Бүген ТР Дәүләт Советы каршындагы Яшьләр парламенты утырышы узды, анда 2022 елга эш нәтиҗәләре ясалды һәм 2023 елга бурычлар билгеләнде. Аның эшендә Татарстан Республикасы Яшьләр эшләре министры Ринат Садыйков, Дәүләт Советының Социаль сәясәт комитеты рәисе Светлана Захарова, Татарстан Республикасы Үзәк сайлау комиссиясе рәисе Андрей Кондратьев һәм Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Таһир Һадиев катнашты.

2022 елда Яшьләр парламенты эшчәнлеге турында мәгълүматны аның рәисе Нина Шимина тәкъдим итте, аның әйтүенчә республиканың иҗтимагый тормышында яшьләрнең роле сизелерлек  арткан.

Нина Шимина сүзләренә караганда, узган ел Яшьләр парламенты 3 утырыш уздырган, анда 19 мәсьәлә каралган. Шул исәптән яшь парламентарийлар "Административ хокук бозулар турында РФ кодексына үзгәрешләр кертү турында" закон проектының инициторы булганнар, документта ата-аналары рөхсәтеннән башка балигъ булмаган балаларга  рәсем төшергән өчен тату-салоннар яки тату осталарның җаваплылыгын билгеләргә тәкъдим ителә.

Илдә иң яхшыларның берсе дип танылган ТР яшьләр парламенты ТР Дәүләт Советы һәм РФ Федераль Җыены Дәүләт Думасы комитетлары белән актив хезмәттәшлекне дәвам иткән.

Ел дәвамында Яшьләр парламенты әгъзалары тарафыннан гражданнарның 700дән артык мөрәҗәгате каралган, студентлар һәм эшче яшьләр арасында парламент дебатлары буенча турнирлар, яшьләр парламентаризмы мәсьәләләре буенча түгәрәк өстәл, яшь гаиләләрнең хокукларын яклау буенча форум, муниципалитетларда парламент дәресләре үткәрелгән. Ватан тарихы буенча бөтенроссия тестында 45 меңнән артык яшь кеше катнашкан.

Нина Шимина үз докладында Яшьләр парламенты комиссияләренең эшен югары бәяләде һәм алга таба ТР Дәүләт Советы комитетлары белән нәтиҗәле хезмәттәшлеккә өметен белдерде.

Утырышта катнашучыларга сәламләү сүзе белән Татарстан Республикасы яшьләр эшләре министры Ринат Садыйков мөрәҗәгать итте. Ул оешмаларга кермәүче яшьләр белән эшләүнең аеруча актуальлеген билгеләп үтте. "Бу юнәлештә без сезнең белән активрак һәм максатчан эшләргә тиеш, - дип ассызыклады ул. - Резервлар бар, яшьләрне социаль файдалы эшчәнлеккә җәлеп итү өчен аларны мөмкин кадәр күбрәк кулланырга кирәк".

Социаль сәясәт комитеты рәисе Светлана Захарова Яшьләр парламенты белән багланышлар турында сөйләгәндә, Дәүләт Советы депутатларының хезмәттәшлек өчен һәрвакыт ачык булуын билгеләп үтте.  "Без һәрвакыт сезнең яшьләр белән аралашуда туа торган барлык конструктив тәкъдимнәрегезне карарга әзер. Һәм үзегезне тормышка ашыру мөмкинлекләрегез бик күп, шуңа күрә кулланыгыз, үз проектларыгызны активрак тәкъдим итегез", - дип йомгаклады ул.

Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Таһир Һадиев яшь парламентарийларны авылга ярдәм итү, милли традицияләрне һәм туган телләрне саклау мәсьәләләренә игътибар итәргә өндәде.

Яшьләр парламенты утырышында башка мәсьәләләр дә каралды.