Дәүләт Советы депутатларының сайлау округларында эше дәвам итә. Бу атнада парламентарийлар гражданнарны кабул иттеләр, республика муниципалитетларындагы социаль учреждениеләрдә булдылар, республика конкурсларында җиңүчеләрне бүләкләү тантанасында катнаштылар.

19 декабрьдә Дәүләт Советы депутаты Камил Гыйльманов Аксубай районына эш сәфәре белән барды, анда ул район газ хезмәтенә нигез салынуга 50 ел тулуга багышланган тантаналы чарада катнашты.  

18 декабрьдә Казанның 107нче гимназиясендә Яңа ел интеллектуаль квизы булып узды, анда шәһәрнең активистларыннан һәм иҗтимагый оешмаларыннан төзелгән 10 команда катнашты. Чарада катнашучыларны Социаль сәясәт комитеты рәисе урынбасары Ольга Воронова сәламләде. Сораулар Россиянең тарихын һәм мәдәни традицияләрен, шулай ук фән, сәнгать һәм спорт өлкәсендәге казанышларны да кертеп, темаларның киң спектрын колачлады.

18 декабрьдә Законлылык һәм хокук тәртибе комитеты рәисе урынбасары Ринат Фазылов VII чакырылыш Татарстан Республикасы Иҗтимагый палатасы утырышында катнашты, анда башкарылган эшләргә йомгак ясалды.  Ринат Фазылов барлык катнашучыларга да эшләре өчен рәхмәт белдерде, шулай ук СВО үткәрү чорында күрсәткән ярдәмнәре өчен ТР Иҗтимагый палатасы рәисе Зилә Вәлиевага рәхмәт белдерде.  

17 декабрьдә Дәүләт Советы Секретаре Лилия Маврина, парламент депутатлары Ольга Воронова, Рима Мөхәммәдшина, Нияз Гафиятуллин, Андрей Егоров, Евгений Чекашов, Руслан Йосыпов һәм Рамил Әхмәтов Казан шәһәр Думасының IV сессиясендә катнаштылар. Муниципаль депутатлар 2026 елга һәм 2027-2028 еллар план чорына шәһәр бюджетын расладылар. 

16 декабрьдә Дәүләт Советы Рәисе урынбасары Юрий Камалтынов төбәк иҗтимагый кабул итү бүлмәсендә гражданнарны кабул итте. Депутатка 3 кеше мөрәҗәгать итте, сораулар Казан шәһәрендә машина кую урыннарын оештыруга кагылды. Юрий Камалтынов барлык мәсьәләләрне шәхси контрольгә алды.

16 декабрьдә Дәүләт Советы депутаты Руслан Шиһабетдинов гуманитар миссия кысаларында яшь гвардиячеләр белән бергә шефлыкка алынган Лисичанск һәм Рубежное шәһәрләрендә яшәүчеләргә 12 тонна гуманитар ярдәм алып барды. «Шторм Z» аерым штурм бригадасына яшь гвардиячеләр җылы әйберләр, шәхси гигиена предметлары, исемле посылкалар, генераторлар, дроннар һәм маскировка челтәрләре тапшырдылар. Моннан тыш, активистлар госпитальгә  дә гуманитар ярдәм күрсәттеләр. Бу  – коляскалар, култык таяклары, шәхси гигиена чаралары,  тастымаллар, бинтлар һәм озак саклана торган азык-төлек. "Бу инде " Бердәм Россия"белән берлектә 34 нче гуманитар ярдәм җибәрү. Без 85 миллион сумлык 416 тонна йөк җыйдык һәм озаттык», - диде Руслан Шиһабетдинов.

16 декабрьдә Яр Чаллыда «Татэлектромонтаж» АҖ бүлекчәләре хезмәткәрләре арасында «Электромонтажник» белгечлеге буенча һөнәри осталык конкурсы булып узды. Конкурс лауреатларын Социаль сәясәт комитеты рәисе урынбасары Ольга Воронова сәламләде. Конкурста Казан, Яр Чаллы, Әлмәт һәм Түбән Кама бүлекчәләре хезмәткәрләре, шулай ук Татарстан көллиятләре укучылары катнашты. "Эшче һөнәрләре бүген хезмәт базарында бик актуаль, һәм җәмәгатьчелекне, бигрәк тә яшьләрне республика предприятиеләренә җәлеп итү хакимият органнары алдында төп бурычларның берсе тора», – диде Ольга Воронова.

12 декабрьдә Мәгариф, мәдәният, фән һәм милли мәсьәләләр комитеты рәисе Айрат Зарипов, Дәүләт Советы депутатлары Айдар Таһиров һәм Фәнил Баһаветдинов эш сәфәре белән Кайбыч районында булдылар. Район мәдәният йортында депутатлар «Яхшылык эшлә» хәйрия акциясендә катнаштылар. Айрат Зарипов чарада катнашучыларга һәм оештыручыларга рәхмәт белдерде. Хәйрия акциясе кысаларында район халык театры артистлары «Тол хатыннар, тол кызлар» спектаклен күрсәттеләр, ә билет сатудан кергән акчаны хәйрия эшенә юнәлттеләр.

12 декабрьдә Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов эш сәфәре белән Азнакай районына килде. Депутат авыл хуҗалыгы хезмәткәрләре көненә багышланган тантаналы чарада катнашты. Нәҗип Хаҗипов аграрийларны сәламләде, һава шартларына карамастан, көн саен республиканың азык-төлек иминлеген ныгытучыларга рәхмәт белдерде.

12 декабрьдә Бюджет, салымнар һәм финанс комитеты рәисе урынбасары Камил Ногаев Спас районына эш сәфәре кысаларында район алдынгыларын хөрмәтләүгә багышланган бәйрәм концертында катнашты. Депутат район хезмәтчәннәренә намуслы хезмәтләре өчен рәхмәт белдерде һәм Татарстан Республикасы Дәүләт Советы Рәисенең Рәхмәт хатларын тапшырды.

12 декабрьдә Торак сәясәте һәм инфраструктура үсеше комитеты рәисе урынбасары Ринат Гайзатуллин эш сәфәре белән Чүпрәле районына барды, анда Ватанны саклаучылар елына йомгак ясауга багышланган тантаналы чарада катнашты.  

11 декабрьдә Дәүләт корылышы һәм җирле үзидарә комитеты рәисе урынбасары Хафиз Миргалимов Чирмешән районына эш сәфәре кысаларында муниципаль район Советының чираттагы утырышында катнашты. Утырышта район үсешенең төп мәсьәләләре каралды. Шул ук көнне Хафиз Миргалимов гражданнарны кабул итте. Халыкның мөрәҗәгатьләре эшкә алынды.