Дәүләт Советы депутатларының округларда эше дәвам итә. Бу атнада парламентарийлар гражданнарны кабул иттеләр, республиканың гомуми белем бирү учреждениеләрендә булдылар, ветераннарны Бөек Ватан сугышында Җиңүнең 80 еллыгы белән котладылар, махсус хәрби операция зонасына гуманитар ярдәм җибәрделәр.  

24 апрель көнне Дәүләт Советы депутатлары Андрей Ляпунов һәм Руслан Нигъмәтуллин Яр Чаллыдан махсус хәрби операция уздыру зонасына  гуманитар ярдәмнең яңа партиясен оештыруда һәм җибәрүдә катнаштылар. 34 тонна авырлыктагы йөк хәрби хезмәткәрләр хезмәт итә торган өч юнәлеш буенча илтелә. Йөк составында – азык-төлек, пилотсыз очкычлар, тепловизорлар, су асты көймәләренә каршы чаралар, мотоцикллар һәм медикаментлар.

24 апрельдә Дәүләт Советы депутаты Евгений Солтанов Бөек Ватан сугышы ветераны Зоя Ярмицкаяны Бөек Җиңүнең 80 еллыгы белән котлады һәм истәлекле бүләкләр тапшырды. Зоя Ярмицкая 1932 елда туган, Ленинград блокадасын кичерә, соңрак аны Казанга эвакуациялиләр.

24 апрельдә Казанда «Георгий тасмасы» патриотик акциясе узды, анда Дәүләт Советы депутаты Руслан Шиһабетдинов катнашты. Илдәге иң зур Георгий тасмасын 300 метр озынлыкта җәелдерү өчен меңнән артык кеше берләште. Чараны партиянең Казан җирле бүлеге, Казанның балалар һәм яшьләр эшләре комитеты һәм «Сугышчы» хәрби-спорт әзерлеге үзәгенең төбәк бүлеге ярдәмендә «Бердәм Россиянең Яшь Гвардиясе»нең  Татарстан төбәк бүлеге оештырды. Акциядә яшь гвардиячеләр, югары һәм урта уку йортлары студентлары, мәктәп укучылары, иҗтимагый оешмалар активистлары, эшче яшьләр катнашты. Шул ук көнне «Бердәм Россиянең Яшь Гвардиясе» активистлары Җиңү символын – Георгий тасмаларын халыкка өләште.  

"Бүген без бергәләп Бөек Ватан сугышында җиңү яулаган ата-бабаларыбыз истәлегенә хөрмәт йөзеннән өч йөз метрлы Георгий тасмасын суздык. Ил буйлап Георгий тасмаларын тарату башланды", - дип сөйләде Руслан Шиһабетдинов.

23 апрель көнне Дәүләт Советы депутаты Ренат Фазылов катнашында махсус хәрби операция зонасына чираттагы гуманитар ярдәм төяп озатылды. Йөк "Ярдәм янәшә", “Халык фронты”  хәрәкәте активистлары, волонтер-медиклар белән берлектә формалаштырылган. Херсон өлкәсенә «Лада -Ларгус» автомобиле, квадроцикл, төзелеш материаллары, сугышчыларыбыз өчен медицина аптечкалары җибәрелде. 

«Покровск юнәлешендә барган сугышларда катнашучы якташларыбызга чираттагы  “Лада Ларгус" автомобилен тапшырдылар.  Әлеге автомашина Республика суд-медицина экспертизасы бюросы тарафыннан файдаланылган һәм «Халык фронты»на тапшырылган булган.  Автомобиль тулы техник хезмәт күрсәтү узган һәм хәрби бурычларны үтәргә әзер", –  дип белдерде Ринат Фазылов.

23 апрель көнне Законлылык һәм хокук тәртибе комитеты рәисе урынбасары, Россия Герое Рәсим Баксиков Биектау районында узган «Герой юлы» патриотик велоузышында катнашты. Чараны Ватанны саклаучылар елына һәм Бөтенроссия велосипедчылар көненә багышладылар. "Мин велоспортны бик яратам. Иртәне җиңел зарядкадан башлыйм, көрәш белән мавыгам. Шулай булгач, сезнең белән йөрү үзе бер рәхәтлек бирә», — дип белдерде Рәсим Баксиков старт алдыннан. Аның белән бергә маршрутка Биектау районы СВО ветераннары да чыкты. Патриотик велоузышның дистанциясе 1,5 чакрым тәшкил итте. Финишта Рәсим Баксиков барысына да рәхмәт белдерде һәм истәлекле медальләр тапшырды.

