Бүген Кукмара районының ЗАГС бүлегендә озак еллар бергә гомер иткән юбилярларны котлау тантанасы узды. Чара «Бердәм Россия көне» партия проекты кысаларында үткәрелде.  50 ел бергә гомер иткән Хәбибуллиннар, Нуриевлар һәм Миңнекәевләр гаиләсен Дәүләт Советы Рәисе, «Бердәм Россия» Бөтенроссия сәяси партиясенең Татарстан төбәк бүлеге Секретаре Фәрит Мөхәммәтшин котлады.

Юбилярлар сәхнәгә Мендельсон маршы астында чыктылар, залда аларны балалары һәм оныклары каршы алды. Гаиләләр илле еллык юбилейларын үз имзалары белән ныгыттылар, шуннан соң аларны гаилә тормышы юбилярлары дип игълан иттеләр.

«Бүген ир белән хатын өчен генә түгел, зур гаилә өчен дә бик дулкынландыргыч вакыйга,  –  дип билгеләп үтте Фәрит Мөхәммәтшин, юбилярларга мөрәҗәгать итеп, – үз ярыгызны табып сез 50 ел бергә бай һәм лаеклы тормыш юлы уздыгыз, балалар үстердегез, оныклар тәрбияләдегез, бу зур бәхет. Мондый гаиләләр – безнең дәүләтнең терәге».

«Уртак тормыш - ул да зур хезмәт,  – дип басым ясады Фәрит Мөхәммәтшин,  –  бу хакта ишетеп кенә белмим, чөнки тормыш иптәшем Луиза Акрамовна белән инде менә 54 ел гомер итәбез. Кайда һәм нинди вазыйфаларда эшләсәм дә, ул һәрвакыт минем өчен терәк булды».

Кукмара районы башлыгы Сергей Димитриев юбилярларга озын гомер, бәхет һәм гаилә иминлеге теләде. «Балаларыгыз һәм оныкларыгыз сезне сөендереп кенә торсын!» , – диде ул. 

Гаиләләрне  әлеге юбилей белән Дәүләт Думасы депутаты Анатолий Иванов та котлады. «Сез Кукмара районының икътисадын һәм авыл хуҗалыгын үстерү өчен күп көч куйдыгыз,  – дип ассызыклады ул, – шул ук вакытта мин, барыннан да элек, балалары һәм оныклары күп булган зур гаиләләр булуга аеруча шатмын».

Харис Ибраһим улы  белән Фәния Басыйр кызы Хәбибуллиннар мәктәп елларында ук танышканнар, шуннан соң инде аерылышмаганнар. Харис Хәбибуллин армиядән кайткач яшьләр өйләнешәләр. Харис Ибраһим улы  төзелеш компаниясендә, ә Фәния Хәбибуллина ашханәдә пешекче булып эшләгән. Ир белән хатын ике бала һәм җиде онык үстергәннәр.

Рафаэль Гали улы һәм Валентина Ишим кызы Нуриевлар гомер буе Кукмара районының Починок-Кучук авылындагы «Дружба» колхозында хезмәт куйганнар. Рафаэль Гали улы  – тракторчы, Валентина Ишим кызы сыер савучы булып эшләгән.  Мәхәббәт һәм татулыкта ир белән хатын дүрт бала үстергәннәр. Бүген Нуриевларның зур һәм тату гаиләсендә 10 онык үсә.

Анатолий Тимергали улы һәм Минҗамал Габит кызы Миңнекәевләр Кукмара районының Яңа Каенсар авылында туганнар. Икесе дә гомер буе туган «Гигант» колхозында хезмәт куйганнар:  ир – механизатор,  ханым – сыер савучы.  Аларның күпьеллык хезмәте күп санлы грамоталар белән билгеләнгән. Ир белән хатын дүрт бала тәрбияләп үстергәннәр, хәзер зур гаиләдә оныклар үсеп килә. 

Фәрит Мөхәммәтшин барлык юбилярларга ныклы сәламәтлек, уңышлар һәм иминлек теләде.