Алтынчы чакырылыш Дәүләт Советының илле дүртенче утырышы 6 июньдә узачак. Мондый карар бүген парламент Президиумы утырышында кабул ителде. Депутатлар 29 мәсьәлә, шул исәптән 16 республика законы проектын һәм 5 Федераль закон проектын караячак.

Дәүләт Советы Рәисе Фәрит Мөхәммәтшин көн тәртибендәге мәсьәләләрне карау алдыннан соңгы вакыттагы республиканың иҗтимагый-сәяси тормышында парламент депутатлары катнашында узган  берничә мөһим вакыйганы билгеләп үтте. Парламент җитәкчесе «Россия - ислам дөньясы: Kazanforum-2024» ХV халыкара икътисадый форумы нәтиҗәләренә тукталды. Дәүләт Советы Рәисе билгеләп үткәнчә, быел форум дөньяның 87 иленнән 20 меңнән артык катнашучыны, шулай ук 40 дипломатик миссия вәкилләрен җыйган. Фәрит Мөхәммәтшин Дәүләт Советы депутатларына форум кысаларындагы чараларда актив катнашулары өчен рәхмәт белдерде. "Республиканың депутатлар корпусы бу зур һәм җитди эшкә җәлеп ителде, – диде ул, – ә чараның масштабы һәм дәрәҗәсе тагын бер тапкыр Татарстанның потенциалын һәм абруен күрсәтте". Фәрит Мөхәммәтшин шулай ук Санкт-Петербургта узган Россия Закон чыгаручылар советы утырышын, авыл халкының эшлекле активлыгын арттыру һәм кече хуҗалык итү формалары мәсьәләләре буенча зона семинар-киңәшмәләрне, шулай ук "Бердәм Россия"нең алдан тавыш бирү кампаниясен билгеләп үтте.

Дәүләт Советы Секретаре Лилия Маврина билгеләп үткәнчә, киләсе утырышта комитетлар 29 мәсьәлә, шул исәптән 16 Татарстан Республикасы законнары проектын карарга тәкъдим итә. Беренче укылышта 2023 елга республика бюджеты һәм мәҗбүри медицина иминияте фонды бюджеты үтәлеше турындагы закон проектлары, шулай ук ТР Бюджет кодексына һәм җирле үзидарә, Дәүләт Советы депутаты статусы, дәүләт милкен хосусыйлаштыру, урманнардан файдалану, яшьләр сәясәте, мәгариф һәм башка законнарга үзгәрешләр кертүче закон проектлары каралачак.

Көн тәртибендәге иң мөһим мәсьәлә җиденче чакырылыш Дәүләт Советы депутатларын сайлауны билгеләү булачак. "Быел алтынчы чакырылыш Дәүләт Советының чакырылышының вәкаләтләре срогы тәмамлана, – дип искәртте Лилия Маврина. – Татарстан Конституциясенең 75 статьясы һәм Татарстан Республикасы Сайлау кодексының 87 статьясы нигезендә Дәүләт Советына депутатлар сайлау республика парламенты тарафыннан билгеләнә. Татарстан дәүләт хакимияте органнарына сайлауларда тавыш бирү көне – сентябрьнең икенче якшәмбесе, шул көнне әлеге органнарның яки әлеге органнар депутатларының вәкаләтләре сроклары тәмамлана. Сайлау кодексының 87 маддәсе нигезендә сайлауларны билгеләү турында карар тавыш бирү көненә кадәр 100 көннән дә иртәрәк һәм 90 көннән дә соңга калмыйча кабул ителергә тиеш. Шуңа күрә 6 июньдә илле дүртенче утырышта җиденче чакырылыш Татарстан Республикасы Дәүләт Советы депутатларын сайлауны билгеләү мәсьәләсен карарга кирәк".

Лилия Маврина шулай ук киләсе утырышның көн тәртибенә ТР Хисап палатасының 2023 елдагы эшчәнлеге турындагы хисап, Татарстан Республикасы территориясендә яшьләрнең хәле һәм яшьләр сәясәтен гамәлгә ашыру барышы турында ТР Министрлар Кабинеты доклады, 2023 елда Татарстан Республикасында мәгарифне үстерү программаларын гамәлгә ашыру барышы турында ТР Министрлар Кабинеты доклады,  шулай ук ТР Дәүләт Советында КПРФ фракциясенең 2019 елның сентябреннән 2024 елның маена кадәрге чорда эшчәнлеге турында мәгълүмат  кертелүен билгеләп үтте.

«Хөкүмәт сәгате» кысаларында «Татарстанда мәдәни мирас объектларын саклау, файдалану, популярлаштыру һәм Дәүләт саклау чаралары турында» мәгълүмат тыңлау күздә тотыла.

Бүген исә парламентның контроль вәкаләтләре кысаларында Президиум утырышында халыкны транспорт белән тәэмин итү мәсьәләсе каралды. Әлеге мәсьәлә буенча мәгълүмат белән республиканың транспорт һәм юл хуҗалыгы министры урынбасары Айрат Садыйков чыгыш ясады. Айрат Садыйков билгеләп үткәнчә, хәзерге вакытта тармакта 74,7 мең кеше эшли. Тимер юл транспорты белән ташылган пассажирлар саны 6,6 млн кешедән артып китә, һава транспорты белән –5,8 млн кеше. Су транспорты белән 1 млн. пассажир файдаланган. Республиканың пассажир автотранспорт предприятиеләре 2023 елда 290 млн кешене ташыган. 2023 елда, тиешле республика законы кабул ителгәннән соң, 5 меңнән артык такси эшенә рөхсәт бирелгән, легальләштерелгән таксилар саны ике тапкыр арткан.

Теманы дәвам итеп, Торак сәясәте һәм инфраструктура үсеше комитеты рәисе Андрей Егоров Дәүләт Советының "Халыкны транспорт белән тәэмин итү турында"гы Карарын үтәү барышы турында хәбәр итте. "Интенсив торак төзелеше шартларында территориаль һәм транспорт планлаштыруны интеграцияләү мәсьәләләре беренче планга чыга, – дип басым ясады Андрей Егоров. – Хәзерге вакытта министрлык тарафыннан территорияләрнең шәһәр төзелеше, социаль-икътисадый һәм транспорт үсешенең үзара бәйләнешен тәэмин итү өчен тармак өчен мөһим булган документларны эшләтеп җибәрү буенча эш алып барыла. Бу сорауларны мониторинглау комитетның даими контролендә тора.

Президиум утырышында башка мәсьәләләр дә каралды