Бүген Дәүләт Советында Бюджет, салымнар һәм финанс комитеты утырышы узды, анда депутатлар Комитетның 2022 елның икенче кварталына эш планы турында фикер алыштылар, шулай ук Экспертлар советы составына үзгәрешләр кертү турындагы карар проектын һәм кайбер федераль закон проектларын карадылар.

Профильле комитет әгъзалары РФ Салым кодексының беренче һәм икенче өлешенә үзгәрешләр кертү турында федераль закон проектын хупладылар (алгарышлы социаль-икътисадый үсеш территориясен алгарышлы үсеш территориясенә үзгәрүгә бәйле рәвештә) һәм әлеге мәсьәләне парламентның якындагы утырышының көн тәртибенә кертергә тәкъдим иттеләр.

Бюджет, салымнар һәм финанс комитеты рәисе Леонид Якунин билгеләп үткәнчә, федераль закон проекты белән алгарышлы социаль-икътисадый үсеш территорияләрен (ТОСЭР) алгарышлы үсеш территориясе исеменә үзгәртергә тәкъдим ителә. Әлеге үзгәреш еш кына гамәлдә очрый торган социаль-икътисадый зоналарны һәм хокукый режимнары төрле булган махсус икътисадый зоналарны катнаштыруны булдырмый калуны күздә тота.

Бюджет, салымнар һәм финанс комитеты шулай ук РФ Салым кодексының икенче өлешендәге 251 һәм 262 статьяларына үзгәрешләр кертү турында федераль закон проектын хупларга тәкъдим итә. Закон проекты интеллектуаль эшчәнлек нәтиҗәләренә мөлкәти хокуклар рәвешендә оешмалар табышына салым буенча ташламалар гамәлен яңарта.

Әлеге ташламалардан эшмәкәрләр 2018 елның 1 гыйнварыннан 2019 елның 31 декабренә кадәр файдалана алган. Федераль закон чыгаручылар, интеллектуаль эшчәнлек нәтиҗәләренә хокукларны инвентаризацияләү процедурасын үткәрүнең дәвамлылыгын һәм катлаулылыгын исәпкә алып, ташламалар каралган ике еллык чор җитәрлек дәрәҗәдә булмады, дигән фикердә. Регионнарда әлеге ташламаны яңартуга ихтыяҗ бар.

Эшләнгән федераль закон проекты ташламаларны тагын өч елга яңартуны күздә тота (2024 елның 31 декабренә кадәр). Кече һәм урта бизнес өчен ташламаларның гамәлдә булу срогы биш елга, 2026 елның 31 декабренә кадәр озайтыла.

Бүген утырышта Бюджет, салымнар һәм финанс комитеты каршындагы Экспертлар советы составына үзгәрешләр кертелде. Үзгәрешләр ротация кысаларында уздырыла. Аерым алганда, Экспертлар советы әгъзалары булып К(И)ФУның Идарә, икътисад һәм финанслар институтының икътисадый иминлек һәм салым салу кафедрасы мөдире Айдар Туфетуллов, «Татарстан Республикасы Сәүдә-сәнәгать палатасы» берлегенең икътисадый мәсьәләләр буенча рәисе урынбасары Сергей Карпухин һәм Идарә, икътисад һәм финанслар институтының Икътисадый куркынычсызлык һәм салым кафедрасы доценты Марина Орлова торачак. Эксперт советының яңа составы Дәүләт Советы Президиумы утырышында расланачак.

Бюджет, салымнар һәм финанс комитеты утырышында башка мәсьәләләр дә каралды. Утырышта ТР Дәүләт Советы Рәисе урынбасары Марат Әхмәтов катнашты.