Бүген мәшһүр режиссер, Галиәскәр Камал исемендәге татар дәүләт Академия театрының элеккеге режиссеры, легендар шәхес Марсель Сәлимҗановка истәлек тактасы ачылды. Аны күренекле татар режиссеры гомерен соңгы 7 елда уздырган урын - Казанның Чехов урамындагы 53 нче йорт диварына урнаштырдылар. Тантаналы чарада Татарстан Дәүләт Советы Рәисе урынбасары Марат Әхмәтов катнашты.  

«Мондый чараларга бик җитди карыйбыз, чөнки милләтебез татарның эчтәлеген, рухын ача торган шундый талантлы шәхесләргә бик бай. Кайчакта аларны күреп бетерә алмаган чакларыбыз да күп була. Марсель ага шундый зур шәхесләребезнең берсе», диде Марат Әхмәтов.

«Марсель Сәлимҗанов һәм шул вакыт дәрья булып кайтып төшкән щепкинчылар берсен-берсе тулыландырып Камал театрын төрки дөньяның иң дәрәҗәле милли театры дәрәҗәсенә күтәрделәр. Биредә хәзер аларның дәвамчылары басып тора», - диде ул йорт янына җыелган Камал театры труппасына ишарәләп.

Марат Әхмәтов чыгышын бөек шәхесләребезне исән вактыларында ук зурлый белергә кирәклеге турында уйлар һәм яңа бинага күченү турында якты хыяллар белән тәмамлады.

Марсель Сәлимҗановка истәлек тактасы ачуда Камал тетарының баш режиссеры Фәрит Бикчәнтәев катнашты. «Марсель Сәлимҗанов сезнең остазыгыз иде, диләр. Шуны әйтә алам: ул бүген дә минем остазым. Чөнки Марсель Сәлимҗанов турында уйламаган көнем юк, моны ихластан әйтәм. Бу очракта ул ничек эшләр иде икән дип уйлыйм, күңелемнән аның белән киңәшләшәм. Яшьләргә дә аның турында еш сөйлим», - диде ул.

«Без күршеләр идек, аларда еш була идек, улыбыз Йосыф та гел аларда еш була иде, шуңа күрә Марсель абыйның йогынтысы аңа да иңде», - дип искә алды ул.

Фәрит Бикчәнтәев әлеге мемориаль тактаны урнаштыру мөмкинлеген булдырган республика җитәкчелегенә рәхмәтләрен ирештерде.

 Чыгышының азагында Туфан Миңнуллинның «Бөекләребезнең кадерен белсәк, бөек халык булып, милләт булып озак-озак яшәрбез әле» дигән сүзләрен искә төшерде.