Бүген Дәүләт Советы утырышында икенче һәм өченче укылышларда «Татарстан Республикасында креатив (иҗади) индустрияләрне үстерү турында» закон кабул ителде. Исегезгә төшерәбез, алдагы сессиядә әлеге закон проекты Дәүләт Советында тәкъдим ителмәгән «парламентта булмаган» партияләр вәкилләре катнашында беренче укылышта каралды.

Закон креатив икътисадны үстерүгә һәм гражданнарның иҗади һәм интеллектуаль потенциалы нигезендә үз-үзләрен табу өчен шартлар тудыруга юнәлдерелгән. Документ креатив индустрияләр субъектларының эшчәнлек шартларын һәм дәүләт ярдәме формаларын билгели, Татарстан дәүләт хакимияте органнарының креатив (иҗади) индустрияләр өлкәсендәге вәкаләтләрен билгели.

Законны эшләүнең максаты креатив эшмәкәрлекне, мәдәни һәм туристик потенциалны үстерүне стимуллаштыру, мәдәни мирасны саклап калу, республикада гражданнарның иҗади үзбилгеләнүе өчен уңай шартлар тудыру.

Икътисад, инвестицияләр һәм эшмәкәрлек комитеты рәисе Рәгать Хөсәенов искәрткәнчә, закон проектына төзәтмәләр 3 апрельгә кадәр кабул ителгән. "Билгеләнгән вакыт эчендә Комитетка төзәтмәләр кермәде, - дип билгеләп үтте профильле комитет башлыгы. - Шул ук вакытта комитет тарафыннан редакцион-аныклау характерында булган алты төзәтмә кертелде, алар законның асылын үзгәртми".

Кабул ителгән закон креатив индустрияләрне субъектларга кертү критерийларын, мондый критерийларга туры килүне раслау, креатив индустрия субъектлары реестрын булдыру һәм алып бару тәртибен регламентлаштыра торган күп кенә закон асты актларын чыгаруны күздә тота.