп үтте Рамил Хәйруллин. - Кайбер учреждениеләр хәвефле сигнализация системасы белән җиһазланмаган яки эвакуация белән идарә итү системалары йә хезмәткәрләргә һәм укучыларга ашыгыч хәбәр итүнең автоном чаралары белән җиһазланмаган; тышкы яктырту, видеокүзәтү яки саклау сигнализациясе системалары булмау күзәтелә; аерым балалар бакчаларында һәм мәктәпләрдә биналарга, контроль-үткәрү пунктларына (сак постларына) керү юлларына, контроль һәм керү мөмкинлеге (турникетлар), капкага керү юлларына керү өчен капкалар белән идарә итү системалары җиһазланмаган".

Бу хәлнең төп сәбәпләреннән берсе дип мәгариф һәм фән министры урынбасары саклау чараларын финанслау җитмәүне атады. ТР буенча милли гвардия гаскәрләренең ведомстводан тыш саклау идарәсе башлыгы урынбасары Марат Сәләхиев докладка өстәмә буларак, мәгариф министрлыгының күп кенә учреждениеләрендә шәхси сак предприятиеләре хезмәткәрләре каравыл тора, дип хәбәр итте.

Росгвардия идарәсенең лицензия-рөхсәт эше үзәге мәгариф учреждениеләренә хезмәт күрсәтә торган шәхси сак оешмаларында 433 күчмә тикшерү үткәрде. Лицензия һәм мәҗбүри таләпләрнең 21 бозылу очрагы ачыкланган. Шуңа күрә идарә хосусый сак оешмалары каравылы астындагы мәгариф объектлары мониторингын аерым контрольдә калдыра.

Парламент комитеты рәисе урынбасары Александр Чубаров, республика мәгариф оешмаларында куркынычсызлыкны тәэмин итү таләпләренең үтәлешен тикшерү буенча депутат төркеме эше нәтиҗәләре турында сөйләгәндә, еш кына мәктәпләрне саклауга җавапсыз, формаль мөнәсәбәт күзәтелүен билгеләп үтте. "Шәхси сак предприятиеләре хезмәткәрләре эшенең сыйфаты күп сораулар тудыра, - диде ул. - Һәрдаим сакчыларга әзерлексез кешеләр яллана, еш кына пенсионерларны эшкә алалар".

Мәсьәлә турында фикер алышуда катнашкан Дәүләт Советы депутатлары Алсу Тарханова, Игорь Бикеев, Валерий Власов һәм Мансур Гарифуллин чаралар финансланмау сәбәпләре, балалар һәм педагогларның куркынычсызлыгын тәэмин итү юллары белән кызыксындылар, шулай ук мәктәпләрне һәм балалар бакчаларын террорчылыктан саклау эшен оештыруның норматив-хокукый базасының камил булмавына игътибар иттеләр.

Татарстан Республикасында кеше хокуклары буенча вәкаләтле вәкил Сәрия Сабурская, беренче чираттагы чара буларак, мәгариф учреждениеләрендә куркынычсызлыкны тәэмин итү мәсьәләләрендә вазыйфаи затларның компетентлы булмавына игътибар итәргә тәкъдим итте. Аның фикеренчә, педколлективларда, муниципалитетларда аңлату эшләре оештырырга, мәгариф министрлыгы коллегиясенең балалар куркынычсызлыгын тәэмин итү чаралары турында махсус утырышын үткәрергә кирәк. 

Сөйләшүгә йомгак ясап, Законлылык һәм хокук тәртибе комитеты рәисе Шакир Яһудин бу юнәлештә законнарны камилләштерү эшен дәвам итәргә кирәклеген ассызыклады. Ул башкарма органнарның норматив һәм хокукый актларында һәм көч структуралары күрсәтмәләрендә җитешсезлекләр барлыгын кызганыч белән билгеләп үтте. "Сүз балалар һәм укытучыларның сәламәтлеге һәм тормышы турында бара, - диде парламентарий. - Шуңа күрә барлык җаваплы затларның да катгый рәвештә формализмнан, битарафлыктан арынуы кирәк".