Бүген Дәүләт Советы утырышында документларның мәҗбүри экземпляры турындагы республика законының 5 һәм 7 статьяларына үзгәрешләр кертү турында закон проекты өч укылышта кабул ителде.  

Документны тәкъдим итеп, ТР Архив эше буенча дәүләт комитеты рәисе Гөлнара Габдрахманова законга үзгәрешләр Татарстан Республикасы документларының мәҗбүри экземпляры составына дәүләт ярдәме чаралары сыйфатында күрсәтелгән республика бюджеты акчаларын кулланып төзелгән документацияне кертүне күздә тота, дип билгеләп үтте. Алар мондый документларны саклау һәм алга таба куллану мөмкинлеге максатында архив фондына оператив һәм тулы күләмдә кертергә мөмкинлек бирәчәк.

Закон бюджет акчаларын кулланып төзелгән документларны бер урында, кулланучының төрле дәрәҗәсен исәпкә алып, гарантияле саклау һәм тәүлек әйләнәсе керү мөмкинлеге биргән бердәм платформада тәртипкә китерергә һәм системалаштырырга мөмкинлек бирәчәк.

Шулай ук, дубляжны булдырмау максатыннан, элекке еллар проектларын анализлау мөмкинлеге барлыкка киләчәк, шуның белән нәтиҗәле идарә карарлары кабул ителәчәк. Моннан тыш, закон кабул итү дәүләт идарәсе, бизнес чыгымнарын киметергә һәм бюджет акчаларын экономияләргә мөмкинлек бирә.

Законда каралган чараларны гамәлгә ашыру нәтиҗәсендә фәнни, тарихи тикшеренүләр һәм хәзерге чорда республика үсешен тулы объектив бәяләү өчен чыганак базасын булдырырга мөмкин булачак.