Бүген ТР Дәүләт Советының «Татарстан-яңа гасыр»  депутатлар төркеме әгъзалары «Бүгенге көннең патриоты» темасына күчмә утырыш үткәрделәр, анда патриотик тәрбия мәсьәләләре һәм аның шәхес формалашудагы роле турында фикер алыштылар. Түгәрәк өстәл Казанның Левченко бистәсендәге «Полимер» мәдәният йортында узды.

Утырыш алдыннан «Татарстан-яңа гасыр» депутатлар төркеме җитәкчесе, «Аҗаган» җитештерү берләшмәсе генераль директоры Артур Габделҗанов фәнни-техник үзәк буенча танышу экскурсиясе үткәрде. Аның барышында депутатларга ишү техникасын имитацияләү һәм камилләштерү өчен тренажер, автомәктәпләр өчен автотренажер, интерактив велотренажер, шулай ук сәнәгать җиһазларын җыю һәм янгын сүндерү өчен VR-тренажер тәкъдим ителде.

Җиһазларны проектлау шулай ук фәнни-техник үзәк инженерларының үз көчләре белән башкарыла, алар соңыннан макетларны җитештерү өчен цехка тапшыралар.   Үзәкнең икенче катында уку-лаборатория җиһазлары җыю үткәрелә.

«Аҗаган» җитештерү берләшмәсе балалар бакчаларыннан һәм мәктәпләреннән башлап, югары уку йортлары һәм эре сәнәгать предприятиеләре үзәкләренә кадәр уку-лаборатория җиһазлары һәм тренажерлар җитештерү, шулай ук юл хәрәкәте кагыйдәләрен өйрәнү һәм балалар юл-транспорт һәләкатен профилактикалау өчен роботлаштырылган комплекслар эшләү белән шөгыльләнә.  

Артур Габделҗанов журналистлар белән әңгәмәдә «Татарстан-яңа гасыр» депутатлар төркеме эшенең бер юнәлеше – яшьләр белән эшләү, дип билгеләп үтте. Нәкъ менә шуңа күрә утырыш бүген «Татарстан – Яңа гасыр» республика иҗтимагый хәрәкәтенең Казанда үз эшен башлаган «Мөмкинлекләр» яшьләр форумы кысаларында уза. "Патриотизм турында сөйләгәндә, син, беренче чиратта, гаилә, Ватан, тәрбия, белем турында сөйлисең. Минемчә, патриотизм нәкъ кеше формалашкан вакытта барлыкка килергә тиеш. Яшьләр белән актив хезмәттәшлек итәргә кирәк, без аларны ишетергә тиешбез, без, өлкәннәр, шул исәптән Дәүләт Советы депутатлары, аларның киләчәге өчен эшләргә тиешбез», – дип ассызыклады Артур Габделҗанов.

 «РФ гражданнарын патриотик тәрбияләү» федераль проектын тормышка ашыруда җитештерү предприятиесе роле турында доклад белән чыгыш ясаганда, Артур Габделҗанов «Аҗаган» хәрби-патриотик спорт уенын яшүсмерләр клубларында яңарту тәкъдиме белән чыгыш ясады. "Безнең предприятие мондый инициатива белән чыгыш ясарга һәм әлеге проектны гамәлгә ашыру өчен ярдәм күрсәтергә әзер», – диде ул.

Депутат Илдар Шамилов, яшьләр форумында катнашучылар алдында чыгыш ясап, «КАМАЗ» ААҖ профсоюз оешмасы мисалында яшьләрдә  гражданлык, патриотик, физик тәрбия турында сөйләде. Предприятие ЛНР һәм ДНР балаларына спонсорлык ярдәме күрсәтә, гуманитар ярдәм җыя, өлкәннәргә һәм балалар йортларына ярдәм итә.

Түгәрәк өстәл модераторы, «Татарстан – Яңа гасыр» республика иҗтимагый хәрәкәте Югары Советы башкарма комитеты рәисе Алсу Тарханова яшьләр форумында катнашучыларга мөрәҗәгать итеп, бүгенге очрашуның депутатлар белән аралашу һәм аларны кызыксындырган сорауларга җавап табу өчен яхшы мөмкинлек булуын билгеләп үтте.

"Өч көн дәвамында яшьләр форумында катнашучылар кураторлар белән эшләячәк, «Татарстан-яңа гасыр» яшьләр хәрәкәте әгъзаларын үстерү планнарын төзиячәк, проектларны тәкъдим итәчәк, шәхси үсеш тренингларын узачак, – диде  Алсу Тарханова. – Республиканың һәр районында «Татарстан-яңа гасыр» хәрәкәтенең яшьләр канаты да булган территориаль бүлеге бар, анда инициатив яшьләр керә, алар арасында эшчеләр,  балалар, студентлар да бар. Әлеге форум балаларга үзләренең лидерлык һәм иҗади сәләтләрен ачарга, аралашырга өйрәнергә, грантлар язу күнекмәләрен үстерергә мөмкинлек бирәчәк. Иртәгә балалар үз районнарында булган сораулар мисалында проектлар язачаклар, аннары проблеманы хәл итү проектын язарга, якларга һәм аны тормышка ашыру өчен акча алырга кирәк булачак. Шулай итеп аларның грантларда катнашу мөмкинлеге барлыкка киләчәк. 

Түгәрәк өстәл эшендә «Татарстан-яңа гасыр» депутатлар төркеме әгъзалары, ТР Дәүләт Советы депутатлары Марат Галиев һәм Ольга Воронова, Казан шәһәренең Киров һәм Мәскәү районнары администрациясе башлыгы урынбасары Денис Сугоняко, «Патриот» республика спорт-патриотик һәм хәрби хезмәткә чакырылуга кадәр әзерлек үзәге директоры Дмитрий Литвинов, ТР Мәгариф һәм фән министры урынбасары Айгөл Кашапова, «Мөмкинлекләр» яшьләр форумында катнашучылар,  ТР Түбән Кама муниципаль районы Иҗтимагый советы рәисе Фәрит Мингариев катнашты.