Бүген Дәүләт Советында Законлылык һәм хокук тәртибе комитеты утырышы узды, анда парламентарийлар республика муниципалитетларының төрле суд участокларына җәмәгать судьялары итеп сайлау өчен  тәкъдим ителгән кандидатураларны тикшерделәр, шулай ук кайбер федераль закон проектларын карадылар. Моннан тыш, утырышта депутатлар РФ Административ хокук бозулар турында кодексының 20.1 статьясына һәм мәгълүмат, мәгълүмат технологияләре һәм мәгълүматны яклау турында федераль законның 106 һәм 151-1 статьяларына үзгәреш кертү хакында федераль законнарны РФ Федераль Собраниесе Дәүләт Думасына кертү буенча Дәүләт Советының закон чыгару инициативаларын карады. Сүз РФ субъектларының дәүләт символларына ихтирамсызлык күрсәтүгә кагылышлы хокук бозулар өчен административ җаваплылык билгеләү турында бара.

Профильле комитет әгъзалары билгеләп үткәнчә, хәзерге вакытта регионнар башка төбәктә теркәлгән граждан тарафыннан РФ субъектларының дәүләт символларына ихтирамсызлык күрсәтүгә кагылышлы хокук бозулар өчен административ җаваплылыкны билгели алмыйлар, чөнки Россия территориясендә федераль законнар гына турыдан-туры гамәлдә. Федераль законнар "Интернет" челтәрендә Россия Федерациясенең рәсми дәүләт символларына карата гына ихтирамсызлык күрсәтүче мәгълүматны тарату өчен җаваплылыкны гына күздә тота.

"Элек Россия Федерациясенең һәм аның составындагы республикаларның дәүләт символларына ихтирам күрсәтмәгән өчен җәза закон тарафыннан язылган иде, - дип искә төшерде Законлылык һәм хокук тәртибе комитеты рәисе Шакир Яһудин, - тормыш әлеге хокукый норманы кире кайтаруга ихтыяҗ булуын күрсәтә".

Комитет рәисе урынбасары Александр Чубаров билгеләп үткәнчә, федераль закон проекты тарафыннан РФ Кодексының 20.1 маддәсенең 3 өлешен Россия Федерациясе субъектларының рәсми дәүләт символларына ихтирамсызлык күрсәтүгә кагылышлы хокук бозулар өчен административ җаваплылык белән тулыландыру тәкъдим ителә. Документ Россия Закон чыгаручылар Советының уңай нәтиҗәсен алган һәм Дәүләт Советының якындагы утырышында каралачак.

«Мәгълүмат, мәгълүмат технологияләре һәм мәгълүматны яклау турында» федераль законга, РФ субъектларының дәүләт символлары турындагы нигезләмәләргә өстәп, шундый ук үзгәрешләрне кертү тәкъдим ителә.

Бүген комитет утырышында депутатлар Татарстан Республикасы Дәүләт Советына вәкаләтләр срогын чикләмичә Баулы суд районы (2 нче суд участогы) буенча - Светлана Гатиятуллинаны, Саба суд районы буенча (1 нче суд участогы) Руслан Нәбиуллинны сайларга тәкъдим иттеләр. Тәкъдим ителгән кандидатуралар буенча ахыргы карар Дәүләт Советы утырышында кабул ителәчәк.

Дәүләт Советында закон чыгару эше һәм чакырылыш дәвамында каралган контроль мәсьәләләр турында профильле комитетларның хисапларын тыңлау эше дәвам итә. Законлылык һәм хокук тәртибе комитеты алтынчы чакырылышта эшләнгән эш турында хисап тотучы беренче комитет булачак. Бүген Законлылык һәм хокук тәртибе комитетының 2019 елның сентябреннән 2022 елның июленә кадәр эше турында хисап комитет утырышында тәкъдим ителде, июльдә аны парламент утырышында караячаклар.

Хисап чорында комитет тарафыннан 290 мәсьәлә каралган, 263 карар һәм 27 бәяләмә кабул ителгән. 36 закон проекты каралган, аларның барысы да Татарстан Республикасы законнары буларак кабул ителгән.

Законлылык һәм хокук тәртибе комитеты Дәүләт Советында закон проекты эшенең якынча планын формалаштыру буенча зур эш башкара, аның үтәлешен күзәтә. 2022 елга якынча планга закон чыгару инициативасы хокукына ия 25 субъект тәкъдим кертелгән. Бүгенге көнгә 8 закон проекты кертелгән, шуларның 5се Татарстан Республикасы Канунына әверелгән.

Комитет эшчәнлегенең бер юнәлеше булып, алга таба аларны закон чыгару инициативасы тәртибендә РФ Федераль Собраниесе Дәүләт Думасына кертү өчен, федераль закон проектлары өстендә эшләү тора. Профильле комитет аша узучы инициативаларның бер өлеше федераль законнар булды.

2019 елның октябреннән 2022 елның маена кадәр 27 контроль мәсьәлә каралган. Өч республика законына мониторинг үткәрелгән: Татарстан Республикасы Иҗтимагый палатасы турында, түләүсез юридик ярдәм күрсәтү һәм төнлә гражданнарның тынычлыгын һәм тынлыкны саклау турында. Хисап чорында Комитетта 360 гражданнар мөрәҗәгате буенча эш башкарылган.

Комитет утырышында башка мәсьәләләр дә каралды.