"Бердәм Россия" җиденче чакырылыш Дәүләт Советы депутатларын сайлауга сайлаучылардан җыелган ышаныч һәм Татарстанда эшләнә торган яхшы эшләр белән бара. Бу хакта бүген Казан шәһәренең С. Сәетгалиев исемендәге мәдәният сараенда узган “Бердәм Россия” Бөтенроссия сәяси партиясенең Татарстан төбәк бүлегенең XXXVI конференциясендә ТР Дәүләт Советы Рәисе, төбәк бүлеге Секретаре Фәрит Мөхәммәтшин белдерде.

 Конференция эшендә партиянең 45 җирле бүлекчәсеннән 249 делегат, шулай ук алдан тавыш бирүдә катнашучылар катнашты. Конференция кысаларында бердәмроссиялеләр җиденче чакырылыш Дәүләт Советы депутатларын сайлауга кандидатлар исемлеген расладылар, шулай ук партиянең сайлау алды программасын тәкъдим иттеләр.

Җиденче чакырылыш Дәүләт Советы депутатларын сайлауларда катнашу буенча “Бердәм Россия” партиясенең Татарстан төбәк бүлегенең бурычлары турындагы төп доклад белән парламент рәисе, партиянең төбәк бүлеге Секретаре Фәрит Мөхәммәтшин чыгыш ясады. Исегезгә төшерәбез, җиденче чакырылыш Дәүләт Советы депутатларын сайлаулар 8 сентябрьдә Бердәм тавыш бирү көнендә узачак.

Фәрит Мөхәммәтшин сайлау кампаниясе бик үк гади булмаган шартларда узачак, дип билгеләде. "Геополитик мәсьәләләр, моңарчы күрелмәгән санкцион басым һәм илебез юлыккан мәгълүмати каршылык тормыш эшчәнлегенең барлык өлкәләренә йогынты ясый", – дип басым ясады Фәрит Мөхәммәтшин. Шуңа да карамастан, парламент башлыгы старт алды кампаниясен иң югары дәрәҗәдә уздырырга чакырды, шулай ук игътибарны республика халкын борчыган актуаль мәсьәләләрне хәл итүгә юнәлтте.

“Аеруча шуны әйтәсем килә, бу бурычларны үтәүгә без оештыру һәм идея-сәяси планда башкарылган шактый гына эшләр белән якынлашабыз, – дип басым ясады Фәрит Мөхәммәтшин. – Безнең сафта 45 җирле һәм 2011 беренчел бүлекчәләрдән  126,7 мең татарстанлы бар. Мондый бердәмлек  республикада бу еллар эчендә бер генә канун да, бер генә әһәмиятле карар да бердәмроссиялеләр катнашыннан башка кабул ителмәвенең нигезе булып тора. Бу, үз чиратында, татарстанлыларның хакимият органнарына булган ышанычын ныгыта. Без «наказларның» күп өлешен үти алдык  – бу халык йөкләмәләренең 80 %ы.

Фәрит Мөхәммәтшин Дәүләт Советы депутатлары эшендә иң мөһим бурычларның берсе дип икътисадый үсешне атады. "Без республика халкының мәнфәгатьләре законнар һәм хакимият тарафыннан  ышанычлы яклануын исбатларга тиеш. Нәкъ менә "Бердәм Россия", иң күп санлы һәм абруйлы партия буларак, инициативалы һәм аеруча әзерлекле, үз төбәкләре, туган Татарстаныбыз һәм тулаем Россия мәнфәгатьләрендә максималь эшләргә әзер булган лаеклы кешеләрне тәкъдим итә ала. Без – илдә 15 ел дәвамында кандидатларны алдан тавыш бирү юлы белән сайлап алуга ачык, үтәкүренмәле һәм көндәшлек белән якын килүче бердәнбер партия", – дип билгеләп үтте Фәрит Мөхәммәтшин.

Дәүләт Советы Секретаре Лилия Маврина бердәм республика округы һәм бер мандатлы сайлау округлары буенча VII чакырылыш ТР Дәүләт Советына депутатлыкка кандидатлар тәкъдим итү мәсьәләсе буенча чыгыш ясады, шуннан соң яшерен тавыш бирү булды. Бердәм республика партия исемлеге буенча 58 кандидат тәкъдим ителгән, тагын 50 кеше бер мандатлы округлар буенча.

Конференция эшендә РФ Дәүләт Думасы депутаты, партиянең Идел буе төбәкара координация советы җитәкчесе урынбасары Олег Димов катнашты. "Партиянең Татарстан төбәк бүлеге – илдә иң яхшысы, – дип ассызыклады ул, журналистлар белән аралашканда конференция эшенә йомгак ясап, – партия һәм ил һәрвакыт сезнең бүлеккә таяна, чөнки бүгенге көнгә кадәр Татарстан һәрвакыт сайлау нәтиҗәләре буенча да, башка күрсәткечләр буенча да яхшы нәтиҗәләр бирде. Без сайлау барышында партиянең төбәк бүлеге үз позицияләрен саклап калыр һәм тагын да ныгытыр дип өметләнәбез. Без беркемгә дә җиңелү теләмибез, әмма үзебезгә җиңү телибез. Татарстан Рәисе Рөстәм Миңнеханов Дәүләт Советының «Бердәм Россия» фракциясенә таянып республика өчен мөһим карарлар кабул итә алсын өчен безгә ышанычлы җиңү кирәк».

"Без республика халкы арасында "Бердәм Россия"нең ышанычын һәм абруен арттыра алдык, нәкъ менә шуңа күрә Татарстан алга таба да уңышлы үсеш алсын, тиешле бурычларны хәл итсен,  ә "Бердәм Россия" сәяси партиясе республикада һәм илдә терәк партия булып калсын өчен бу ышанычны саклап калу һәм ныгыту бурычы белән барабыз, – дип басым ясады Фәрит Мөхәммәтшин журналистларның сорауларына җавап биреп. – Мин безнең сайлаучылар, республикабызда яшәүчеләр булачак сайлауларда актив катнашырлар дип ышанам".

Республика башлыгы шулай ук "сәяси көрәштә барысы да актив катнашачак" дип билгеләп үтте. "Без үз позициябез белән риза булмаган кешеләрне дә ишетергә тиеш. Минемчә, барлык партияләр дә лаеклы чыгыш ясаячак. Республика һәм аның һәр кешесе файдасына тупланган тәҗрибәдән файдалану өчен һәркем сайлаучылар тавышы өчен көрәшәчәк дип уйлыйм», – дип ассызыклады Фәрит Мөхәммәтшин.

Конференция делегатлары шулай ук “Бердәм Россия” Татарстан төбәк бүлегенең сайлау берләшмәсенең вәкаләтле вәкилләрен билгеләделәр, шул исәптән финанс мәсьәләләре буенча да, шулай ук башка мәсьәләләрне карадылар.