Бүген Дәүләт Советы утырышында Административ хокук бозулар турында республика кодексының 3.2 һәм 3.16 статьяларына үзгәрешләр кертү хакында закон проекты беренче укылышта һәм тулаем кабул ителде. Закон проекты урамда сатуны оештыру тәртибен бозган өчен административ җаваплылыкны көчәйтүне, шулай ук түләүле муниципаль парковкада транспорт чараларын урнаштырган өчен түләмәгән өчен штраф күләмен арттыруны күздә тота.

Законлылык һәм хокук тәртибе комитеты рәисе Александр Чубаров билгеләп үткәнчә, бүген гамәлдә булган штраф санкцияләре үтемле түгел. «Өч мең сумлык штраф сәүдәгәрләр өчен җитди җәза түгел, – дип ассызыклады ул. – Штраф түләгәннән соң сәүдәгәрләр элекке урыннарында законсыз эшчәнлекләрен дәвам итәләр. Шулай ук судлар тарафыннан түләүле муниципаль парковкада транспорт чараларын урнаштырган өчен түләмәүгә кагылышлы Административ хокук бозулар турында кодекс нормаларын аңлатуда проблема бар».

Эшләнелгән закон белән бу максатлар өчен билгеләнмәгән урыннарда сәүдә иткән яки халыкның күңелен ачуга бәйле хезмәтләр күрсәткән өчен һәм стационар булмаган сәүдә объектларын урнаштыру тәртибен бозган өчен административ штрафларны арттыру тәкъдим ителә. Гражданнар өчен максималь штрафлар – биш мең сум, вазыйфаи затлар өчен – илле мең сум, юридик затлар өчен-бер миллион сум тәшкил итәчәк.

Александр Чубаров сүзләренә караганда, муниципаль парковкалардан түләүле нигездә файдалану тәртибен нәтиҗәлерәк хокукый җайга салу максатларында ТР Административ хокук бозулар турында кодексның 3.16 статьясына – «Түләүле муниципаль парковкада (парковка урыннарында) транспорт чараларын урнаштырган өчен түләмәү» матдәсенә – үзгәрешләр кертергә тәкъдим ителә. ТР Административ хокук бозулар кодексының 3.16 статьясында түләүле муниципаль парковкадан файдаланган өчен түләүнең төгәл вакыты булмау сәбәпле, түләүле муниципаль парковкада транспорт чараларын урнаштыручы затлар, үзләренең җәзасызлыгын аңлап, машиналарны чикләнмәгән күләмдә калдыралар, парковкадан файдаланган өчен тулысынча түләмиләр. Шуның белән гражданнарның түләүле муниципаль парковкада транспорт чарасын куюда намуслы һәм закон тыңлаучан гражданнарның хокуклары чикләнә.

Югарыда бәян ителгән закон проекты белән Административ хокук бозулар турында Татарстан Республикасы кодексының 3.16 статьясына үзгәрешләр кертелә, алар түләүле муниципаль парковкаларда (парковкадагы урыннарда) транспорт чарасын куйган өчен түләмәүдә чагылган яисә муниципаль хокукый актта билгеләнгән суммадан кимрәк күләмдә түләү кертүдә, йә парковкада билгеләнгән парковкадан файдаланган өчен түләү срогыннан соңрак түләгән өчен җаваплылыкны күздә тота.