Бүген «Татар-информ» мәгълүмат агентлыгында республика массакүләм мәгълүмат чаралары вәкилләре өчен Татарстан Республикасы Дәүләт Советы каршындагы Яшьләр парламентына сайлауларны оештыру һәм уздыру мәсьәләләре буенча матбугат конференциясе узды. Журналистларның сорауларына Дәүләт Советы Рәисе урынбасары, Яшьләр парламентына сайлауларны әзерләү һәм үткәрү буенча оештыру комитеты җитәкчесе Юрий Камалтынов, ТР яшьләр эшләре буенча министр урынбасары Айгөл Сабирова һәм агымдагы чакырылыш Яшьләр парламенты рәисе Нина Шимина җавап бирделәр.

Беренче чакырылыш Яшьләр парламенты эшчәнлеген югары бәяләп, Юрий Камалтынов киләчәктә кайбер закон проектларының нигезенә салынган тәкъдимнәре һәм инициативалары өчен аның әгъзаларына рәхмәт белдерде. "Яшьләр парламенты киңәш бирүче, консультатив орган булса да, ул хәл итә торган бурычлар безнең җәмгыять өчен бик мөһим, - дип билгеләп үтте Дәүләт Советы Рәисе урынбасары. - Бүген яшьләрнең ничек яшәвен аңлау мөһим, ә яшьләрнең үзләренә караганда бу хакта беркем дә яхшырак һәм аңлаешлы итеп сөйләмәячәк. Үз утырышларында, комитетларында Яшьләр парламенты иң актуаль мәсьәләләрне тикшерә, аларны республика дәрәҗәсенә чыгара. Шуңа күрә ышаныч белән әйтергә мөмкин, Яшьләр парламенты яхшы мәктәп булып кала, алар анда күрә белергә һәм анализларга гына түгел, ә шулай ук яхшы идеяләр һәм тәкъдимнәр эшләргә да өйрәнәләр".

Юрий Камалтынов шулай ук Яшьләр парламентына булачак сайлауларда республика, район, шәһәр язмышына битараф булмаган иң актив егетләр һәм кызлар катнашачагына ышаныч белдерде. "Дәүләт Советында без икенче чакырылыш Яшьләр парламентына сайлауларда республиканың барлык районнарыннан һәм шәһәрләреннән мөмкин кадәр күбрәк яшьләрнең катнашу мәсьәләсенә, шулай ук аның сыйфатлы составына җитди карыйбыз, - дип билгеләп үтте Юрий Камалтынов. - Безгә актуаль бурычларны хәл итү буенча конкрет тәкъдимнәр һәм инициативалар эшләргә сәләтле актив, чынлап торып эшләүче яшьләр парламенты кирәк".

Беренче чакырылыш Яшьләр парламенты рәисе Нина Шимина журналистларга районнардан, иҗтимагый оешмалардан, шулай ук үз-үзләрен тәкъдим итүчеләрдән кандидатларны күрсәтү, аларны теркәү, электрон тавыш бирү тәртибе һәм сроклары турында сөйләде. Аның сүзләренә караганда, Яшьләр парламенты 100 кешедән төзелә, шул исәптән 45 муниципалитет вәкиле, 35 яшьләр һәм балалар иҗтимагый берләшмәләре, коммерциячел булмаган оешмалар, сәяси партияләр вәкилләре, 20 үз-үзен тәкъдим итүчеләр. "Кандидатларның гаризалары 9-18 август көннәрендә molparlament.tatar сайтында кабул ителәчәк, - дип искә төшерде Нина Шимина. - 19-30 августка дебатларда катнашу һәм «үз тирәмдә дөньяны үзгәртәм» видеоролигын бастыру планлаштырыла. Ә кандидатлар өчен тавыш бирү үзе «ачык Татарстан» порталында 2-6 сентябрьдә узачак. Тавыш бирү нәтиҗәләре 7-11 сентябрьдә бастырылачак".

ТР Яшьләр эшләре буенча министр урынбасары Айгөл Сабирова 19 августтан 30 августка кадәр республиканың 7 шәһәрендә узачак «Синең чират» зона форумнары турында сөйләде. Форумнар 19 августта Яшел Үзәндә якын-тирәдәге муниципаль берәмлекләр катнашында башланачак, ә финал 30 августта Казанда узачак.