Мәскәүгә эш сәфәре белән килгән Татарстан Дәүләт Советы Рәисе Фәрит Мөхәммәтшин бүген Россия Закон чыгаручылар Советы һәм аның Президиумы утырышларында катнашты. Чаралар РФ ФҖ Федерация Советында узды. 

Федерация Советы Рәисе Валентина Матвиенко һәм Дәүләт Думасы Рәисе Вячеслав Володин рәислегендә узган  Россия Закон чыгаручылар Советы утырышында сүз яңа чакыруларга җайлашу шартларында Россиянең һәм аның төбәкләренең социаль-икътисади үсеше хакында барды.

"Хәзерге вәзгыятьтә барлык хакимият органнары бергәләп, хаталарсыз  эшләргә тиеш, - дип басым ясады Валентина Матвиенко, - инде санкцияләргә каршы идарәнең тулы бер системасы формалаштырылды, законнар комплексы кабул ителде, РФ субъектлары шулай ук яңа шартларга яраклаша". Россия парламентының югары палатасы спикеры сүзләренә караганда, бүген шулай ук Россиянең яңа субъектларына ярдәм итәргә кирәк, аларны илнең хокукый һәм икътисадый системасына кертү мәсьәләләре беренче планга чыга.

 Закон чыгаручылар Советы Президиумы утырышы Федерация Советы Рәисенең беренче урынбасары Андрей Яцкин һәм Дәүләт Думасы Рәисе урынбасары Ирина Яровая рәислегендә узды. Федераль һәм төбәк парламентарийлары кайбер социаль әһәмияткә ия мәсьәләләр, шул исәптән мобилизацияләнгән гражданнарга һәм аларның гаилә әгъзаларына ярдәм итү, шулай ук Россиянең хәрби-тарихи мирасын саклау чаралары турында фикер алыштылар.

"Бу темаларның актуальлеге аермачык, алар илнең һәр төбәгенә кагыла, - дип ассызыклады Андрей Яцкин, утырышны ачып, - хәзер төп мәсьәлә булып Россиянең тышкы чакырулардан саклануы һәм, шуңа бәйле рәвештә, үз хәрби бурычларын намус белән үтәүче мобилизацияләнгән гражданнарга ярдәм күрсәтү тора. Дәүләт тарафыннан махсус операциядә катнашучыларга ярдәм күрсәтүгә юнәлтелгән берничә чара кабул ителде, социаль түләүләр билгеләнде, хезмәт законнары мәсьәләләре хәл ителде, кредит каникуллары кертелде, медицина ташламалары каралды һ.б. Дәүләт Думасы депутатлары белән бергә эшләгән зур закон пакеты бүген инде гамәлгә ашырыла. Хәзер бу чараларны төбәкләрдә "җиргә төшерергә" кирәк.

Ирина Яровая, хезмәттәшләрен сәламләп, билгеләп үткәнчә, РФ Хөкүмәте каршында Координация советы булдырылган, аның төп максаты - бүген Россияне яклаган кешеләргә ярдәм итү өчен барлык дәрәҗәдәге хакимиятнең максималь хезмәттәшлеген тәэмин итү. "Мобилизацияләнгәннәрнең гаиләләре максималь якланган булырга тиеш, - дип басым ясады ул, - оператив режимда өстәмә социаль гарантияләр билгеләнде, әмма бу көндәлек адреслы эшне гамәлдән чыгармый". Ирина Яровая шулай ук кайбер очракларда социаль ярдәм чараларын киңәйтү өчен законнарны үзгәртү таләп ителергә мөмкин, дип билгеләп үтте.

Федераль карарлардан тыш, мобилизацияләнгәннәргә һәм аларның гаилә әгъзаларына өстәмә социаль ярдәм чаралары төбәкләр дәрәҗәсендә дә кертелә. "Татарстанда бу эш шактый җитди һәм нигезле алып барыла, - дип басым ясады Фәрит Мөхәммәтшин, - без мобилизацияләнгәннәрнең гаиләләренә, әтиләре гражданлык бурычын үтәргә киткән балаларга ярдәм итү буенча төрле чаралар күрәбез. Ярдәм республика ягыннан да, муниципалитетлар ягыннан да гамәлгә ашырыла. Өстәвенә, сүз матди ярдәм турында гына бармый, мораль ярдәм турында да бара. Без барыбыз да илебез лидеры Владимир Путин тирәсендә берләшәбез һәм ил җитәкчелеге тарафыннан күрелгән чаралар  Ватаныбызны яклау бурычларын азрак югалтулар белән хәл итәргә ярдәм итүен аңлыйбыз".

Аерым алганда, Татарстанда мобилизацияләнгән кешенең 18 яшькә кадәр булган һәр баласына  бер тапкыр 20 мең сум күләмендә түләнә.  Республиканың эре предприятиеләре мобилизацияләнгән хезмәткәрләр өчен өстәмә түләүләр булдырдылар. Республика законы белән мобилизацияләнгән гражданнар транспорт салымын түләүдән азат ителде. Республика муниципаль берәмлекләре шулай ук үзләренең ярдәм итү чараларын актив билгели, мәсәлән, балалар бакчаларына, музейларга һәм театрларга бушлай бару, мәктәпләрдә бушлай туклану, транспортта бушлай йөрү һ.б.

Фәрит Мөхәммәтшин Россия составына кергән территорияләрдә яшәүчеләргә ярдәмгә гуманитар миссияләр оештыручыларга аерым рәхмәт сүзләре белән мөрәҗәгать итте. «Республикабызның күп милләтле халкы, олысы-кечесе бергәләп, чын күңелдән 600 тоннадан артык гуманитар ярдәм җибәрде, - диде Фәрит Мөхәммәтшин. Бөтен шәһәр һәм районнардагы кешеләр бу бәлагә битараф түгел, һәм бу безне берләштерә. Әлбәттә, бу эш алга таба да дәвам итәчәк".

Закон чыгаручылар Советы Президиумы утырышы кысаларында парламентарийлар патриотик тәрбия мәсьәләләренә аерым тукталдылар. Фәрит Мөхәммәтшин әйтүенчә, Россия Федерациясе һәм Советлар Союзы геройларының батырлыклары ватанпәрвәрлекнең ачык дәлилләре булып хезмәт итә ала. Парламент җитәкчесе хезмәттәшләрен алар белән ешрак очрашырга, үсеп килүче буынны батырлар үрнәгендә тәрбияләргә чакырды. Фәрит Мөхәммәтшин иртәгә шулай ук республикада яшәүче Россия геройлары белән Ватан геройлары көненә багышланган тантаналы чаралар кысаларында очрашырга ниятли.