Юридик затларга парковка түләмәгән өчен штраф 5 мең сумга кадәр артачак. Мондый карар бүген Дәүләт Советы утырышында кабул ителде. Административ хокук бозулар турында Татарстан Республикасы кодексына һәм җирле үзидарә органнарына административ хокук бозулар турында беркетмәләр төзергә вәкаләтле вазыйфаи затлар исемлеген билгеләү буенча дәүләт вәкаләтләрен бирү хакындагы республика законының 1 статьясына үзгәрешләр кертү турында закон проекты беренче укылышта һәм тулаем кабул ителде.

Закон проектын тәкъдим итеп, Законлылык һәм хокук тәртибе комитеты рәисе Александр Чубаров билгеләп үткәнчә, документ административ хокук бозулар турындагы республика законнарын камилләштерү максатыннан эшләнгән. Кабул ителгән закон юридик затларга түләүле парковкаларда кагыйдәләрне бозган өчен штрафны арттыруны күздә тота. Әгәр элек гади гражданнар өчен дә, компанияләр өчен дә штраф 2 500 сум күләмендә билгеләнгән булса, хәзер юридик затларга штраф 5 000 сумга кадәр арттырылган.

Александр Чубаров аңлатканча, хәзерге вакытта алына торган административ штраф күләме транспорт чарасын түләүле муниципаль парковкада тоткан өчен түләмәгән өчен 2 500 сум тәшкил итә, бу икътисадый максатчанлык принцибына туры килми. "Статистика буенча, Казанда административ җаваплылыкка тартылган барлык юридик затларның 80% ка якыны кече һәм урта бизнес субъектлары тәшкил итә, –  дип билгеләп үтте Законлылык һәм хокук тәртибе комитеты рәисе. – РФ Административ хокук бозулар кодексының 4.12 маддәсе нигезләмәләре буенча, алар шәһәр үзәгендәге иң кирәкле урыннарда көн дәвамында машина кую урыннарын биләп, чыннан да кирәк булганнарга машина кую мөмкинлегеннән мәхрүм итеп,  нибары 1250 сум күләмендә штраф түлиләр».

Моннан тыш, Татарстан Республикасы Административ хокук бозулар кодексының «Җирле әһәмияттәге автомобиль юлларыннан файдалану тәртибенә карата таләпләрне бозу»дигән яңа 3.19 статьясы өстәлә. Канунда арбада (контейнерда) коела торган йөк, чүп-чар, җиңел тараны, киселгән агачларны, яфракларны ташыганда йөк транспорт чарасын брезент яисә башка материал белән капламыйча эксплуатацияләү буенча билгеләнгән таләпләрне бозу гражданнарга 5 000 сум күләмендә административ штраф салуга китерә, юридик затларга – 50 000 сум.

Бу административ хокук бозулар фотога һәм кинога төшерү, видео яздыру буенча махсус функцияләре булган автомат режимда эшләүче техник чаралар яисә фото, кино төшерү һәм видео яздыру җайланмалары теркәгән административ хокук бозулар өчен беркетмә төземи генә административ җаваплылыкка тартуның гадиләштерелгән тәртибе дә карала.