Бүген Яр Чаллыда «Бердәм Россия» депутат берләшмәләренең республика координация советының күчмә утырышы узды, анда бердәмроссиялеләр автошәһәрнең сәнәгать потенциалын үстерү мәсьәләләре һәм шәһәрдә гамәлгә ашырыла торган партия проектлары турында фикер алыштылар. Утырышны Дәүләт Советы Рәисе урынбасары, республика Дәүләт Советында «Бердәм Россия» фракциясе җитәкчесе Юрий Камалтынов үткәрде.

Яр Чаллы мисалында экспертлар депутат фракцияләренең территорияләрне социаль-икътисадый үстерү программаларын гамәлгә ашырудагы эш тәҗрибәсе турында фикер алыштылар. Инвестицияләр җәлеп итүнең нәтиҗәле механизмы булган  «Яр Чаллы»ның алгарышлы үсеш территориясе турында шәһәр мэры Наил Мәһдиев сөйләде.

Чаллы шәһәре Россиянең барлык моношәһәрләре арасында беренче, ә алар барлыгы 321, алгарышлы үсеш территориясе статусын алды. Бу режимда автоград инде 9 ел эшли. Бүгенге көндә 50 компания алгарышлы үсеш территориясенең резиденты булдып тора, 10 меңнән артык эш урыны булдырылган. 

Дәүләт программаларында һәм илкүләм проектларда катнашу нәтиҗәсендә соңгы 6 елда гына Яр Чаллыда театрлар, мәктәпләр, балалар бакчалары, спорт мәйданчыклары төзелгән.

Башкарма хакимият һәм депутатлар корпусы партия проектларын гамәлгә ашыру юлы белән халыкның тормыш сыйфатын күтәрү белән актив һәм нәтиҗәле шөгыльләнәләр. Юрий Камалтынов фракциянең Яр Чаллыдагы эшен югары бәяләде. Ул җыелышта катнашучыларга Чаллының эш тәҗрибәсен өйрәнергә тәкъдим итте.

«Төрле дәрәҗәдәге депутатларның үзара хезмәттәшлеге күзлегеннән караганда, Яр Чаллы һәркем өчен үрнәк булып тора. Монда депутатларны актив рәвештә эшчәнлеккә җәлеп итәләр. Депутатның нинди мандаты булуга карамастан, федераль, республика яки җирле депутатмы, барысы бер максатка – бер зур шәһәр командасы булып конкрет бурычларны хәл итүгә юнәлдерелгән», – дип билгеләп үтте Юрий Камалтынов.

Депутатлар шулай ук Чаллы шәһәр Советында партия фракциясе эше һәм шәһәрдә гамәлгә ашырыла торган партия проектлары турында фикер алыштылар. Алар турында «Бердәм Россия»нең җирле бүлекчәсе башкарма секретаре Римма Фәсхетдинова сөйләде.

Махсус хәрби операция башлану һәм яңа территорияләр кушылу белән «Безнекеләр өчен» яңа партия проекты гамәлгә ашырыла башлаган, ул шефлыкка алынган төбәкләрнең үзенчәлекле балаларына ярдәм итүгә юнәлдерелгән. Әйтик, 2023 елда Лисичанскида 31 баланы диагностикалаганнар. 2024 елда 16 бала белән интенсив терапия курсы уздырганнар. Яр Чаллыда гаиләләре белән 25 бала терапевтик дәвалану һәм тернәкләндерү узган.

Партия проектларын гамәлгә ашыруның тагын бер мисалы – «Сидоровка» иҗтимагый киңлеге. Проект 2015 елдан башлап Дәүләт Советы депутаты Марсель Мингалимов һәм шәһәр Советы депутатлары Рубин Бадиков белән Илгиз Юнысов җитәкчелегендә эшли башлаган. Микрорайонда «Безнең ишегалды» программасы кысаларында иҗтимагый урыннар төзекләндерелгән, имин мохит шартлары тудырылган. Зур булмаган бистәдә яшәүчеләрнең үз паркы, балалар мәйданчыклары, урам тренажерлары барлыкка килгән. Биредә өмәләр, мәдәни-массакүләм һәм ял итү чаралары уза.

«Юридик бюро», медицина өлкәсе белән таныштыручы «Яшь медиклар» кебек һөнәри юнәлешле проектлар да эшли. «Пульста!» партия проекты шәһәр халкына беренче ярдәм күрсәтүгә өйрәтүгә юнәлдерелгән. Эшмәкәрлек лабораториясе укучыларга бизнес-өлкә нигезләрен белергә ярдәм итә. "Мин – Чаллы кешесе! Ми – гражданин!» проекты 14 яшьлек яшүсмерләргә тантаналы шартларда паспорт алырга һәм аларны шәһәрнең иҗтимагый тормышына җәлеп итәргә мөмкинлек бирә.

Күчмә җыелыш кысаларында «Хайер», «КИП «Мастер» индустриаль паркларында, «Камский» АПКсында булдылар.