Бүген Дәүләт Советы утырышында Татарстан Үзәк сайлау комиссиясе әгъзаларын билгеләү мәсьәләсе каралды. Элек сайланган кешеләрнең вәкаләтләре чоры сентябрьдә тәмамлана.

Исегезгә төшерәбез, республика законнары нигезендә, Татарстан Республикасы Үзәк сайлау комиссиясе хәлиткеч тавыш хокукына ия 14 әгъза составында төзелә, шул ук вакытта җиде әгъза Дәүләт Советы тарафыннан, икенче яртысы Татарстан Республикасы Президенты тарафыннан билгеләнә. Республика парламенты тарафыннан һәр кандидатура буенча тиешле карарлар кабул ителде. Татарстан Республикасы Президенты Указы шулай ук якын арада басылып чыгачак.

ТР Үзәк сайлау комиссиясенең яңа составын формалаштыру РФ Федераль Җыены Дәүләт Думасында, ТР Дәүләт Советында тәкъдим ителгән  сәяси партияләр, башка сәяси партияләр һәм иҗтимагый берләшмәләр, шулай ук муниципаль берәмлекләрнең вәкиллекле органнары, ТР Үзәк сайлау комиссиясе тәкъдимнәре нигезендә узды.

Дәүләт корылышы һәм җирле үзидарә комитеты рәисе Альберт Хәбибуллин билгеләп үткәнчә, ТР Дәүләт Советы Президиумы карары белән ТР Үзәк сайлау комиссиясенең яңа составын формалаштыру башлануы турында игълан ителгән, ул агымдагы елның 28 августында тәмамланган. Дәүләт Советына 11 субъекттан Үзәк сайлау комиссиясе составына билгеләү өчен кандидатуралар турында документлар килгән. Барлык тәкъдимнәр дә кандидатлар катнашындагы комитет утырышында алдан каралган.

Федераль закон һәм ТР Сайлау кодексы белән РФ Үзәк сайлау комиссиясе һәм парламент партияләре тәкъдим иткән хәлиткеч тавыш хокукына ия Үзәк сайлау комиссиясе әгъзаларын беренче чиратта билгеләү каралган.

Дәүләт Советына җиде вакантлы урынга 11 гариза бирелгән, аларның хокуклары Дәүләт корылышы  һәм җирле үзидарә комитеты тарафыннан расланган, утырышта рейтинглы тавыш бирү процедурасы кулланылган.

Парламентта тавыш бирү нәтиҗәләре буенча ТР Үзәк сайлау комиссиясе әгъзалары итеп түбәндәгеләр сайланды:

Рөстәм Илдус улы Заһидуллин - ТР юстиция министры (кандидатура РФ Үзәк сайлау комиссиясе тарафыннан кертелгән),

Гыйниятуллина Светлана Владимировна - "«Бердәм Россия» Бөтенроссия сәяси партиясенең Татарстан региональ бүлегенең региональ башкарма комитеты җитәкчесе урынбасары – партия төзелеше бүлеге башлыгы   (кандидатура «Бердәм Россия» партиясе тарафыннан кертелгән) ,      

Пименова Наталья Николаевна - Яшел Үзән районының юридик бюросы җитәкчесе (кандидатура “Новые люди” сәяси партиясе тарафыннан кертелгән),

Әхмәтҗанов Ленар Илдар улы - Чаллы шәһәре башкарма комитетының Хокук идарәсе башлыгы (кандидатура Чаллы шәһәре муниципаль берәмлеге шәһәр советы тарафыннан кертелгән),

Борисова Надежда Петровна - ТР Үзәк сайлау комиссиясе секретаре (кандидатура ТР Үзәк сайлау комиссиясе тарафыннан кертелгән),

Видисенков Сергей Васильевич - Питрәч районы яшьләр үзәгенең өлкән тренеры (кандидатура "Россия коммунистлары" "Коммунистлар партиясе” сәяси партиясенең Татарстан республика бүлеге тарафыннан кертелгән),

Җиһаншина  Альбина Реваль кызы - Казан шәһәре Башкарма комитетының оештыру идарәсе башлыгы урынбасары (кандидатура Казан шәһәр Думасы тарафыннан кертелгән).