Шул ук көнне Рәсим Баксиков 6 нчы мәктәптә булды, анда укучылар белән очрашты, патриотизмның мөһимлеге, ни өчен үз илеңнең тарихын белергә кирәклеге турында сөйләде. "Сезнең киләчәгегез  –  сезнең кулларда. Һәм сезнең нинди булып үсүегезгә бөтен илнең язмышы бәйле",  – дип мөрәҗәгать итте ул укучыларга.

21 апрельдә Законлылык һәм хокук тәртибе комитеты рәисе урынбасары, Россия Герое Рәсим Баксиков Лаеш районының Никольск гомуми белем бирү мәктәбендә булды, анда 7-11 сыйныф укучылары белән очрашты һәм Бөек Ватан сугышында Җиңүнең 80 еллыгына багышланган иҗади эшләр күргәзмәсен карады. "Күренеп тора, егетләр чыннан да үз илләренең тарихы белән мавыгалар һәм кызыксыналар. Миңа мәктәптә патриотик тәрбия буенча эш ничек алып барылуы турында сөйләделәр,  һәм мин моның сүздә генә түгел икәнен үз күзләрем белән күрдем,  монда бу чыннан да тормышның бер өлеше»,  –  дип белдерде Рәсим Баксиков.

17 апрельдә Социаль сәясәт комитеты рәисе урынбасары Ольга Воронова Халыкара сервис көллиятенең 100 еллыгына багышланган бәйрәмдә «Профессионалитетта безнең 1000 көн!»  кластерында катнашучыларны сәламләде.  Ольга Воронова көллияттә «Профессионалитет» федераль проектының «Туризм һәм хезмәт күрсәтү өлкәсе» урта һөнәри белем бирү кластеры эшләвенә игътибар итте, аның кысаларында быел үз эшенең булачак профессионаллары өчен яңа лабораторияләр һәм уку полигоны ачылган. Депутат булачак профессионалларны тәрбияләүләре өчен директор Фәридә Ковалевага һәм көллият коллективына рәхмәт белдерде.

17 апрельдә Икътисад, инвестицияләр һәм эшмәкәрлек комитеты рәисе урынбасары Марат Галиев эш сәфәре белән Яңа Чишмә районында булды, анда ул район Советы утырышында катнашты. Утырышта 2024 елга бюджет үтәлеше мәсьәләләре каралды, шулай ук муниципаль депутатларга районның контроль-хисап палатасы эшчәнлеге турында хисап бирелде. Парламентарийлар махсус хәрби операциядә катнашучыларга һәм аларның гаилә әгъзаларына ярдәм итүче волонтерларга ярдәм итү мәсьәләләренә аерым тукталдылар. Утырыш эштә югары күрсәткечләр ирешкән белгечләргә, шулай ук күп тапкырлар СВО зонасына гуманитар йөк илткән волонтерларга бүләкләр тапшырылды.

Утырыштан соң район активы белән очрашу узды, аның барышында авыл хуҗалыгын, кече һәм урта бизнесны, шулай ук социаль өлкәне үстерүгә бәйле актуаль проблемалар турында фикер алыштылар. Яшьләргә ярдәм итү һәм яңа эш урыннары булдыру мәсьәләләренә аерым игътибар бирелде.

Шул ук көнне Марат Галиев Яңа Чишмә районында туган, махсус хәрби операциядә һәлак булган Александр Орлов хөрмәтенә мемориаль такта ачу тантанасында катнашты. “Бу чара якташларыбызның каһарманлыгын һәм яшьләргә патриотик тәрбия бирү кирәклеген искәртә", - диде Марат Галиев.

Эш сәфәре кысаларында депутат шулай ук махсус хәрби операциядә катнашучы Алексей Лазаревның гаиләсендә булды, ул авыр яраланганнан соң госпитальдә тернәкләндерү уза.