Татарстан Республикасы Рәисе Рөстәм Миңнеханов парламент депутатларын һәм ветераннарын, республика халкын әһәмиятле вакыйга – Татарстан Республикасы Дәүләт Советы эшчәнлегенә  30 ел тулу уңаеннан  котлый.

«Узган өч дистә ел эчендә парламентаризмның ныклы хокукый нигезе салынды, Россия Федерациясенең алгарышлы, терәк төбәге буларак, Татарстанның социаль-икътисадый үсеше өчен шартлар булдырылды, – дип билгеләп үтә Рөстәм Миңнеханов. –  Бу еллар дәвамында Дәүләт Советы республикабызның һәм тулаем илебезнең  үсешендә, законнар базасын камилләштерүдә, икътисадка һәм социаль өлкәгә, фәнгә һәм мәгарифкә, сәламәтлек саклауга һәм мәдәнияткә кагылышлы гаять мөһим бурычларны хәл итүдә һәрвакыт бик зур роль уйнады. Дәүләт Советының барлык чакырылыш депутатлары кешеләрнең мәнфәгатьләрен кайгыртуны, алар тормышындагы четерекле мәсьәләләрне һәрчак игътибар үзәгенә куеп эш итәләр, ветераннарга,  пенсионерларга, күп балалы гаиләләргә, яшьләргә булышу өчен күп тырышлык куялар. Илебез зур сынаулар аша узган хәзерге вакытта Татарстан парламенты депутатларының махсус хәрби операциядә катнашучыларга  һәм сугыш хәрәкәтләре ветераннарына, аларның гаиләләренә актив ярдәм күрсәтүе зур ихтирамга лаек».

«Белемегез,  тупланган тәҗрибәдән файдаланып, җаваплылык белән эшләвегез, башкарма хакимият, Россия Федераль Собраниесе палаталары һәм иҗтимагый берләшмәләр белән  нәтиҗәле эшчәнлек алып баруыгыз сезгә алга таба да халыкка намус белән хезмәт итәргә, күпмилләтле Ватаныбыз мәнфәгатьләрендә үзегезгә йөкләнгән вазыйфаларны тайпылышсыз үтәргә мөмкинлек бирер дип ышанам», – дип белдерә республика Рәисе һәм зур уңышлар тели.