Бүген Дәүләт Советы Рәисе Фәрит Мөхәммәтшин Казанда Үзбәкстан Республикасы Закон чыгару палатасы Олы Мәҗлесенең   РФ ФС Дәүләт Думасы белән хезмәттәшлек буенча җитәкчесе, Инновацион үсеш, мәгълүмати сәясәт һәм мәгълүмат технологияләре мәсьәләләре комитеты рәисе Илхом Абдуллаев җитәкчелегендә Татарстанга килгән Үзбәкстан Республикасы парламенты депутатлары белән очрашты.

Үзбәкстан Республикасы Закон чыгару палатасы Олы Мәҗлесе  депутатлары Казанга эш визиты белән килде, аның төп максаты - Үзбәкстан Республикасы парламенты белән элемтәләр оештыру буенча Дәүләт Думасы депутатлар төркеме һәм    РФ Дәүләт Думасы белән хезмәттәшлек буенча  Үзбәкстан Республикасы Закон чыгару палатасының депутатлары  төркеменең уртак утырышында катнашу.

Фәрит Мөхәммәтшин кунакларга республика дәүләт хакимиятенең югары закон чыгару (вәкиллекле) органы эше, комитетлар һәм комиссияләр эше, Россия-Үзбәкстан партнерлыгы кысаларында Татарстанның нинди өлеш кертүе турында сөйләде. Үзбәкстан Татарстанга укырга килгән  чит ил студентлары  саны буенча илләр арасында икенче урында тора.

Татарстанда үзбәкләрнең милли-мәдәни автономиясе актив эшли, ул республикада яшәүче 173 милләт вәкилләрен берләштерүче Татарстан халыклары ассамблеясе составына керә, дип ассызыклады ТР Дәүләт Советы Рәисе. «Бүген Үзбәкстанда иң эре татар диаспораларының берсе - 300 меңнән артык кеше яши, - диде Фәрит Мөхәммәтшин, - моннан тыш, Үзбәкстанның якынча 9 мең гражданы Татарстанда яши. Без республикабыз территориясендә яшәүче төрле халыклар вәкилләре белән уртак тел табабыз, тынычлык һәм татулык - иң мөһиме»

Фәрит Мөхәммәтшин фикеренчә, Казанда Үзбәкстан Республикасы парламенты белән элемтәләр оештыру буенча Дәүләт Думасы депутатлары төркеме һәм  РФ Дәүләт Думасы белән хезмәттәшлек буенча  Үзбәкстан Республикасы Закон чыгару палатасы  депутатлары төркеменең уртак утырышын уздыру Үзбәкстан һәм Татарстан парламент хезмәттәшлегенә дә яңа этәргеч бирәчәк.

Сәламләү сүзләре белән чыгыш ясаганда, Илхом Абдуллаев Россия ягыннан Үзбәкстан белән Россия Федерациясе арасында депутат төркеменең уртак утырышын Татарстан башкаласында  уздыру тәкъдиме килгәч, Олы Мәҗлестә бу тәкъдимне хуплауларын билгеләп үтте. «Без Татарстандагы вәзгыятьне игътибар белән күзәтәбез һәм Россия Федерациясе составындагы субъект буларак ирешкән уңышларыгыз белән горурланабыз. Сез халыкның мәшгульлеген, җитештерүдә, икътисадта, авыл хуҗалыгында һәм башка өлкәләрдә югары үсеш темпларын тәэмин итүче инновацион үзәкләрнең һәм төбәкләрнең  берсе. Болар барысы да сезнең халыкның тормыш дәрәҗәсендә уңай чагылыш таба», - диде Илхом Абдуллаев.

Үзбәкстан Республикасы Закон чыгару палатасы Олы Мәҗлеснең  парламентара төркеме җитәкчесе республика җитәкчелегенә Татарстанда үзбәк халкына зур игътибар һәм ярдәм күрсәткәннәре өчен рәхмәт белдерде. "Татарстан халкы белән безне бердәм дин генә түгел, мәдәният, мәгариф һәм башка бик күп нәрсәләр бәйли. Безгә якташларыбызның Татарстанда ничек яшәүләрен белү бик мөһим», - диде ул.

Илһам Абдуллаев шулай ук ТР Дәүләт Советы буенча экскурсиядән соң туган тәэсирләре белән уртаклашты. Ул утырышлар залының мәгълүмати тәэмин ителешен, тавыш бирүнең электрон системасын, утырышларның турыдан-туры трансляцияләүне оештыруны югары бәяләде.

"Мин безнең күчмә утырышыбызның нәкъ менә Казанда узуын бик символик мәгънәгә ия дип саныйм. Бу бөтен зур Россиянең,  төбәкләрне дә кертеп, үзара хезмәттәшлекне үстерүгә, барлык дәрәҗәләрдәге халыкара элемтәләрне ныгытуга әзер булуына ачык мисал. Иртәгә узачак утырышның яңа процессларга башлангыч бирәчәгенә, аларның якын арада үз үсешен алачагына ышанам ", - дип билгеләп үтте үз чыгышында Үзбәкстан Республикасы парламенты белән элемтәләр буенча депутат төркеме аппараты җитәкчесе, Дәүләт Думасы Рәисе урынбасары киңәшчесе Наталия Красовская.

Очрашуда төркем секретаре, Үзбәкстан Республикасы Закон чыгару палатасы Олы Мәҗлесенең  Инновацион үсеш, мәгълүмат сәясәте һәм мәгълүмат технологияләре мәсьәләләре буенча комитет рәисе урынбасары Дониёр Ганиев, Үзбәкстан Республикасы Закон чыгару палатасы комитетлары әгъзалары Елена Бабенко, Азамат Нематуллаев, Үзбәкстан Республикасының Казандагы Генераль консулы Фәриддин Насриев, ТР Дәүләт Советы Рәисе урынбасары Марат Әхмәтов, Мәгариф, мәдәният, фән һәм милли мәсьәләләр комитеты рәисе Айрат Зарипов, Мәгариф, мәдәният, фән һәм милли мәсьәләләр комитеты рәисе урынбасары Людмила Рыбакова һәм башка рәсми затлар катнашты.