Бүген Казанда, Салих Сәйдәшев исемендәге зур концерт залында Россия Федерациясе Прокуратурасы университеты филиалы Казан юридик институты студентларына тантаналы төстә студент билетлары тапшырылды. Белем көне һәм югары уку йорты тарихында яңа этап белән мөгаллимнәрне һәм студентларны Дәүләт Советы Рәисе Фәрит Мөхәммәтшин, Россия Федерациясе Генераль прокуроры урынбасары Юрий Пономарёв, Россия Федерациясе Хөкүмәте каршындагы Закон чыгару һәм чагыштырма хокук белеме институты директоры, Россия Фәннәр академиясе президенты урынбасары, Россия Фәннәр академиясе галиме Талия Хәбриева, Россия Федерациясенең Прокуратура университеты ректоры Игорь Мацкевич котлады.

Быел Россия Прокуратура университеты филиалы Казан юридик институты беренче тапкыр студентларны көндезге укуга кабул итте. Быелдан башлап институтка суд һәм прокурор эшчәнлеге белгечлеге буенча кадрлар әзерләү мөмкинлеге бирелде,  25 кеше белем алачак. Моңа кадәр университет прокурор хезмәткәрләренең квалификациясен күтәрү үзәге булып торган.

Фәрит Мөхәммәтшин билгеләп үткәнчә, Казан юридик институты бүген прокуратура органнары өчен югары квалификацияле кадрлар әзерләү буенча мөһим бурычны үти. Парламент җитәкчесе беренче курс студентларына югары класслы белгечләр һәм прокурор күзәтчелегенең гасырлар буе дәвам иткән традицияләренә лаеклы иярүчеләр булу өчен җитди әзерлек алуларын теләде.

"Шуны истә тотыгыз: прокурор хезмәткәре кирәкле профессиональ сыйфатларга ия булудан кала, ул шәхси һәм иҗтимагый әхлак идеалларына хезмәттә генә түгел, аннан тыш та хезмәт итәргә, үрнәк булырга тиеш", - дип басым ясады Фәрит Мөхәммәтшин.

Дәүләт Советы рәисе әйтүенчә, институт юридик җәмәгатьчелеккә үзенең фәнни казанышлары һәм атаклы чыгарылыш укучылары белән билгеле, алар арасында Россия Федерациясе төбәкләрендә, республика шәһәр һәм районнарында прокурорлар һәм күзәтчелек органнары хезмәткәрләре, башка хокук саклау органнары хезмәткәрләре дә шактый.

 «Прокуратураның роле бүген аеруча әһәмиятле, алар яшәешнең барлык тармакларында катнаша», - дип белдерде Фәрит Мөхәммәтшин. - Парламент белән Татарстан Прокуратурасының күпьеллык нәтиҗәле хезмәттәшлеге, республика прокурорының Дәүләт Советы утырышларында даими катнашуы инде күркәм традициягә әйләнде, бу закон чыгару эшчәнлеген тәэмин итүдә нәтиҗәлелекне күрсәтте».

Россия Федерациясе Генераль прокуроры урынбасары Юрий Пономарёв Россиянең Генераль прокуроры һәм шәхсән үз исеменнән Татарстан Республикасы Рәисе Рөстәм Миңнехановка, республика парламенты һәм Хөкүмәтенә, профильле хакимият органнары хезмәткәрләренә университетның Казан филиалын үстерү буенча инициативаларны һәрьяклап хуплаганнары өчен рәхмәт белдерде.

 "Бу ведомство системасы өчен кадрлар әзерләүдә , Татарстан Республикасының һөнәри юридик мохитен үстерү өчен дә мөһим адым. Казан – традицияләрне саклаган һәм яңа идеяләр туа торган шәһәр. РФ Генераль прокуроры карары буенча, специалитет программасын ачу юридик белем бирү һәм хокук нигезләрен куллану системасында төбәкнең әһәмиятен ассызыклый", - дип билгеләп үтте РФ Генераль прокуроры урынбасары.

Аудитория каршында чыгыш ясаганда, Россия Фәннәр академиясе президенты урынбасары, Россия Фәннәр академиясе академигы Талия Хәбриева Казан юридик мәктәбенең зур ролен билгеләп үтте. «Казан юридик мәктәбе бик көчле, практик юристны да, югары класслы хокук белемен өйрәнүчене дә осталыкка өйрәтү үзәге булып тора", - дип ассызыклады ул.

Студент билетларын тапшыру тантанасында ТР Премьер-министры урынбасары Ләйлә Фазлыева, Татарстан Республикасы прокуроры Альберт Суяргулов, Казан федераль университеты ректоры Ленар Сафин катнашты.