РФ Президенты каршындагы Дәүләт демографик һәм гаилә сәясәтен гамәлгә ашыру буенча советта корпоратив демографик стандарт мәсьәләсе карала. Ул эш бирүченең хатын-кызга мөнәсәбәтенә кагыла. Бу хакта KazanForum кысаларындагы матбугат конференциясендә Федерация Советы Рәисе урынбасары Инна Святенко белдерде.

"Эш бирүче хатын-кызны декрет ялына китмәскә күндермәсен, ә киресенчә – моны стимуллаштырсын һәм хупласын. Без эш бирүче белән хезмәткәр арасындагы мөнәсәбәтләрне үзгәрткәч, туучылар саны кимү белән бәйле демографик вәзгыятьне дә үзгәртәчәкбез", - диде ул.

Святенко фикеренчә, Россия монда хатын-кызларны гендер билгесе буенча түгел, ә һөнәри сыйфатлары буенча бәяләве белән уникаль. "Шуңа күрә бездә хатын-кызларның эре предприятиеләрне, хәтта сәнәгать предприятиеләрен җитәкләвенә, атом энергетикасы өлкәсендә эшләвенә, армиядә хезмәт итүенә беркем дә гаҗәпләнми. Һәм аларның барысы да килеп чыга. Эш бирүченең хатын-кызга мөнәсәбәте бик мөһим", - дип билгеләде ул.

Аның сүзләренә караганда, кайбер Латин Америкасы илләрендә хатын-кызлар үз хокуклары өчен көрәшергә тиеш булган вәзгыять бөтенләй башка. “Алар юл башында, ә без аларга ярдәм итәргә әзер", – дип басым ясады Федерация Советы Рәисе урынбасары.

ТР Дәүләт Советы депутатларының “Мәрхәмәт-Милосердие” хатын-кызлар берләшмәсе җитәкчесе, Россия кооперация университеты ректоры Алсу Нәбиева  “Татарстан бик мәгърифәтле хатын-кызлар белән тәкъдим ителә” дип тә өстәде.

"Мәдәни традицияләр бүген дә хатын-кызларга белем бирү, хезмәткә һәм тәрбиягә мөнәсәбәт белән сугарылган. Безнең тарихи яктан Көнчыгыш һәм Көнбатыш белән элемтәбез бар. Безнең хатын-кызларда Көнчыгыш дипломатиясе элементы бар”, – диде ул.

Берләшкән Гарәп Әмирлекләренең Эшлекле хатын-кызлар советы рәисе һәм президенты Фәридә Абдулла Камбер Әл-Авадхи үз илендә хатын-кызлар тавыш бирергә һәм эшчәнлекнең теләсә нинди өлкәсен сайларга хокуклы, дип сөйләде.

“Безнең хатын-кызларның хезмәт хакы ир-атларныкы кебек үк. Бездә хатын-кызлар газ сәнәгатендә, автоиндустриядә ир-атлардан калышмый. Хәзер бизнеста хатын-кызлар күп. Алар стартаплар гына булдырып калмый, ә башка хатын-кызларның бизнесына ярдәм итәргә дә тырыша", - дип белдерде ул.

AMB Services җитәкчесе Атума Мари Бернадетте Камерунда хатын-кызларның һәм ир-атларның хокуклары тигез түгел, дип билгеләде. “Әмма безнең илдә дә хатын-кызлар парламент әгъзалары, дәүләт активистлары була, һәм ил модернизацияләнә”, - дип белдерде ул.

Бернадетте Россиягә монда бизнеста ир-атлар һәм хатын-кызлар арасында нәтиҗәле партнерлык ничек төзелгәнен аңлау өчен килүен әйтте.

“Хатын – кыз карашы: икътисадны үстерү өчен хатын-кызларның халыкара кооперациясе” матбугат конференциясе  “Россия-Ислам дөньясы: KazanForum” XVI халыкара икътисадый форумы кысаларында узды.

“Россия – Ислам дөньясы: KazanForum” халыкара икътисадый форумы Татарстан башкаласында 13-18 май көннәрендә уза. KazanForum Татарстанда 2009 елдан башлап ел саен үткәрелә. 2023 елдан вакыйга федераль статус алды. Татарстан Рәисе Рөстәм Миңнеханов Россия Президенты Владимир Путин йөкләмәсе буенча “Россия – Ислам дөньясы”стратегик караш төркемен җитәкли.